અમેરિકાની સુપ્રીમ કોર્ટે મુંબઈ હુમલાના દોષિત તહવ્વુર રાણાના ભારત પ્રત્યાર્પણને મંજૂરી આપી દીધી છે. કોર્ટે આ કેસમાં તેમની દોષિત ઠરાવવામાં આવેલી રિવ્યુ પિટિશનને ફગાવી દીધી છે. પાકિસ્તાની મૂળના કેનેડિયન બિઝનેસમેન તહવ્વુર રાણા પર ભારતમાં 2008ના મુંબઈ આતંકવાદી હુમલામાં મુખ્ય ભૂમિકા ભજવવાનો આરોપ છે. ભારતે અમેરિકન એજન્સી સાથે વિગતો શેર કરી હતી, જે નીચલી કોર્ટ અને સુપ્રીમ કોર્ટમાં મૂકવામાં આવી હતી. કોર્ટે ભારતના આ પુરાવાનો સ્વીકાર કર્યો. ભારતે આપેલા દસ્તાવેજમાં 26/11ના હુમલામાં તહવ્વુરની ભૂમિકાનો ઉલ્લેખ કરવામાં આવ્યો હતો.
ભારત રાણાના પ્રત્યાર્પણની માંગ કરી રહ્યું હતું કારણ કે તે 2008ના મુંબઈ આતંકી હુમલાના કેસમાં વોન્ટેડ હતો. અગાઉ, તે સાન ફ્રાન્સિસ્કોમાં ઉત્તરીય સર્કિટ માટે યુએસ કોર્ટ ઓફ અપીલ્સ સહિત અનેક સંઘીય અદાલતોમાં કાનૂની લડાઈ હારી ચૂક્યો હતો.13 નવેમ્બરે તહવ્વુર રાણાએ યુએસ સુપ્રીમ કોર્ટમાં કેસની સમીક્ષા માટે અરજી કરી હતી. સુપ્રીમ કોર્ટે આ અરજી પર સુનાવણી કરવાનો ઇનકાર કર્યો હતો. તહવ્વુર રાણા હાલમાં લોસ એન્જલસના મેટ્રોપોલિટન ડિટેન્શન સેન્ટરમાં નજરકેદ છે.
કોણ છે તહવ્વુર રાણા?
મુંબઈ પોલીસે 26/11ના આતંકવાદી હુમલાના સંબંધમાં પોતાની ચાર્જશીટમાં તહવ્વુર રાણાનું નામ સામેલ કર્યું હતું. તેના પર પાકિસ્તાનની ગુપ્તચર સંસ્થા ઈન્ટર-સર્વિસીસ ઈન્ટેલિજન્સ (ISI) અને આતંકવાદી સંગઠન લશ્કર-એ-તૈયબાના સક્રિય સભ્ય તરીકે કામ કરવાનો આરોપ છે. ચાર્જશીટમાં રાણા પર 26/11ના આતંકી હુમલાના માસ્ટરમાઇન્ડ ડેવિડ કોલમેન હેડલીને મદદ કરવાનો આરોપ મૂકવામાં આવ્યો હતો. તહવ્વુર રાણાએ મુંબઈમાં જે સ્થળોએ હુમલા કરવાના હતા તેની તપાસ કરી હતી અને બ્લુ પ્રિન્ટ તૈયાર કરીને તેને પાકિસ્તાની આતંકવાદીઓને સોંપી હતી.
તહવ્વુર રાણા ડેવિડ હેડલીનો બાળપણનો મિત્ર છે
તહવ્વુર રાણા ડેવિડ કોલમેન હેડલી ઉર્ફે દાઉદ સઈદ ગિલાનીનો બાળપણનો મિત્ર છે. હેડલી અમેરિકન નાગરિક છે. તેની માતા અમેરિકન હતી અને ટીપા પાકિસ્તાની હતી. અમેરિકી સત્તાવાળાઓએ ઓક્ટોબર 2009માં તેની શિકાગોથી ધરપકડ કરી હતી. 24 જાન્યુઆરી, 2013ના રોજ હેડલીને મુંબઈ હુમલામાં તેની સંડોવણી બદલ દોષી ઠેરવ્યા બાદ યુએસ કોર્ટે તેને 35 વર્ષની જેલની સજા ફટકારી હતી. તહવ્વુર રાણાએ પાકિસ્તાનની હસન અબ્દાલ કેડેટ સ્કૂલમાં અભ્યાસ કર્યો હતો, જ્યાં હેડલીએ અમેરિકા શિફ્ટ થતા પહેલા 5 વર્ષ સુધી અભ્યાસ કર્યો હતો.
પાકિસ્તાની આર્મીમાં ડોક્ટર તરીકે કામ કર્યા બાદ તહવ્વુર રાણા કેનેડા શિફ્ટ થઈ ગયા અને થોડા વર્ષો પછી તેને કેનેડાની નાગરિકતા પણ મળી ગઈ. તેણે શિકાગોમાં ‘ફર્સ્ટ વર્લ્ડ ઈમિગ્રેશન સર્વિસિસ’ નામની કન્સલ્ટન્સી ફર્મ શરૂ કરી. રાણાની કંપનીની મુંબઈમાં એક શાખા પણ હતી, જેણે 26 નવેમ્બર, 2008ના રોજ પાકિસ્તાની આતંકવાદી સંગઠન લશ્કર-એ-તૈયબા (LeT)ના આતંકવાદીઓ દ્વારા નિશાન બનાવવામાં આવેલા મુંબઈના સ્થળોની તપાસ કરવામાં હેડલી કોલમેન હેડલીને મદદ કરી હતી.
પાકિસ્તાનના 10 આતંકવાદીઓએ મુંબઈમાં આતંક મચાવ્યો હતો
26 નવેમ્બર 2008ના રોજ લશ્કરના 10 આતંકવાદીઓ મોટી માત્રામાં દારૂગોળો અને શસ્ત્રો લઈને મુંબઈમાં દરિયાઈ માર્ગે પ્રવેશ્યા હતા. તેઓએ મુંબઈમાં 9 જગ્યાએ નરસંહાર કર્યો. આતંકવાદીઓ દ્વારા નિશાન બનાવવામાં આવેલ 8 સ્થળો – છત્રપતિ શિવાજી મહારાજ ટર્મિનસ, ઓબેરોય ટ્રાઇડન્ટ હોટેલ, તાજ હોટેલ, લિયોપોલ્ડ કાફે, કામા હોસ્પિટલ, નરીમન હાઉસ, મેટ્રો સિનેમા અને ટાઇમ્સ ઓફ ઇન્ડિયા બિલ્ડીંગ અને સેન્ટ ઝેવિયર્સ કોલેજની પાછળની ગલી. મુંબઈના બંદર વિસ્તાર મઝગાંવ અને વિલે પાર્લેમાં પણ ટેક્સીમાં વિસ્ફોટ થયો હતો.
28 નવેમ્બરની સવાર સુધીમાં, મુંબઈ પોલીસ અને સુરક્ષા દળોએ તાજ હોટલ સિવાયના તમામ સ્થળોને સુરક્ષિત કરી લીધા હતા. તાજ હોટલમાં છુપાયેલા આતંકવાદીઓને ખતમ કરવા માટે નેશનલ સિક્યુરિટી ગાર્ડ્સ (NSG)ની મદદ લેવી પડી હતી. એનએસજીએ 29 નવેમ્બરના રોજ ‘ઓપરેશન બ્લેક ટોર્નેડો’ શરૂ કર્યું, જે તાજ હોટેલમાં છેલ્લા બાકી રહેલા હુમલાખોરોના મૃત્યુ સાથે સમાપ્ત થયું અને મુંબઈમાં 72 કલાકના આતંકનો અંત આવ્યો. આ આતંકવાદી હુમલામાં 6 અમેરિકન નાગરિકો સહિત કુલ 166 લોકોના મોત થયા હતા અને 300થી વધુ લોકો ઘાયલ થયા હતા.
આ પણ વાંચો – મહાકુંભ માટે અમદાવાદથી બસની કરાઇ વ્યવસ્થા,માત્ર 8100માં ત્રણ દિવસનું ખાસ પેકેજ
