સુપ્રીમ કોર્ટ કોલેજિયમમાં મોટો ફેરફાર: જસ્ટિસ પી.એસ. નરસિમ્હા બન્યા નવા સભ્ય, જજોની નિમણૂકમાં ભજવશે મહત્વની ભૂમિકા

Justice PS Narasimha : દેશની સર્વોચ્ચ અદાલત એટલે કે સુપ્રીમ કોર્ટના જજોની નિમણૂક અને બદલીનો નિર્ણય લેતી મહત્વપૂર્ણ ‘સુપ્રીમ કોર્ટ કોલેજિયમ’માં એક મોટો બદલાવ આવ્યો છે. રવિવારે જસ્ટિસ જે.કે. મહેશ્વરીના નિવૃત્ત થયા બાદ, સુપ્રીમ કોર્ટના જસ્ટિસ પી.એસ. નરસિમ્હા કોલેજિયમના નવા અને પાંચમા સભ્ય બનવા જઈ રહ્યા છે. કોલેજિયમમાં પાંચમા સૌથી વરિષ્ઠ જજ હોવાના નાતે જસ્ટિસ નરસિમ્હા તેમના નિવૃત્તિ સુધી આ સમિતિનો હિસ્સો રહેશે.

Justice PS Narasimha : કોલેજિયમની નવી રચના

આ ફેરફાર બાદ હવે સુપ્રીમ કોર્ટ કોલેજિયમમાં નીચે મુજબના જજોનો સમાવેશ થાય છે:

• ચીફ જસ્ટિસ ઓફ ઈન્ડિયા (CJI)

• જસ્ટિસ સૂર્યકાંત

• જસ્ટિસ વિક્રમ નાથ

• જસ્ટિસ બી.વી. નાગરત્ના

• જસ્ટિસ એમ.એમ. સુંદરેશ

• જસ્ટિસ પી.એસ. નરસિમ્હા

Justice PS Narasimha : શું છે સુપ્રીમ કોર્ટ કોલેજિયમ?

કોલેજિયમ સિસ્ટમની શરૂઆત વર્ષ ૧૯૯૩માં સુપ્રીમ કોર્ટના એક ચુકાદા બાદ કરવામાં આવી હતી. આ વ્યવસ્થા હેઠળ, સુપ્રીમ કોર્ટના પાંચ સૌથી વરિષ્ઠ જજોની બનેલી સમિતિ સુપ્રીમ કોર્ટ અને ૨૫ હાઈકોર્ટમાં જજોની નિમણૂક, ટ્રાન્સફર અને પ્રમોશન માટે સરકારને ભલામણ કરે છે. નિયમ મુજબ, સરકાર કોલેજિયમની ભલામણને એકવાર પુનઃવિચારણા માટે પાછી મોકલી શકે છે, પરંતુ જો કોલેજિયમ પોતાની ભલામણ ફરીથી મોકલે, તો સરકારે સામાન્ય રીતે તેનો સ્વીકાર કરવો પડે છે.

કોણ છે જસ્ટિસ પી.એસ. નરસિમ્હા?

જસ્ટિસ નરસિમ્હાનું જીવન અને તેમની કારકિર્દી અત્યંત પ્રભાવશાળી રહી છે:

• જન્મ અને શિક્ષણ: ૩ મે, ૧૯૬૩ના રોજ હૈદરાબાદમાં જન્મેલા જસ્ટિસ નરસિમ્હાએ હૈદરાબાદના નિઝામ કોલેજમાંથી અર્થશાસ્ત્ર, રાજ્યશાસ્ત્ર અને પબ્લિક એડમિનિસ્ટ્રેશનમાં ગ્રેજ્યુએશન કર્યું છે. ત્યારબાદ ૧૯૮૮માં દિલ્હી યુનિવર્સિટીના કેમ્પસ લો સેન્ટરથી તેમણે કાયદાનો અભ્યાસ પૂર્ણ કર્યો.

• વકીલાત: કારકિર્દીની શરૂઆતમાં તેમણે હૈદરાબાદની વિવિધ અદાલતોમાં પ્રેક્ટિસ કરી અને ત્યારબાદ સુપ્રીમ કોર્ટમાં પોતાની વકીલાત શરૂ કરી.

• સિનિયર એડવોકેટ: વર્ષ ૨૦૦૮માં સુપ્રીમ કોર્ટની ફૂલ કોર્ટે તેમને ‘સિનિયર એડવોકેટ’નો દરજ્જો આપ્યો હતો. તેમણે બંધારણીય, વહીવટી અને પર્યાવરણીય મુદ્દાઓ પર અનેક મહત્વપૂર્ણ કેસ લડ્યા છે.

• અનુભવ: વર્ષ ૨૦૧૪માં તેમની નિમણૂક ભારતના ‘એડિશનલ સોલિસિટર જનરલ’ તરીકે કરવામાં આવી હતી. આ દરમિયાન તેમણે NJAC જેવા અત્યંત સંવેદનશીલ કેસમાં કાયદાકીય અધિકારી તરીકે કોર્ટને મહત્વનું માર્ગદર્શન પૂરું પાડ્યું હતું.

આ પણ વાંચો: PM મોદીને સેશેલ્સનો સર્વોચ્ચ સન્માન, ‘ગાર્ડિયન ઓફ ધ બ્લૂ હોરાઈઝન’ એનાયત