શાળા પ્રવેશોત્સવ: ગીર સોમનાથ જિલ્લાના ઉના તાલુકાના લેરકા ગામની પ્રાથમિક શાળામાં પ્રવેશોત્સવના કાર્યક્રમ દરમિયાન મોટી દુર્ઘટના સર્જાઈ. શાળાના જર્જરિત વર્ગખંડની છતમાંથી અચાનક પોપડા પડવાને કારણે ત્રણ વિદ્યાર્થી ઘાયલ થયા, જેમાં બે વિદ્યાર્થીનીઓને માથાના ભાગે ઈજા પહોંચી. આ ઘટનાએ ગ્રામજનોમાં રોષ ફેલાવ્યો છે.
ઘટનાની વિગતો
શાળા પ્રવેશોત્સવ: આજે સવારે 11 વાગ્યે લેરકા પ્રાથમિક શાળામાં પ્રવેશોત્સવનો કાર્યક્રમ ચાલી રહ્યો હતો. અધિકારીઓ, આગેવાનો અને વાલીઓની હાજરીમાં કાર્યક્રમ ચાલતો હતો ત્યારે અચાનક વરસાદ શરૂ થતાં વિદ્યાર્થીઓને ધોરણ 6ના વર્ગખંડમાં ખસેડવામાં આવ્યા. જોકે, આ વર્ગખંડની જર્જરિત છતમાંથી પોપડા પડવા માંડ્યા, જેના કારણે શાળામાં દોડધામ મચી ગઈ.
ઘાયલ વિદ્યાર્થીઓ
આ ઘટનામાં બાલવાટિકાની વિદ્યાર્થીની રિયાંશી વિપુલભાઈ સોલંકી અને ધોરણ 1ની વિદ્યાર્થીની દીપનાંશી અશ્વિનભાઈ સોલંકીને માથાના ભાગે ઈજા થઈ. આ ઉપરાંત, ધોરણ 1ના વિદ્યાર્થી ભગીરથ ભરતભાઈ શિંગડને પગમાં ઈજા પહોંચી. ત્રણેય ઘાયલ વિદ્યાર્થીઓને તાત્કાલિક ડોળાસા પ્રાથમિક આરોગ્ય કેન્દ્રમાં સારવાર માટે ખસેડવામાં આવ્યા.
શાળા આચાર્યને નોટિસ
ઘટનાની જાણ થતાં જિલ્લા અને તાલુકા શિક્ષણાધિકારીઓ શાળાએ પહોંચી ગયા અને શાળાનું નિરીક્ષણ કર્યું. પ્રાથમિક તપાસમાં જાણવા મળ્યું કે શાળાના આચાર્ય દ્વારા પૂરતી સાવચેતી રાખવામાં આવી ન હતી, જેના કારણે તેમને નોટિસ જારી કરવામાં આવી છે.
ગ્રામજનોમાં રોષ
આ ઘટનાએ ગામના લોકોમાં ભારે રોષ ફેલાયો છે. શાળાના જર્જરિત બાંધકામ અને અધિકારીઓની બેદરકારી સામે લોકોમાં નારાજગી જોવા મળી રહી છે. ગ્રામજનોએ શાળાના બાંધકામની તપાસ અને યોગ્ય સમારકામની માગણી કરી છે.
આ પણ વાંચો- Shefali Jariwala passed away: ‘કાંટા લગા’ ગીતથી મશહુર થયેલી અભિનેત્રી શેફાલી જરીવાલાનું નિધન
