અમદાવાદ વિમાન દુર્ઘટનાના મૃતકોને મહેમદાવાદમાં ભાવપૂર્ણ શ્રધ્ધાંજલિ આપવામાં આવી

વિમાન દુર્ઘટનાના મૃતકોને શ્રધ્ધાંજલિ-  અમદાવાદથી લંડન જઈ રહેલા એર ઇન્ડિયાના વિમાન દુર્ઘટનામાં 241 લોકોના મોત થયા હતા, આ દુર્ઘટનામાં મૃત્યુ પામેલા તમામને મહેમદાવાદના મુખ્ય ચાર રસ્તા બજાર ખાતે શ્રદ્ધાંજલિ કાર્યક્રમનું આયોજન કરવામાં આવ્યું હતું. આ દુઃખદ ઘટનાએ સમગ્ર દેશને હચમચાવી દીધું હતો, અને આ કાર્યક્રમમાં શહેરના તમામ ધર્મોના નાગરિકો મોટી સંખ્યામાં ઉપસ્થિત રહીને વિમાન દુર્ઘટનાના મૃતકોને શ્રદ્વાંજલિ અર્પી હતી

વિમાન દુર્ઘટનાના મૃતકોને શ્રધ્ધાંજલિ- શબરી માલા ગ્રૂપ અને મૈત્રી ગ્રૂપના સભ્યોએ આ કાર્યક્રમની તૈયારીઓ સાથે મળીને કરી હતી. મહેમદાવાદ બજાર ચાર રસ્તા ખાતે આયોજિત આ કાર્યક્રમમાં સ્થાનિક નાગરિકોએ એકત્ર થઈને મૃતકોની આત્માને શાંતિ મળે તેવી પ્રાર્થના કરી હતી. કાર્યક્રમ દરમિયાન શોકસભા યોજાઈ, જેમાં લોકોએ મીણબત્તીઓ પ્રગટાવી અને શાંતિપૂર્વક શ્રદ્ધાંજલિ આપી. આ પ્રસંગે વાતાવરણ ગમગીન બની ગયું હતું, અને ઉપસ્થિત લોકોની આંખોમાં શોકની લાગણી સ્પષ્ટ દેખાતી હતી.

સમાજની એકતા
આ શ્રદ્ધાંજલિ કાર્યક્રમમાં મહેમદાવાદના હિન્દુ, મુસ્લિમ, શીખ, ખ્રિસ્તી અને અન્ય ધર્મોના નાગરિકોએ ભાગ લીધો, જે શહેરની એકતા અને સમરસતાનું પ્રતીક બન્યું. દરેકે એકબીજાના દુઃખમાં સહભાગી બનીને મૃતકોના પરિવારો પ્રત્યે સંવેદના વ્યક્ત કરી. સ્થાનિક આગેવાનોએ પણ આ કાર્યક્રમમાં હાજરી આપી અને આ દુર્ઘટનાને રાજ્યની મોટી ખોટ ગણાવી.

રૂદ્ર પટેલની યાદ
આ દુર્ઘટનામાં મહેમદાવાદના 20 વર્ષીય રૂદ્ર પટેલનું પણ અકાળે અવસાન થયું હતું, જે ઉચ્ચ અભ્યાસ માટે લંડન જઈ રહ્યો હતો. રૂદ્રના પરિવારના દુઃખમાં સહભાગી બનવા ઘણા સ્થાનિક લોકો આ કાર્યક્રમમાં જોડાયા. રૂદ્રની મહેનત, તેના સપના અને તેના આજ્ઞાકારી સ્વભાવની ચર્ચા કરતાં લોકોની આંખો ભીની થઈ ગઈ.

પ્રાર્થના અને સંકલ્પ
કાર્યક્રમના અંતે, ઉપસ્થિત નાગરિકોએ સામૂહિક પ્રાર્થના કરી અને ભગવાનને મૃતકોની આત્માને શાંતિ આપવા તેમજ તેમના પરિવારોને આ દુઃખ સહન કરવાની શક્તિ આપવા વિનંતી કરી. શબરી માલા ગ્રૂપ અને મૈત્રી ગ્રૂપના સભ્યોએ આવા સમયે સમાજને એકજૂથ કરવાના પ્રયાસો ચાલુ રાખવાનો સંકલ્પ લીધો.

સમાજનો સંદેશ
આ શ્રદ્ધાંજલિ કાર્યક્રમ દ્વારા મહેમદાવાદના નાગરિકોએ એકતાનો સંદેશ આપ્યો અને દુઃખની ઘડીમાં એકબીજાની સાથે ઊભા રહેવાની ભાવના વ્યક્ત કરી. આ ઘટનાએ રાજ્ય અને રાષ્ટ્રને ઊંડો આઘાત આપ્યો છે.

આ  પણ વાંચો-  અમદાવાદ વિમાન દુર્ઘટના: મહેમદાવાદનો આશાવાદી અને આજ્ઞાકારી રૂદ્ર પટેલનું લંડનનું સપનું અધૂરું રહ્યું…