BJP Foundation Day : ભારતીય જનતા પાર્ટીનો આજે 45મો સ્થાપના દિવસ છે. વર્ષ 1980માં ભારતીય રાજકારણમાં પ્રારંભ કરનાર આ પક્ષ આજે વિશ્વની સૌથી મોટી લોકશાહીપક્ષ તરીકે ઉભર્યું છે. પાર્ટીના સ્થાપના દિવસને લઈને સમગ્ર ગુજરાતમાં વિવિધ કાર્યક્રમો યોજાયા અને કાર્યકરોએ ઉત્સાહપૂર્વક ભાગ લીધો.
રાજકોટમાં મનસુખ માંડવીયાએ ફરકાવ્યો ઝંડો
રાજકોટ શહેરમાં ભાજપના કાર્યકરો સાથે કેન્દ્રીય મંત્રી મનસુખ માંડવીયાએ ઉજવણીમાં ભાગ લીધો હતો. શહેરના ભાજપ પ્રમુખના નિવાસસ્થાને ખાસ કાર્યક્રમ યોજાયો હતો જેમાં માંડવીયાએ પોતાના હાથથી પાર્ટીનો ધ્વજ લગાવ્યો. કાર્યકરો અને નેતાઓએ વિસ્તારમાં પણ ઘરઘર ઝંડા લગાવ્યા. આ અવસરે તેમણે રામનવમીની પણ શુભેચ્છાઓ પાઠવી.
સુરતમાં પાટીલના ઘેર ઉત્સવ
સુરત શહેરમાં ભાજપના પ્રદેશ પ્રમુખ તથા કેન્દ્રીય મંત્રી સી.આર. પાટીલએ પોતાના નિવાસસ્થાને પાર્ટીના સ્થાપના દિવસની ઉજવણી કરી હતી. મોટી સંખ્યામાં કાર્યકરો હાજર રહ્યા હતા. પાટીલએ જણાવ્યું કે, “આ દિવસ દરેક ભાજપ કાર્યકર માટે ગૌરવનો છે. આજે ભાજપ વિશ્વની સૌથી મોટી સભ્ય સંખ્યાવાળી પાર્ટી બની છે અને જનસેવાનું શ્રેષ્ઠ ઉદાહરણ આપી રહી છે.” પાર્ટી દ્વારા રાજ્યભરમાં 1.25 કરોડ જેટલા ધ્વજ વિતરણ કરાયા હોવાની માહિતી પણ તેમણે આપી.
અમદાવાદમાં અમિત શાહે દેખાડ્યો ઉલ્લાસ
અમદાવાદ શહેરમાં પણ ભાજપના કાર્યકરોમાં ખાસ ઉલ્લાસ જોવા મળ્યો. શહેર ભાજપ પ્રમુખ અમિત શાહના નેતૃત્વમાં રામ મંદિર ખાતે દર્શન કર્યા પછી શહીદ ચોક સુધી રેલી યોજવામાં આવી હતી. દરેક વોર્ડમાં 25 જેટલા ઝંડાઓનું વિતરણ કરાયું હતું. પાર્ટી કાર્યકરો ઘરો પર ઝંડા લગાવીને અને કાર્યક્રમો યોજીને પક્ષના સ્થાપના દિનની ઉજવણી કરી રહ્યા છે.
