‘ખાદિમ’ હોટલ દાયકાઓથી અજમેરની ઓળખ બનેલી રાજસ્થાન સરકારની પ્રખ્યાત હોટલ ‘ખાદિમ’નું નામ બદલી દેવામાં આવ્યું છે. હવે આ 45 વર્ષ જૂની હોટલ અજયમેરુ તરીકે ઓળખાશે. ભજનલાલ શર્માની આગેવાની હેઠળની ભાજપ સરકારે રાજસ્થાન પ્રવાસન વિભાગની આ સરકારી હોટલનું નામ બદલવાનો આદેશ જારી કર્યો છે.એક સત્તાવાર આદેશ અનુસાર રાજસ્થાન પ્રવાસન વિકાસ નિગમ (RTDC) એ સોમવારે વિધાનસભા અધ્યક્ષ વાસુદેવ દેવનાનીના નિર્દેશ પર આ આદેશ જારી કર્યો હતો. વાસુદેવ દેવનાની અજમેર ઉત્તરના વર્તમાન ધારાસભ્ય છે અને તેઓ અજમેરના છે.
‘ખાદિમ’ હોટલ – અજમેર ઐતિહાસિક રીતે ‘અજયમેરુ’ તરીકે ઓળખાતું હતું અને આ નામનો ઉપયોગ પ્રાચીન ભારતીય શાસ્ત્રો અને ઐતિહાસિક પુસ્તકોમાં પણ કરવામાં આવ્યો છે. આ શહેર સૂફી સંત ખ્વાજા મોઇનુદ્દીન ચિશ્તી (ર.)ની દરગાહ માટે પ્રખ્યાત છે અને તેની સાથે ‘ખાદિમ’ નામ જોડાયેલું છે. તમને જણાવી દઈએ કે દરગાહની દેખભાળ કરનારા લોકોને ‘ખાદિમ’ કહેવામાં આવે છે.
દેવનાનીએ આ સૂચનાઓ RTDCને આપી હતી
અધિકારીઓએ જણાવ્યું કે દેવનાનીએ અગાઉ RTDCને જિલ્લા કલેક્ટર કચેરીની સામે સ્થિત હોટલનું નામ બદલવાની સૂચના આપી હતી. તેમણે કહ્યું કે હોટલનું નામ, જે પ્રવાસીઓ, અધિકારીઓ અને સ્થાનિકોમાં લોકપ્રિય છે, તે અજમેરના સમૃદ્ધ સાંસ્કૃતિક ઇતિહાસ, વારસા અને ઓળખને પ્રતિબિંબિત કરે છે.
આ નામ બદલવાની પણ ચર્ચા
અધિકારીઓના જણાવ્યા અનુસાર, દેવનાનીએ અજમેરમાં કિંગ એડવર્ડ મેમોરિયલનું નામ હિન્દુ ફિલોસોફર સ્વામી દયાનંદ સરસ્વતીના નામ પર રાખવાનું પણ સૂચન કર્યું છે. હોટલ ખાદિમનું નામ બદલીને ‘અજયમેરુ’ કરવાનો આદેશ RTDCના એમડી સુષ્મા અરોરા દ્વારા કોર્પોરેશનના બોર્ડ ઓફ ડિરેક્ટર્સની બેઠક બાદ જારી કરવામાં આવ્યો હતો.
ઈતિહાસકારોએ શું કહ્યું? ‘અજયમેરુ’ નામના મૂળ 7મી સદીના છે. ત્યારબાદ મહારાજા અજયરાજ ચૌહાણે આ શહેરની સ્થાપના કરી હતી. ઈતિહાસકારોના મતે આ નામનો ઉપયોગ પ્રાચીન ઐતિહાસિક રેકોર્ડ અને ભૌગોલિક સંદર્ભોમાં પણ કરવામાં આવ્યો છે.
આ પણ વાંચો – તિરુપતિ બાલાજી મંદિરમાંથી ટૂંક સમયમાં બિન-હિન્દુ કર્મચારીઓને હટાવાશે, બોર્ડની બેઠકમાં લેવાયા અનેક મોટા નિર્ણય!
