અમદાવાદ વિમાન દુર્ઘટના: અમદાવાદથી લંડન જઈ રહેલા એર ઇન્ડિયાના વિમાનમાં થયેલી દુઃખદ દુર્ઘટનામાં 241 સવાર લોકોના મોત થયા. આ દુર્ઘટનામાં જીવ ગુમાવનાર તમામ લોકોને ગુજરાત સમય તરફથી શ્રદ્ધાંજલિ. આ ઘટનામાં મહેમદાવાદના 20 વર્ષીય રૂદ્ર પટેલનું પણ અકાળે અવસાન થયું, જે ઉચ્ચ અભ્યાસ માટે લંડન જઈ રહ્યો હતો. આ હૃદયસ્પર્શી કહાણી રૂદ્ર પટેલની છે
રૂદ્ર પટેલ: એક હોશિયાર અને આજ્ઞાકારી પુત્ર હતો
અમદાવાદ વિમાન દુર્ઘટના: મૂળ વણસોલી ગામ, મહેમદાવાદ તાલુકાના રૂદ્ર પટેલનો પરિવાર છેલ્લા 20 વર્ષથી મહેમદાવાદની બાપુકાકા સોસાયટીમાં રહે છે. રૂદ્રએ નોલેજ સ્કૂલમાંથી ધોરણ 12ની પરીક્ષા ઉત્તીર્ણ કરી હતી અને ઉચ્ચ અભ્યાસ માટે લંડનની એક પ્રતિષ્ઠિત કોલેજમાં પ્રવેશ મેળવ્યો હતો. રૂદ્રના પિતા ચિરાગ પટેલ મહેમદાવાદની જાળીયા પ્રાથમિક શાળામાં અને માતા રૂદણ પ્રાથમિક શાળામાં શિક્ષક તરીકે ફરજ બજાવે છે. આ શિક્ષક દંપતીનો પુત્ર રૂદ્ર ભણવામાં હોશિયાર, આજ્ઞાકારી અને મહત્વાકાંક્ષી હતો.
એરપોર્ટ પર પરિવાર સાથે રૂદ્ર પટેલ
સપનાઓની ઉડાન
લંડનમાં એડમિશન મળ્યું હતું એ રૂદ્ર અને તેના પરિવાર માટે ખુશીની વાત હતી. રૂદ્ર ઘણીવાર કહેતો, “હું સેટ થઈ જઈશ, પછી મમ્મી-પપ્પા તમને ઇંગ્લેન્ડ લઈ જઈશ.” તેના સપના માત્ર પોતાના માટે નહીં, પરંતુ પરિવાર માટે પણ હતા. રૂદ્રનો એક નાનો ભાઈ પણ છે, જે માટે તે એક પ્રેરણાસ્ત્રોત હતો. લંડન જવાની તૈયારીઓ, નવા દેશમાં નવું જીવન શરૂ કરવાની ઉત્સુકતા અને પરિવારની ખુશીઓએ રૂદ્રના ચહેરા પર અલગ જ ચમક લાવી હતી.
પરંતુ નિયતિને કંઈક અલગ જ મંજૂર હતું. અમદાવાદથી લંડન જતું એર ઇન્ડિયાનું વિમાન દુર્ઘટનાનો શિકાર બન્યું, અને રૂદ્ર સહિત 241 મુસાફરોનું જીવન ખતમ થયું. આ ઘટનાએ રૂદ્રના પરિવાર અને સમગ્ર મહેમદાવાદને ઊંડો આઘાત આપ્યો. એક યુવાન, જેના સપના હજુ પાંખો ફેલાવવાની રાહ જોતા હતા, તેની જીવનયાત્રા અધવચ્ચે અટકી ગઈ.
રૂદ્રના પરિવાર માટે આ નુકસાન અસહ્ય છે. શિક્ષક દંપતી, જેમણે પોતાના પુત્રના ઉજ્જવળ ભવિષ્ય માટે અનેક આશાઓ સેવી હતી, તેમનું જીવન હવે શૂન્યમાં ડૂબી ગયું છે. રૂદ્રનો નાનો ભાઈ, જે તેને પોતાના આદર્શ તરીકે જોતો હતો, હવે એકલતા અનુભવે છે. મહેમદાવાદના સ્થાનિક સમુદાયમાં પણ આ ઘટનાએ શોકનું મોજું ફેલાવ્યું છે.
શ્રદ્ધાંજલિ
ગુજરાત સમય તરફથી રૂદ્ર પટેલ અને આ દુર્ઘટનામાં જીવ ગુમાવનાર તમામ લોકોને ભાવપૂર્ણ શ્રદ્ધાંજલિ. રૂદ્રની આશાઓ, તેની મહેનત અને તેના પરિવારના સપના કદાચ અધૂરા રહ્યા, પરંતુ તેની યાદો હંમેશા જીવંત રહેશે
