મહેમદાવાદ રથયાત્રા: અષાઢી બીજના પવિત્ર દિવસે મહેમદાવાદના વાત્રક નદીના કિનારે આવેલા ભવ્ય સિદ્ધિવિનાયક મંદિરથી ઓપરેશન સિંદૂર થીમ આધારિત 21 કિલોમીટરની ભવ્ય રથયાત્રા સવારે 9 વાગ્યે પ્રસ્થાન કરશે. આ રથયાત્રાનું સંચાલન 130 નિવૃત્ત સૈનિકો દ્વારા કરવામાં આવશે, જેમાં મહેમદાવાદ તાલુકાના 52 ગામોના હજારો શ્રદ્ધાળુઓએ એક મુઠી મગ અભિયાન હેઠળ મગ દાન કરીને ભાગ લીધો છે. આ રથયાત્રાનું આયોજન ધર્મ રક્ષા સમિતિ અને સિદ્ધિવિનાયક સેવા સમિતિ દ્વારા કરવામાં આવ્યું છે.ઓપરેશન સિંદૂર થીમ આ રથયાત્રાને વિશેષ બનાવે છે, જે ધાર્મિક એકતા અને સમર્પણનું પ્રતીક છે. આ થીમ હેઠળ રથયાત્રા શાંતિ, ભક્તિ અને સમાજની એકતાનો સંદેશ ફેલાવશે. 130 નિવૃત્ત સૈનિકોનું સંચાલન આ યાત્રાને શિસ્તબદ્ધ અને સુરક્ષિત બનાવશે, જે દર્શાવે છે કે ધર્મ અને દેશભક્તિ એકબીજા સાથે જોડાયેલા છે.
મહેમદાવાદ રથયાત્રા: સિદ્ધિવિનાયક મંદિરના પ્રમુખ નરેન્દ્ર પુરોહિતએ જણાવ્યું કે, “રથયાત્રા સિદ્ધિવિનાયક મંદિરથી પ્રસ્થાન કરી ખાત્રજ ગામ અને ખાત્રજ ચોકડી થઈને મહેમદાવાદ શહેરમાં પ્રવેશ કરશે. મામેરાની વિધિ પૂર્ણ કર્યા બાદ રથયાત્રા પરંપરાગત રૂટ પરથી પસાર થઈને ફરી સિદ્ધિવિનાયક મંદિરે પરત ફરશે. આ યાત્રામાં હજારો શ્રદ્ધાળુઓ જોડાશે અને પ્રસાદ ગ્રહણ કરશે.
આ ભવ્ય રથયાત્રા મહેમદાવાદ શહેરની સાત પોળના લોકો દેસાઈ પોળ પાસે એકત્ર થઈને મોસાળામાં ભાગ લેશે. મોસાળાની વિધિ તપન ઠક્કર દ્વારા મામા તરીકે ફરજ નિભાવવામાં આવશે. આ વિધિ 12.30 કલાકે શરૂ થશે. રથયાત્રામાં 43 ભજન મંડળો ભક્તિમય ભજનો દ્વારા વાતાવરણને ધાર્મિક રંગે રંગશે. મહેમદાવાદ તાલુકાના હજારો લોકો સ્વયંસેવક તરીકે જોડાયા છે, જે આ યાત્રાને સફળ બનાવવા રાત-દિવસ પ્રયાસ કરી રહ્યા છે.
મહેમદાવાદ તાલુકાના 52 ગામોના લોકોએ એક મુઠી મગ અભિયાનમાં ઉત્સાહભેર ભાગ લઈને ધાર્મિક એકતા દર્શાવી છે. આ અભિયાન દ્વારા એકઠા થયેલા મગનો ઉપયોગ રથયાત્રા દરમિયાન પ્રસાદ તૈયાર કરવા અને ગરીબોમાં વહેંચવા માટે કરવામાં આવશે. શહેરની સાત પોળના લોકોની સહભાગિતા આ યાત્રાને સામૂહિક ઉત્સવનું રૂપ આપશે.આ રથયાત્રા માત્ર ધાર્મિક કાર્યક્રમ નથી, પરંતુ સમાજની એકતા અને શાંતિનો સંદેશ આપનારો મહોત્સવ છે. ધર્મ રક્ષા સમિતિ અને સિદ્ધિવિનાયક સેવા સમિતિના પ્રયાસો દ્વારા આ યાત્રા મહેમદાવાદના લોકો માટે ગૌરવની ક્ષણ બનશે. શ્રદ્ધાળુઓને આ યાત્રામાં જોડાવા અને ભક્તિના આ મહાસંગમનો લાભ લેવા આમંત્રણ છે. આ રથયાત્રામાં મહેમદાવાદના ધારાસભ્ય અર્જુન સિંહ ચૌહાણ, ખેડા જિલ્લાના સંસદ સભ્ય દેવુસિંહ ચૈાહાણ સહિતના મહાનુભવો પણ ઉપસ્થિત રહેશે.
