ઉત્તરપૂર્વમાં ભારે વરસાદ- દેશમાં અકાળે પડેલું ચોમાસુ ઉત્તરપૂર્વમાં તબાહી મચાવી રહ્યું છે. છેલ્લા ત્રણ દિવસમાં, ઉત્તરપૂર્વમાં મણિપુર, મિઝોરમ, આસામ, અરુણાચલ પ્રદેશ, ત્રિપુરામાં સતત ભારે વરસાદ, ભૂસ્ખલન અને પૂરને કારણે 19 લોકોના મોત થયા છે. જ્યારે 12 હજારથી વધુ પરિવારો પ્રભાવિત થયા છે. આ રાજ્યોમાં મકાનો તૂટી પડવાથી મોટી સંખ્યામાં લોકો બેઘર બન્યા છે. નદીઓ ઉભરાઈ રહી છે. હવામાન વિભાગે તમામ રાજ્યો માટે ચેતવણી જારી કરી છે.
મિઝોરમમાં ત્રણ ઇમારતો ધરાશાયી થઈ
દક્ષિણ મિઝોરમના લોંગટલાઈ શહેરમાં ભારે વરસાદને કારણે થયેલા ભૂસ્ખલનને કારણે પાંચ મકાનો અને એક હોટલ ધરાશાયી થઈ ગઈ. તેમાં ઘણા લોકો ફસાયા હતા. લોંગટલાઈ જિલ્લાની સૌથી મોટી નાગરિક સામાજિક સંસ્થા, યંગ લાઈ એસોસિએશન (YLA) ના સ્વયંસેવકો સાથે રાજ્ય આપત્તિ પ્રતિભાવ દળ (SRDF) અને 3જી ભારતીય રિઝર્વ બટાલિયન દ્વારા બચાવ કામગીરી હાથ ધરવામાં આવી રહી છે. ભૂસ્ખલનને કારણે રાષ્ટ્રીય ધોરીમાર્ગ-54 અવરોધિત થઈ ગયો છે, જેના કારણે મિઝોરમના દક્ષિણ જિલ્લા સિયાહાથી લોંગટલાઈનો સંપર્ક કપાઈ ગયો છે.
આસામમાં પાંચ લોકોના મોત
આસામના કામરૂપ મેટ્રો જિલ્લામાં ભારે વરસાદ અને ભૂસ્ખલનના કારણે પાંચ લોકોના મોત થયા છે. પાંચ જિલ્લામાં પૂરથી 12,000 થી વધુ લોકો પ્રભાવિત થયા છે. ગુવાહાટી અને સિલચરમાં પૂરથી 10 હજારથી વધુ લોકો પ્રભાવિત થયા છે. લખીમપુરમાં પાણીએ રિંગ ડેમ તોડી નાખ્યો છે. IMD રિપોર્ટ મુજબ, છેલ્લા 24 કલાકમાં ગુવાહાટી અને તેની આસપાસના વિસ્તારોમાં 90 થી 134 મીમી વરસાદ પડ્યો છે અને ભવિષ્યમાં પણ ભારે વરસાદની અપેક્ષા છે.
આ પણ વાંચો- ગુજરાતમાં આ જિલ્લામાં પડશે વરસાદ, હવામાન વિભાગે કરી મોટી આગાહી
