Tribhuvan Cooperative University: ગાંધીનગર ખાતે કેન્દ્રીય ગૃહ અને સહકાર મંત્રી અમિત શાહની અધ્યક્ષતામાં યોજાયેલી ઐતિહાસિક મેગા-સમિટ ‘મંથન’ના સફળ સમાપન બાદ, આજે આણંદ સ્થિત “ત્રિભુવન” સહકારી યુનિવર્સિટી ખાતે એક પ્રતિષ્ઠિત ઉચ્ચ સ્તરીય પ્રતિનિધિમંડળની મુલાકાત યોજાઈ હતી. આ પ્રતિનિધિમંડળમાં મહારાષ્ટ્રના સહકાર મંત્રી શ્રી બાબાસાહેબ પાટીલ, દિલ્હીના સહકાર મંત્રી શ્રી રવિંદર ઇન્દ્રજ સિંહ, કેન્દ્રીય સહકાર મંત્રાલયના વરિષ્ઠ અધિકારીઓ તેમજ વિવિધ રાજ્યોના રજિસ્ટ્રાર ઓફ કો-ઓપરેટિવ સોસાયટીઝ (RCS) સામેલ હતા.
Tribhuvan Cooperative University સહકારી ક્ષેત્રના વ્યવસાયીકરણ પર ભાર
આ મુલાકાતનો મુખ્ય ઉદ્દેશ્ય ભારતના સહકારી માળખાને સંસ્થાગત રીતે મજબૂત બનાવવાનો અને ક્ષમતા વિકાસ (Capacity Building) ને વેગ આપવાનો હતો. બેઠકમાં ચર્ચા કરવામાં આવી હતી કે કેવી રીતે “ત્રિભુવન” સહકારી યુનિવર્સિટી દેશની અગ્રણી સંસ્થા તરીકે રાજ્યોને વ્યાવસાયિક વ્યવસ્થાપન અને ટકાઉ વિકાસના લક્ષ્યો પ્રાપ્ત કરવામાં મદદ કરી શકે. ખાસ કરીને સહકારી સંસ્થાઓમાં શાસન ધોરણો સુધારવા અને કાર્યકારી શિક્ષણ કાર્યક્રમો દ્વારા કર્મચારીઓને સજ્જ કરવા પર ભાર મૂકવામાં આવ્યો હતો.
વ્યૂહાત્મક ભાગીદારી અને સંશોધન
યુનિવર્સિટી ખાતે પ્રતિનિધિમંડળનું સ્વાગત IRMA ના ડિરેક્ટર અને યુનિવર્સિટીના ડીન પ્રોફેસર સસ્વતા નારાયણ બિસ્વાસ દ્વારા કરવામાં આવ્યું હતું. પ્રોફેસર શ્યામ સિંહે રાજ્ય સહકારી પરિસ્થિતિને મજબૂત બનાવવા માટે યુનિવર્સિટીના વ્યૂહાત્મક દ્રષ્ટિકોણનું માર્ગદર્શન રજૂ કર્યું હતું. આ દરમિયાન વિવિધ રાજ્યોની જરૂરિયાત મુજબના વૈવિધ્યપૂર્ણ શિક્ષણ કાર્યક્રમો અને નીતિ વિષયક સંશોધનો અંગે વિસ્તૃત વિચાર-વિમર્શ કરવામાં આવ્યો હતો.
વિકસિત ભારત તરફ ડગલું
આ ઉચ્ચ સ્તરીય મુલાકાતે પુરાવા આધારિત સંશોધન અને મજબૂત સંસ્થાગત ભાગીદારી દ્વારા સહકારી સંસ્થાઓને સશક્ત બનાવવાની રાષ્ટ્રીય પ્રતિબદ્ધતાને પુનરોચ્ચાર કર્યો છે. સહકારથી સમૃદ્ધિના મંત્રને સાર્થક કરતા આ પ્રયાસો ‘વિકસિત ભારત@2047’ ના દ્રષ્ટિકોણને સાકાર કરવામાં પાયાનો પથ્થર સાબિત થશે.
આ પણ વાંચો: આણંદમાં સેન્ટ્રલ બેંક ઓફ ઈન્ડિયા દ્વારા મેગા એગ્રીકલ્ચર ક્રેડિટ આઉટરીચ કેમ્પનું સમાપન
