Manipur violence – મણિપુરમાં શનિવારે સુરક્ષા દળો અને કુકી વિરોધીઓ વચ્ચે હિંસક અથડામણમાં એક પ્રદર્શનકારીનું મોત થયું હતું. સુરક્ષા દળોએ દેખાવકારો પર લાઠીચાર્જ કર્યો અને ટીયર ગેસના શેલ છોડ્યા. પ્રદર્શનમાં મોટી સંખ્યામાં મહિલાઓએ સુરક્ષા દળોનો સામનો કર્યો હતો. આ ઘટના ત્યારે બની જ્યારે કેન્દ્ર સરકાર દ્વારા રાજ્યમાં મુક્ત અવરજવર સુનિશ્ચિત કરવાના આદેશો હેઠળ મોકલવામાં આવેલ બસોનો કાફલો રાજધાની ઇમ્ફાલથી અન્ય જિલ્લાઓ તરફ રવાના થયો હતો.
Manipur violence – મહિલાઓએ હાઈવે બ્લોક કર્યો, પોલીસે લાઠીચાર્જ કર્યો
આ એક યોગાનુયોગ છે કે જ્યારે આખો દેશ મહિલા દિવસની ઉજવણીમાં વ્યસ્ત હતો, ત્યારે ઉત્તર-પૂર્વીય શહેર ઇમ્ફાલથી 45 કિલોમીટર દૂર કાંગપોકપીમાં મોટી સંખ્યામાં મહિલાઓ પોતાના અધિકારની માંગ સાથે રસ્તા પર ઉતરી આવી હતી. બસોને રોકવા માટે આ મહિલાઓએ હાઈવે બ્લોક કરી દીધો હતો. મોટી સંખ્યામાં મહિલા પ્રદર્શનકારીઓને રસ્તા પરથી હટાવવા માટે, સુરક્ષા દળોએ ટીયર ગેસના શેલ છોડ્યા અને લાઠીચાર્જનો આશરો લીધો, પરંતુ ભીડે બસોને આગળ વધવા દીધી નહીં.
પોલીસ બળના ઉપયોગથી નારાજ કેટલાક પ્રદર્શનકારીઓએ પથ્થરમારો શરૂ કર્યો હતો. કેટલાક વાહનોમાં તોડફોડ કરી અને બસને આગ ચાંપી દીધી. આ પછી સુરક્ષાદળોએ કડકતા દાખવીને ગોળીબાર કર્યો હતો. આ અથડામણમાં મોટી સંખ્યામાં આંદોલનકારીઓ અને પોલીસકર્મીઓ ઘાયલ થયા હતા. બે પોલીસકર્મીઓની હાલત નાજુક હોવાનું કહેવાય છે. બીજી તરફ, કુકી સિવિલ સોસાયટીના જૂથોએ દાવો કર્યો છે કે ગોળીઓના કારણે એક યુવકનું મોત થયું છે.
સુરક્ષા દળોની કાર્યવાહીથી કુકી સમુદાયમાં ભારે રોષ જોવા મળી રહ્યો છે. કુકી-ઝો કાઉન્સિલ (KZC) એ અસરગ્રસ્ત વિસ્તારોમાં અનિશ્ચિત સમય માટે બંધની જાહેરાત કરી છે. KZCના ચેરમેન હેનલિઆન્થાંગ થંગલેટે જણાવ્યું હતું કે જ્યાં સુધી કુકી-જો સમુદાય માટે રાજકીય ઉકેલ ન મળે ત્યાં સુધી સરકારની ‘ફ્રી મૂવમેન્ટ’ યોજનાનો વિરોધ ચાલુ રહેશે. તેમણે એમ પણ કહ્યું હતું કે અમે મેઇતેઈ સમુદાયના લોકોને બફર ઝોન પાર કરવાની બાંયધરી આપી શકતા નથી અને કોઈપણ અનિચ્છનીય ઘટનાની જવાબદારી લઈશું નહીં.
