Income Tax Slab: નાણામંત્રી નિર્મલા સીતારમણે આજે રજૂ કરેલા બજેટમાં મધ્યમ વર્ગના કરદાતાઓ માટે આશ્ચર્યજનક જાહેરાતો કરી છે. વર્ષોથી ચાલી આવતી જટિલ ટેક્સ પ્રક્રિયાને હવે અલવિદા કહેવાનો સમય આવી ગયો છે. સરકારે માત્ર ટેક્સમાં રાહત જ નહીં, પણ ટેક્સ ભરવાની રીતને પણ સંપૂર્ણપણે બદલી નાખી છે.
Income Tax Slab: 1. નવો ઇન્કમ ટેક્સ એક્ટ: 6 દાયકા જૂની વ્યવસ્થાનો અંત
નાણામંત્રીએ જાહેરાત કરી છે કે ‘નવો ઇન્કમ ટેક્સ એક્ટ’ આ જ વર્ષથી અમલમાં આવશે. અત્યાર સુધી આપણે ૧૯૬૧ના જૂના કાયદા મુજબ ટેક્સ ભરતા હતા, જે ખૂબ જ જટિલ અને વિવાદોથી ભરેલો હતો.
સરળતા: આ નવા એક્ટનો હેતુ કાયદાની ભાષાને સરળ બનાવવાનો છે જેથી સામાન્ય માણસ પોતે પણ સમજી શકે.
ડિજિટલ ફર્સ્ટ: નવી વ્યવસ્થામાં કાગળની કાર્યવાહી નહિવત્ થઈ જશે અને આખી પ્રક્રિયા ‘ફેસલેસ’ અને પારદર્શક બનશે.
વિવાદોમાં ઘટાડો: જૂના કાયદામાં અર્થઘટનની જે મુશ્કેલીઓ હતી તે દૂર થવાથી ટેક્સપેયર્સ અને સરકાર વચ્ચેના કોર્ટ કેસોમાં ઘટાડો થશે.
2. ITR ફાઇલિંગ: હવે છેલ્લી ઘડીનો ધસારો ભૂલી જાઓ
અત્યાર સુધી ૩૧ જુલાઈ આવતા જ ઇન્કમ ટેક્સનું પોર્ટલ હેંગ થઈ જતું હતું અને કરોડો લોકો એકસાથે રિટર્ન ભરતા હતા. હવે સરકારે આ સમસ્યાનો કાયમી ઉકેલ લાવ્યો છે:
કેટેગરી મુજબ ડેડલાઇન: હવે ટેક્સપેયર્સની શ્રેણી મુજબ અલગ-અલગ તારીખો નક્કી થશે. દાખલા તરીકે, પગારદાર વર્ગ (ITR-1 અને 2) માટે એવી રીતે વ્યવસ્થા ગોઠવાશે કે તેઓ ૩૧ જુલાઈ સુધી કોઈ પણ ટેકનિકલ અવરોધ વગર રિટર્ન ભરી શકે.
ઝડપી રિફંડ: લોડ વહેંચાઈ જવાથી ઇન્કમ ટેક્સ વિભાગ ડેટા પ્રોસેસિંગ ઝડપથી કરી શકશે, પરિણામે કરદાતાઓના ખાતામાં રિફંડ વહેલા જમા થશે.
3. વિદેશ પ્રવાસ હવે ‘બજેટ’માં: TCSમાં 90% સુધીનો ઘટાડો
જો તમે વિદેશ ફરવાના શોખીન છો, તો આ બજેટ તમારા માટે લોટરી સમાન છે.
ભારતીય પ્રવાસીઓને ફાયદો: અત્યાર સુધી વિદેશી ટૂર પેકેજ પર ૫% થી લઈને ૨૦% સુધીનો TCS (Tax Collected at Source) કાપવામાં આવતો હતો. જેનો અર્થ એ હતો કે ₹૫ લાખના પેકેજ પર તમારે ₹૧ લાખ તો વધારાના ટેક્સ પેટે જમા કરાવવા પડતા હતા.
નવો દર માત્ર 2%: સરકારે આ દર ઘટાડીને સીધો ૨% કરી દીધો છે. સૌથી મોટી વાત એ છે કે આમાં કોઈ ‘અપર લિમિટ’ નથી. તમે ભલે ₹૧૦ લાખનું પેકેજ લો, તમારે માત્ર ૨% જ ટેક્સ આપવો પડશે. આનાથી મધ્યમ વર્ગના પરિવારો માટે વિદેશ યાત્રા ઘણી સસ્તી થઈ જશે.
સામાન્ય જનતા પર શું અસર થશે?
આ બજેટથી સરકારનો ઈરાદો સ્પષ્ટ છે: “ટેક્સપેયર્સનું સન્માન અને સુવિધા”. નવો એક્ટ લાગુ થવાથી મધ્યમ વર્ગને કાયદાકીય ગૂંચવણોમાંથી મુક્તિ મળશે અને પ્રવાસન ક્ષેત્રે TCS ઘટવાથી અર્થતંત્રમાં નાણાંનું પરિભ્રમણ વધશે.
