CSK vs RR IPL 2026 : IPL 2026 ની ત્રીજી મેચમાં જ એક મોટો ઉલટફેર અને રોમાંચક મુકાબલો જોવા મળ્યો છે. પાંચ વખતની ચેમ્પિયન ચેન્નઈ સુપર કિંગ્સ (CSK) ને રાજસ્થાન રોયલ્સ (RR) સામે શરમજનક હારનો સામનો કરવો પડ્યો છે. રાજસ્થાનના યુવા બેટ્સમેન વૈભવ સૂર્યવંશીની તોફાની ઇનિંગ અને બોલરોના શાનદાર પ્રદર્શનની મદદથી રાજસ્થાને આ મેચ 8 વિકેટે પોતાના નામે કરી લીધી છે.
CSK vs RR IPL 2026 : વૈભવ સૂર્યવંશીની ઐતિહાસિક અડધી સદી
હાલમાં જ પોતાનો 15મો જન્મદિવસ ઉજવનાર યુવા ખેલાડી વૈભવ સૂર્યવંશીએ ચેન્નઈના બોલરોની બરાબરની ધોલાઈ કરી હતી. સૂર્યવંશીએ માત્ર 15 બોલમાં પોતાની અડધી સદી પૂરી કરીને ઇતિહાસ રચી દીધો. તેણે 17 બોલમાં 4 ચોગ્ગા અને 5 છગ્ગાની મદદથી આક્રમક 52 રન ફટકાર્યા હતા. આ IPL ના ઇતિહાસમાં કોઈપણ ભારતીય બેટ્સમેન દ્વારા ફટકારવામાં આવેલી ત્રીજી સૌથી ઝડપી અને રાજસ્થાન તરફથી બીજી સૌથી ઝડપી અડધી સદી છે.
રાજસ્થાને 12.1 ઓવરમાં જ મેળવ્યો વિજય
ચેન્નઈએ રાજસ્થાનને જીતવા માટે માત્ર 128 રનનો સામાન્ય ટાર્ગેટ આપ્યો હતો. વૈભવ સૂર્યવંશી અને યશસ્વી જયસ્વાલની વિસ્ફોટક શરૂઆતને કારણે રાજસ્થાને આ લક્ષ્ય માત્ર 12.1 ઓવરમાં 2 વિકેટ ગુમાવીને આસાનીથી હાંસલ કરી લીધું. જયસ્વાલ અને સૂર્યવંશીએ 38 બોલમાં 75 રનની ભાગીદારી કરીને પાવરપ્લેમાં જ મેચનું પરિણામ નક્કી કરી દીધું હતું. બાકી રહેલા બોલ (47 બોલ) ની દ્રષ્ટિએ આ રાજસ્થાનની સૌથી મોટી જીતોમાંની એક છે.
ચેન્નઈ સુપર કિંગ્સનું કંગાળ પ્રદર્શન
આ પહેલા રાજસ્થાનના કેપ્ટન રિયાન પરાગે ટોસ જીતીને પ્રથમ બોલિંગ કરવાનો નિર્ણય લીધો હતો જે એકદમ સાચો સાબિત થયો. રાજસ્થાનના બોલરો સામે ચેન્નઈના બેટ્સમેનો ઘૂંટણિયે પડી ગયા હતા. નાંદ્રે બર્ગર, જોફ્રા આર્ચર અને રવિન્દ્ર જાડેજા (જે હવે રાજસ્થાન તરફથી રમી રહ્યો છે) ના ઘાતક સ્પેલ સામે ચેન્નઈ 19.4 ઓવરમાં માત્ર 127 રનમાં સમેટાઈ ગઈ. ચેન્નઈ તરફથી માત્ર જેમી ઓવર્ટને 36 બોલમાં 43 રનની લડાયક ઇનિંગ રમી હતી.
બોલરોનો દબદબો
રાજસ્થાનના બોલરોએ મેચની શરૂઆતથી જ દબાણ બનાવી રાખ્યું હતું. નાંદ્રે બર્ગર, જોફ્રા આર્ચર અને રવિન્દ્ર જાડેજાએ શાનદાર બોલિંગ કરતા 2-2 વિકેટ ઝડપી હતી. સંજુ સેમસન (જે હવે CSK તરફથી રમી રહ્યો છે) અને કેપ્ટન ઋતુરાજ ગાયકવાડ સંપૂર્ણપણે ફ્લોપ રહ્યા હતા.
આ પણ વાંચો: NCSK ને મોટો ફટકો: સ્ટાર ખેલાડી મહેન્દ્ર સિંહ ધોની રહેશે બહાર,જાણો કારણ
