Dr Manmohan Singh Passes Away: ભારતના ભૂતપૂર્વ વડાપ્રધાન ડૉ.મનમોહન સિંહનું નિધન થયું છે. ગુરુવારે રાત્રે તેમની તબિયત લથડતા તેમને દિલ્હી એમ્સમાં દાખલ કરવામાં આવ્યા હતા. તેઓ 92 વર્ષના હતા. તેમનો જન્મ 26 સપ્ટેમ્બર 1932ના રોજ પાકિસ્તાન (અવિભાજિત ભારત)ના પંજાબ પ્રાંતમાં થયો હતો. મનમોહન સિંહે 2004-2014 વચ્ચે ભારતના 13મા વડાપ્રધાન તરીકે સેવા આપી હતી. આ પહેલા તેઓ 1991માં નરસિમ્હા રાવ સરકારમાં નાણામંત્રી રહી ચૂક્યા છે. તેમના પરિવારમાં તેમની પત્ની ગુરશરણ કૌર અને 3 પુત્રીઓ છે.
આર્થિક સુધારામાં મહત્વની ભૂમિકા ભજવી હતી
મનમોહન સિંહે દેશના આર્થિક સુધારામાં મહત્વની ભૂમિકા ભજવી હોવાનું માનવામાં આવે છે. નરસિમ્હા રાવની સરકારમાં તેમણે ભારતીય અર્થવ્યવસ્થા માટે ઉદારીકરણ, ખાનગીકરણ અને વૈશ્વિકીકરણને લગતી ઘણી મહત્વપૂર્ણ જાહેરાતો કરી હતી. જેના કારણે ભારતીય અર્થવ્યવસ્થાને નવી ગતિ મળી. તેમના પ્રયાસોને કારણે, ભારતની વેપાર નીતિ, ઔદ્યોગિક લાઇસન્સિંગ અને બેંકિંગ ક્ષેત્રોમાં નોંધપાત્ર સુધારાઓ જોવા મળ્યા હતા.
મનમોહન સિંહ પ્રથમ વખત 1991માં રાજ્યસભા પહોંચ્યા હતા. તેઓ 1998 થી 2004 દરમિયાન રાજ્યસભામાં વિપક્ષના નેતા પણ હતા. 2004ની સામાન્ય ચૂંટણી પછી, તેમણે 22 મેના રોજ પીએમ તરીકે શપથ લીધા. તે જ સમયે, 22 મે 2009 ના રોજ, તેમણે સતત બીજી ટર્મ માટે જવાબદારી લીધી. તેઓ સતત 10 વર્ષ સુધી ભારતના પીએમ રહ્યા. અગાઉ મનમોહન સિંહ 1982-85 દરમિયાન રિઝર્વ બેંક ઓફ ઈન્ડિયાના ગવર્નર તરીકે પણ રહી ચૂક્યા છે.
વિભિન્ન પદો સંભાળ્યા
ડૉ. મનમોહન સિંહે 1966-1969 દરમિયાન સંયુક્ત રાષ્ટ્રમાં આર્થિક બાબતોના અધિકારી તરીકે સેવા આપી હતી. મનમોહન સિંહે 1985 થી 1987 સુધી આયોજન પંચના વડા તરીકે પણ સેવા આપી હતી. 1972 અને 1976 વચ્ચે મુખ્ય આર્થિક સલાહકાર તરીકે કામ કર્યું. તેઓ પ્રથમ વખત આસામમાંથી રાજ્યસભાના સભ્ય તરીકે ચૂંટાયા હતા. આ પછી, તેઓ ફરીથી 1995, 2001, 2007 અને 2013 માં તે જ જગ્યાએથી ચૂંટાયા. 1999માં મનમોહન દક્ષિણ દિલ્હીથી લોકસભા ચૂંટણી હારી ગયા.
મનમોહન સિંહ કેમ્બ્રિજ યુનિવર્સિટીમાંથી પાસઆઉટ હતા. તેમણે ઓક્સફોર્ડ યુનિવર્સિટીમાંથી અર્થશાસ્ત્રમાં ડોક્ટરેટની પદવી મેળવી. આ પછી, તેમણે પંજાબ યુનિવર્સિટી, દિલ્હી સ્કૂલ ઑફ ઇકોનોમિક્સ અને દિલ્હી યુનિવર્સિટીમાં પ્રોફેસર તરીકે કામ કર્યું. મનમોહન સિંહને 1987માં ભારતનું બીજું સર્વોચ્ચ સન્માન પદ્મ વિભૂષણ મળ્યું. આ સિવાય તેમને ઘણા પુરસ્કારો અને માનદ પદવીઓ પણ મળી ચુકી છે.
