મહારાષ્ટ્રના જલગાંવના પરંડા રેલવે સ્ટેશન પર એક દુઃખદ અકસ્માત સર્જાયો છે. જણાવવામાં આવી રહ્યું છે કે પુષ્પક એક્સપ્રેસમાં આગ લાગવાની અફવા ફેલાઈ હતી, ત્યારબાદ યાત્રીઓમાં ગભરાટ ફેલાઈ ગયો હતો અને મુસાફરોએ ટ્રેનમાંથી છલાંગ લગાવી દીધી હતી. દરમિયાન બીજી બાજુથી આવતી કર્ણાટક એક્સપ્રેસે મુસાફરોને ટક્કર મારી હતી. કાપેલા મૃતદેહોના ટુકડા પાટા પર પડ્યા છે. તાજેતરની માહિતી અનુસાર, અકસ્માતમાં મૃતકોની સંખ્યા 11 થી વધીને 12 થઈ ગઈ છે અને ઘણા લોકો ઘાયલ થયા છે. તેમજ સીએમ દેવેન્દ્ર ફડણવીસે ટ્રેન દુર્ઘટનામાં માર્યા ગયેલા લોકોના પરિવારજનોને 5 લાખ રૂપિયાનું વળતર આપવાની જાહેરાત કરી છે.
અકસ્માત બાદ ઘટનાસ્થળે ચારે તરફ અરેરાટી પ્રસરી ગઈ છે. અકસ્માત બાદ સામે આવી રહેલી તસવીરોએ સૌને હચમચાવી દીધા છે. મોતનું આ ભયાનક દ્રશ્ય જોઈને લોકોના આત્મા કંપી ઉઠ્યા છે. અકસ્માત બાદ જે તસવીરો સામે આવી છે તે હેરાન કરનારી અને અત્યંત ડરામણી છે. તસવીરો અને વીડિયોમાં ટ્રેકની બંને બાજુ મૃતદેહોના ટુકડા પડેલા છે. જેને જોઈને પીડિત પરિવારના સભ્યો શોકમાં ગરકાવ થઈ ગયા છે.
ન્યૂઝ એજન્સીના જણાવ્યા અનુસાર જે જગ્યાએ અકસ્માત થયો છે ત્યાં એક તીવ્ર વળાંક છે. જેના કારણે બીજા ટ્રેક પર બેઠેલા મુસાફરોને ટ્રેન આવવાનો ખ્યાલ જ ન આવ્યો. આ કારણે મુસાફરો કર્ણાટક એક્સપ્રેસની અડફેટે આવી ગયા હતા.કહેવામાં આવી રહ્યું છે કે B4 બોગીના પૈડામાંથી ધુમાડો નીકળવા લાગ્યા બાદ પુષ્પક એક્સપ્રેસને રોકી દેવામાં આવી હતી. દરમિયાન ટ્રેનમાં આગ લાગી હોવાની અફવા ફેલાઈ હતી અને તેના કારણે ટ્રેનને રોકી દેવામાં આવી હતી. લોકો ઉતાવળમાં ટ્રેનમાંથી કૂદીને ટ્રેક પર આવી ગયા. તે જ સમયે મનમાડથી ભુસાવલ તરફ જતી કર્ણાટક એક્સપ્રેસ બીજા ટ્રેક પરથી પસાર થઈ હતી. કર્ણાટક એક્સપ્રેસે આ મુસાફરોને કચડી નાખ્યા હતા. જેમાં 11 લોકોના મોત થયા હતા.
દુર્ઘટના બાદ રેલવે અધિકારીઓએ જણાવ્યું કે આ ઘટના ત્યારે બની જ્યારે પુષ્પક એક્સપ્રેસમાં મુસાફરી કરી રહેલા મુસાફરોએ ટ્રેનના પૈડામાંથી નીકળતા ધુમાડાને કારણે ટ્રેનમાં આગ લાગવાની સંભાવનાથી બચવા માટે પાટા પર કૂદી પડ્યા. અને મુસાફરો અચાનક પાટા પર પહોંચી જતાં આ અકસ્માત થયો હતો.
8 એમ્બ્યુલન્સ સ્થળ પર છે
નાસિકના ડિવિઝનલ કમિશનર પ્રવીણ ગેદામે જણાવ્યું હતું કે કર્ણાટક એક્સપ્રેસ બાજુના ટ્રેક પરથી પસાર થઈ રહી હતી ત્યારે પુષ્પક એક્સપ્રેસના મુસાફરો ટ્રેક પર હતા. ટ્રેને મુસાફરોને કચડી નાખ્યા હતા. અમે સ્થળ પર છીએ. એડિશનલ એસપી, એસપી, કલેક્ટર અને દરેક જણ ઘટનાસ્થળે પહોંચી રહ્યા છે, અમે ડીઆરએમ અને રેલવે અધિકારીઓ સાથે સંકલન કરી રહ્યા છીએ. 8 એમ્બ્યુલન્સ ઘટનાસ્થળે પહોંચી ગઈ છે, વધારાની રેલ્વે રેસ્ક્યુ વાન અને રેલ્વે એમ્બ્યુલન્સ ઘટનાસ્થળે મોકલવામાં આવી રહી છે.
મુખ્યમંત્રીએ વળતરની જાહેરાત કરી
મુખ્યમંત્રી દેવેન્દ્ર ફડણવીસે જલગાંવ ટ્રેન દુર્ઘટનામાં માર્યા ગયેલા લોકોના પરિવારજનોને 5 લાખ રૂપિયાનું વળતર આપવાની જાહેરાત કરી છે. આ પહેલા તેમણે ટ્રેન દુર્ઘટના પર શોક વ્યક્ત કર્યો હતો અને ઘટનાને દુર્ભાગ્યપૂર્ણ ગણાવી હતી. સીએમએ કહ્યું, હું તેમને હૃદયપૂર્વક શ્રદ્ધાંજલિ અર્પણ કરું છું. મારા સાથી મંત્રી ગિરીશ મહાજન અને પોલીસ અધિક્ષક ઘટનાસ્થળે પહોંચી ગયા છે. સમગ્ર જિલ્લા પ્રશાસન રેલવે પ્રશાસન સાથે સંકલનમાં રહીને કામ કરી રહ્યું છે, હું જિલ્લા વહીવટીતંત્રના સંપર્કમાં છું
