BZ scam Bhupendra Jhala Arrested: BZ પોંઝી સ્કીમ દ્વારા કરોડો રૂપિયાના કૌભાંડ આચરનાર મુખ્ય આરોપી ભૂપેન્દ્ર ઝાલાને CID ક્રાઇમે મહેસાણા જિલ્લામાંથી ઝડપી લીધો છે. ભૂપેન્દ્ર ઝાલા પર લોકોના રોકાણના પૈસા દુરુપયોગ કરવાનો ગંભીર આરોપ છે. આ ધરપકડથી કૌભાંડમાં એક મહત્વપૂર્ણ માહિતી પ્રાપ્ત થઈ છે અને ભોગ બનેલા લોકોને ન્યાયની આશા ફરીથી જગાવી છે.
ભૂપેન્દ્ર ઝાલા ઘણા સમયથી પોલીસની પકડથી દૂર હતો, પરંતુ CID ક્રાઇમને તે મહેસાણામાંથી પકડી પાડવામાં સફળતા મળી છે. ધરપકડ પછી તેની પૂછપરછ શરૂ કરવામાં આવી છે, જેથી કૌભાંડ સાથે જોડાયેલા અન્ય તથ્યો અને સંબંધિત લોકોને ઉજાગર કરી શકાય.
કોર્ટમાં આગોતરા જામીન અરજી ફગાવી
આ દરમિયાન, ભૂપેન્દ્ર ઝાલાએ અગાઉ અમદાવાદ ગ્રામ્ય કોર્ટમાં આગોતરા જામીન અરજી કરી હતી. પરંતુ કોર્ટે તેની અરજી ફગાવી દીધી હતી. જો કે, ભૂપેન્દ્ર ઝાલાએ કોર્ટ સમક્ષ દલીલ કરી હતી કે તેણે કોઈ કૌભાંડ આચર્યું નથી અને ખોટી રીતે ધરપકડ થવાની શક્યતા વ્યક્ત કરી હતી. હવે, કોર્ટમાં આ મામલે વધુ સુનાવણી હાથ ધરવામાં આવશે, અને તપાસ અધિકારી દ્વારા જરૂરી માહિતી પ્રસ્તુત કરવામાં આવશે.
એજન્ટો દ્વારા પીડિતોને મેસેજ અને CIDની ચેતવણી
ભૂપેન્દ્ર ઝાલાના એજન્ટો અને કેટલાક તત્વોએ પીડિતોને ફરિયાદ ન કરવાની ધમકીભર્યા મેસેજ મોકલ્યાં હતા, જેમ કે “પોલીસ પાસે જશો તો પૈસા નહીં મળે.” CID ક્રાઇમે આ મામલે ચેતવણી આપીને આવા તત્વો વિરુદ્ધ કાર્યવાહી શરૂ કરી છે.
CID ક્રાઇમે ભૂપેન્દ્ર ઝાલાની કુલ 22 સંપત્તિ જપ્ત કરવાની પ્રક્રિયા શરૂ કરી છે અને આ કેસની વધુ તપાસ ચાલી રહી છે. CIDએ રોકાણકારોને અપીલ કરી છે કે તેઓ કોઈ પણ પ્રકારની માહિતી અને પુરાવા સામે લાવે, જેથી વધુ દોષિતોને કાનૂની પકડમાં લાવી શકાય.
