Rajya Sabha Election 2026 : ભારતના ચૂંટણી પંચે ૧૦ રાજ્યોમાં ખાલી થઈ રહેલી રાજ્યસભાની ૩૭ બેઠકો માટે દ્વિવાર્ષિક ચૂંટણીના કાર્યક્રમની જાહેરાત કરી છે. આ બેઠકો આગામી એપ્રિલ મહિનામાં સભ્યોનો કાર્યકાળ પૂર્ણ થવાને કારણે ખાલી પડી રહી છે. ચૂંટણી પંચના જણાવ્યા અનુસાર, આ બેઠકો માટે ૧૬ માર્ચ ૨૦૨૬ ના રોજ મતદાન પ્રક્રિયા હાથ ધરવામાં આવશે અને તે જ દિવસે સાંજે પરિણામ જાહેર કરી દેવામાં આવશે.
Rajya Sabha Election 2026: રાજ્યવાર ખાલી પડતી બેઠકોની વિગત
ચૂંટણી પંચ દ્વારા જાહેર કરાયેલી યાદી મુજબ, સૌથી વધુ મહારાષ્ટ્રની ૭ બેઠકો પર ચૂંટણી યોજાશે. આ ઉપરાંત તમિલનાડુની ૬, પશ્ચિમ બંગાળની ૫, બિહારની ૫, ઓડિશાની ૪, આસામની ૩ અને તેલંગાણા, હરિયાણા તેમજ છત્તીસગઢની ૨-૨ બેઠકોનો સમાવેશ થાય છે. જ્યારે હિમાચલ પ્રદેશની ૧ બેઠક માટે પણ મતદાન યોજાશે. ઉલ્લેખનીય છે કે રાજ્યસભા એ કાયમી ગૃહ છે, જેમાં દર બે વર્ષે એક તૃતીયાંશ સભ્યો નિવૃત્ત થાય છે અને નવી ચૂંટણી યોજાય છે.
ચૂંટણીનો સંપૂર્ણ કાર્યક્રમ
રાજ્યસભાની આ ચૂંટણી પ્રક્રિયા માટેનું સત્તાવાર જાહેરનામું (Notification) ૨૬ ફેબ્રુઆરી ૨૦૨૬ ના રોજ પ્રસિદ્ધ કરવામાં આવશે. ઉમેદવારી પત્રો ભરવાની છેલ્લી તારીખ ૫ માર્ચ નક્કી કરવામાં આવી છે. ફોર્મની ચકાસણી ૬ માર્ચે થશે, જ્યારે ૯ માર્ચ સુધીમાં ઉમેદવારો પોતાનું નામ પરત ખેંચી શકશે. ૧૬ માર્ચે સવારે ૯ થી સાંજે ૪ વાગ્યા સુધી મતદાન યોજાશે અને સાંજે ૫ વાગ્યાથી મતગણતરી શરૂ કરવામાં આવશે. સમગ્ર ચૂંટણી પ્રક્રિયા ૨૦ માર્ચ સુધીમાં પૂર્ણ કરી લેવામાં આવશે.
મહત્વના નેતાઓ થશે નિવૃત્ત
આ ચૂંટણીમાં ઘણા દિગ્ગજ નેતાઓનો કાર્યકાળ પૂર્ણ થઈ રહ્યો છે. મહારાષ્ટ્રમાંથી શરદ પવાર, રામદાસ અઠાવલે અને પ્રિયંકા ચતુર્વેદી જેવા મોટા નામ નિવૃત્ત થઈ રહ્યા છે. બિહારમાંથી હરિવંશ નારાયણ સિંહ અને ઉપેન્દ્ર કુશવાહા, જ્યારે તેલંગાણામાંથી અભિષેક મનુ સિંઘવીનો કાર્યકાળ પણ પૂર્ણ થઈ રહ્યો છે. આ ચૂંટણીના પરિણામો આગામી સમયમાં ઉચ્ચ ગૃહમાં રાજકીય પક્ષોના સંખ્યાબળ પર મોટી અસર પાડશે.
આ પણ વાંચો: ગુજરાતનું ₹4.08 લાખ કરોડનું ઐતિહાસિક બજેટ, 10 મહત્વની જાહેરાત
