ભારતના મુખ્ય ન્યાયાધીશ (CJI) ડીવાય ચંદ્રચુડે રવિવારે કહ્યું કે તેમણે રામ જન્મભૂમિ-બાબરી મસ્જિદ વિવાદના નિરાકરણ માટે ભગવાનને પ્રાર્થના કરી અને કહ્યું કે જો કોઈને વિશ્વાસ હશે તો ભગવાન ઉકેલ શોધી કાઢશે. તેઓ પુણેના ખેડ તાલુકાના તેમના મૂળ ગામ કંહેરસરના રહેવાસીઓને સંબોધિત કરી રહ્યા હતા, જ્યાં તેમનું સન્માન કરવામાં આવ્યું હતું. CJI ચંદ્રચુડે કહ્યું, “ઘણીવાર અમારી પાસે મામલા હોય છે, પરંતુ અમે ઉકેલ સુધી પહોંચી શકતા નથી. આવું જ કંઈક અયોધ્યા (રામ જન્મભૂમિ-બાબરી મસ્જિદ વિવાદ) દરમિયાન થયું હતું, જે ત્રણ મહિનાથી મારી સામે હતું.
ભગવાનની સામે બેસીને...
CJI ચંદ્રચુડે વધુમાં કહ્યું કે હું ભગવાનની સામે બેઠો હતો અને તેમને કહ્યું હતું કે તમારે ઉકેલ શોધવો પડશે. તેઓ નિયમિતપણે પૂજા કરે છે તેમ જણાવતા CJIએ કહ્યું, “મારા પર વિશ્વાસ કરો, જો તમને વિશ્વાસ હશે, તો ભગવાન હંમેશા માર્ગ શોધી કાઢશે.” 9 નવેમ્બર, 2019 ના રોજ, ભારતના તત્કાલિન મુખ્ય ન્યાયાધીશ રંજન ગોગોઈની આગેવાની હેઠળની સર્વોચ્ચ અદાલતની પાંચ જજોની બેંચે અયોધ્યામાં રામ મંદિરના નિર્માણનો માર્ગ મોકળો કરતા એક સદી કરતાં પણ વધુ જૂના વિવાદાસ્પદ મુદ્દાનું સમાધાન કર્યું હતું.
ચંદ્રચુડ ઐતિહાસિક ચુકાદો આપનારી બેન્ચનો ભાગ હતા
બેન્ચે એવો પણ ચુકાદો આપ્યો હતો કે અયોધ્યામાં જ વૈકલ્પિક પાંચ એકર જમીન પર મસ્જિદ બનાવવામાં આવશે. CJI ચંદ્રચુડ એ ઐતિહાસિક ચુકાદો આપનારી બેન્ચનો ભાગ હતા. યોગાનુયોગ, CJIએ આ વર્ષે જુલાઈમાં અયોધ્યામાં રામ મંદિરની મુલાકાત લીધી હતી અને પૂજા કરી હતી. આ વર્ષે જાન્યુઆરીમાં રામ મંદિરમાં રામ લલ્લાનો અભિષેક કાર્યક્રમ યોજાયો હતો, જેમાં પીએમ મોદી, સીએમ યોગી આદિત્યનાથ સહિત અનેક લોકોએ ભાગ લીધો હતો.
આ પણ વાંચો- કાશ્મીરમાં ફરી આતંકી હુમલો, ડોક્ટર સહિત 6 લોકોના મોત, પાંચ ઘાયલ
