Brett Randell record : ન્યુઝીલેન્ડ ઘરેલુ ક્રિકેટ (Plunket Shield) માં એક એવી ઘટના બની છે જેણે સમગ્ર વિશ્વના ક્રિકેટ પ્રેમીઓને સ્તબ્ધ કરી દીધા છે. સેન્ટ્રલ ડિસ્ટ્રિક્ટ્સના ફાસ્ટ બોલર બ્રેટ રેન્ડેલે (Brett Randell) મેદાન પર એવો જાદુ વેર્યો કે જેની કલ્પના ભાગ્યે જ કોઈએ કરી હોય. ફર્સ્ટ ક્લાસ ક્રિકેટના ઈતિહાસમાં તેણે સતત 5 બોલમાં 5 વિકેટ ઝડપીને એક નવો કીર્તિમાન સ્થાપિત કર્યો છે.
Five wickets in five balls for Central Districts’ Brett Randell – the first-ever instance in first-class cricket! pic.twitter.com/7qdJ9JPSxx
— Rahul (@exceedingxpuns) March 8, 2026
Brett Randell record મેક્લીન પાર્ક ખાતે રચાયો ઈતિહાસ
આ ઐતિહાસિક સિદ્ધિ નેપિયરના મેક્લીન પાર્ક ખાતે રમાયેલી મેચ દરમિયાન નોંધાઈ હતી. સેન્ટ્રલ ડિસ્ટ્રિક્ટ્સ અને નોર્ધન ડિસ્ટ્રિક્ટ્સ વચ્ચેની આ ટક્કરમાં મેચના બીજા દિવસે રેન્ડેલની ઘાતક બોલિંગે હરીફ ટીમની કમર તોડી નાખી હતી. એક સમયે નોર્ધન ડિસ્ટ્રિક્ટ્સનો સ્કોર વિના વિકેટે 4 રન હતો, પરંતુ રેન્ડેલના પાયમાલ કરનારા સ્પેલ બાદ સ્કોર જોતજોતામાં 5 વિકેટે 9 રન થઈ ગયો હતો.
કેવી રીતે મળી સતત 5 વિકેટ?
બ્રેટ રેન્ડેલે તેની સ્પેલમાં નીચે મુજબ શિકાર કર્યા હતા:
પ્રથમ વિકેટ: ઓપનર હેનરી કૂપરને આઉટ કરીને શરૂઆત કરી.
બીજી વિકેટ: બીજા બોલે જીત રાવલને પેવેલિયન ભેગો કર્યો.
ત્રીજી વિકેટ (હેટ્રિક): જો કાર્ટરનો કેચ પકડાતા હેટ્રિક પૂર્ણ થઈ.
ચોથી વિકેટ: રોબર્ટ ઓ’ડોનેલ સ્લિપમાં કેચ આઉટ થયો.
પાંચમી વિકેટ: ક્રિશ્ચિયન ક્લાર્ક ઇનસાઇડ એજ વાગતા બોલ્ડ થયો.
8 બોલમાં 6 વિકેટનો અકલ્પનીય રેકોર્ડ
રેન્ડેલ અહીં જ અટક્યો નહોતો. તેણે થોડી જ વારમાં વધુ બે વિકેટ ઝડપીને ફર્સ્ટ ક્લાસ ક્રિકેટમાં માત્ર 8 બોલના અંતરાલમાં 6 વિકેટ લેનારો વિશ્વનો પ્રથમ બોલર બનવાનું બહુમાન મેળવ્યું હતું. તેણે કુલ 11 ઓવરમાં માત્ર 25 રન આપીને 7 વિકેટ ઝડપી હતી, જેના કારણે આખી નોર્ધન ડિસ્ટ્રિક્ટ્સની ટીમ માત્ર 82 રનમાં ઓલઆઉટ થઈ ગઈ હતી.
પોતાના પ્રદર્શન વિશે વાત કરતા રેન્ડેલે જણાવ્યું હતું કે, “હું ખરેખર આશ્ચર્યચકિત છું. મારે ખાતરી કરવા માટે મારી જાતને ચપટી ભરવી પડી હતી.” રસપ્રદ વાત એ છે કે જો ટીમના સિનિયર બોલરો ઈજાગ્રસ્ત ન હોત, તો કદાચ રેન્ડેલને આ મેચમાં રમવાની તક પણ ન મળી હોત.
આ પણ વાંચો: T20 વર્લ્ડ કપ જીતવાની સાથે ભારતે બનાવ્યા 3 નવા વર્લ્ડ રેકોર્ડ , પહેલી ટીમ બની,જાણો
