સમાજવાદી પાર્ટીના વરિષ્ઠ નેતા અને ઉત્તર પ્રદેશના પૂર્વ મંત્રી Azam Khan 23 મહિનાના જેલવાસ બાદ મુક્ત થયા છે. સફેદ કુર્તા-પાયજામા, કાળી જેકેટ અને આંખો પર કાળા ચશ્મા પહેરીને તેઓ સીતાપુર જેલની બહાર આવ્યા અને તરત જ પોતાના પુત્રો સાથે રામપુર જવા રવાના થયા. આ દરમિયાન મીડિયાએ તેમની સાથે વાત કરવાનો પ્રયાસ કર્યો, પરંતુ આઝમ ખાને કોઈ જવાબ આપ્યો ન હતો અને કારનો કાચ પણ નીચે ઉતાર્યો ન હતો.
Azam Khan ની મુક્તિને લઈને સમાજવાદી પાર્ટીના રાષ્ટ્રીય અધ્યક્ષ અખિલેશ યાદવે ખુશી વ્યક્ત કરતાં જણાવ્યું કે, “આજે તેમની સાથે ન્યાય થયો છે.” તેમણે આઝમ ખાનને સપા પરિવારના વરિષ્ઠ સભ્ય ગણાવ્યા અને કહ્યું કે સપાની સરકાર બનતા જ તેમના પરના તમામ ખોટા કેસ પાછા ખેંચી લેવામાં આવશે. બીજી તરફ, સપાના રાષ્ટ્રીય મહાસચિવ શિવપાલ સિંહ યાદવે પણ આઝમ ખાનની મુક્તિનું સ્વાગત કર્યું અને જણાવ્યું કે, “અદાલતે મુકદ્દમાઓમાં રાહત આપી છે, જેનું અમે સ્વાગત કરીએ છીએ. સમાજવાદી પાર્ટી તેમની પૂરી મદદ કરી રહી છે.”
Azam Khan ને જેલમાંથી લેવા માટે મંગળવારે સવારે સેંકડો સમર્થકો સાથે સપા સાંસદ રુચિ વીરા પણ સીતાપુર જેલ પહોંચ્યા હતા. શરૂઆતમાં સવારે 7 વાગ્યે તેમની મુક્તિની સંભાવના હતી, પરંતુ ચલણ જમા ન થતાં વિલંબ થયો અને બપોરે લગભગ 12 વાગ્યે તેઓ જેલની બહાર આવ્યા. જેલમાંથી બહાર નીકળતી વખતે તેઓ પોતાના પુત્રો અબ્દુલ્લા આઝમ અને અદીબ આઝમ સાથે રામપુર જવા રવાના થયા.
આઝમ ખાનના કાફલા પાછળ મીડિયાની ગાડીઓ પણ હતી, પરંતુ તેમણે કોઈની સાથે વાત કરી ન હતી. રામપુરના માર્ગો પર અને શહેરમાં પણ તેમના સમર્થકોએ ભવ્ય સ્વાગતની તૈયારીઓ કરી હતી.
આ પણ વાંચો: અમેરિકામાં હનુમાનજીની પ્રતિમાને લઇને વિવાદ, ભારતીય સમુદાયમાં ભારે રોષ
