અમદાવાદ ક્રાઇમ બ્રાન્ચે એક મોટી કાર્યવાહીમાં 23 જેટલા ગંભીર ગુનાઓમાં વોન્ટેડ કુખ્યાત આરોપી મોહંમદસિકંદર ભાડભુંજાને ઝડપી પાડ્યો છે. આ આરોપી હત્યાનો પ્રયાસ (ખૂનની કોશિશ), લૂંટ, ઘરફોડ, મારામારી અને દારૂના વેચાણ (પ્રોહિબિશન) જેવા અનેક ગુનાઓમાં લાંબા સમયથી સંડોવાયેલો હતો. તેની ધરપકડ બાદ પોલીસે તેની પાસેથી 2 દેશી પિસ્તોલ (તમંચા) અને 4 જીવંત કારતુસ સહિત કુલ ₹16,600 નો મુદ્દામાલ જપ્ત કર્યો છે.
આજે સવારે આશરે 8 વાગ્યાની આસપાસ ક્રાઇમ બ્રાન્ચની ટીમને બાતમી મળી હતી. ગુપ્ત માહિતીના આધારે ટીમ બાપુનગર વિસ્તારમાં આવેલી મણીલાલની ચાલી પાસેના જાહેર રસ્તા પર ગોઠવાઈ ગઈ હતી. ટીમે તુરંત ટ્રેપ લગાવીને વોન્ટેડ આરોપી મોહંમદસિકંદર (ઉંમર 32 વર્ષ)ને ઘટનાસ્થળેથી જ દબોચી લીધો હતો. તપાસ દરમિયાન તેની પાસેથી ગેરકાયદેસર હથિયારો મળી આવતાં આર્મ્સ એક્ટ હેઠળ પણ ગુનો નોંધવામાં આવ્યો છે.
હથિયાર રાખવા પાછળનું કારણ ખૂલ્યું:
પ્રાથમિક પૂછપરછમાં આરોપીએ કબૂલ્યું હતું કે, તેના ભાઈ તનવીરના હત્યા કેસમાં સલમાન શેખને આજીવન કેદની સજા થયા બાદ તે પેરોલ પર જેલમાંથી બહાર આવ્યો હતો. સલમાન શેખ દ્વારા ફરી હુમલો કરવામાં આવશે તેવા ડરથી, મોહંમદસિકંદરે સુરક્ષા માટે એક વર્ષ પહેલાં ઉત્તર પ્રદેશ (યુપી) થી આ હથિયારો ખરીદ્યા હતા અને તેને અમદાવાદ લાવીને છુપાવી રાખ્યા હતા.
ક્રાઇમ બ્રાન્ચના પીઆઇ એસ. જે. જાડેજાએ જણાવ્યું, “મોહંમદસિકંદર ખુનની કોશિશ, લૂંટ અને પ્રોહિબિશન જેવા 23 ગંભીર ગુનાઓમાં વોન્ટેડ હતો. તેની ધરપકડથી અમદાવાદ શહેરમાં અપરાધી તત્વોને મજબૂત સંદેશ મળશે.” આરોપીને કોર્ટમાં રજૂ કરવામાં આવશે અને વધુ પૂછપરછ દરમિયાન તેની અન્ય ગુનાઓમાં સંડોવણી અંગેના રહસ્યો પણ સામે આવી શકે છે. આ સફળતા ક્રાઇમ બ્રાન્ચની સઘન સર્વેલન્સ અને ગુપ્ત માહિતી એકત્રિત કરવાની પ્રક્રિયાનું પરિણામ છે.
આ પણ વાંચો: પ્રખ્યાત કવિત્રી સોનલ ઓડદરાના કવિતા સંગ્રહ “જીવન કી રાહે” નું અમદાવાદમાં કરાયું વિમોચન!
