.રાષ્ટ્રીય સ્વયંસેવક સંઘ (RSS) ના વડા Mohan Bhagwat એ નાગપુરમાં વિજયાદશમી નિમિત્તે દેશને સંબોધિત કરતા આત્મસન્માન, એકતા અને રાષ્ટ્રીય ઓળખના મહત્વ પર વિશેષ ભાર મૂક્યો હતો. તેમણે સ્પષ્ટપણે જણાવ્યું હતું કે ભારતને મજબૂત બનાવવા માટે આપણા ઇતિહાસ અને સ્વભાવને સમજવો જરૂરી છે. શાસન પરિવર્તન અંગે વાત કરતા તેમણે કહ્યું કે માત્ર સત્તા કે શાસન બદલવાથી પરિસ્થિતિ બદલાતી નથી; આવું પહેલાં પણ નથી થયું અને આજે પણ નથી થઈ રહ્યું. સ્વાર્થી શક્તિઓ અને તેમના કઠપૂતળીઓ હજુ પણ દરેક જગ્યાએ પ્રભુત્વ ધરાવે છે.
Mohan Bhagwat એ ચેતવણી આપી
વધુમાં, Mohan Bhagwat એ ચેતવણી આપી હતી કે વિશ્વમાં કેટલીક શક્તિઓ પોતાના સ્વાર્થ માટે કામ કરી રહી છે અને ઉભરતા ભારતની તાકાત તેમના માટે એક મોટો પડકાર બની રહી છે. આ જ કારણસર આજે ભારત, હિન્દુ સમાજ અને રાષ્ટ્રીય સ્વયંસેવક સંઘને નિશાન બનાવીને તોડવાના ષડયંત્રો રચાઈ રહ્યા છે.
સંઘના વડાએ ભૂતકાળને યાદ કરતા કહ્યું કે વિવિધતાથી ભરેલો આપણો દેશ પ્રાચીન કાળથી એક રાષ્ટ્ર રહ્યો છે. પરંતુ, આત્મીયતા ભૂલવાને કારણે આપણે વિભાજિત થયા અને સદીઓ સુધી ગુલામી સહન કરવી પડી. આજે અનેક મહાપુરુષોના બલિદાન પછી આપણે ફરી એકતાના માર્ગે છીએ. જો દેશે એકતાપૂર્વક આગળ વધવું હોય, તો તમામ વિવિધતાઓનો સ્વીકાર અને આદર કરવો એ જ આપણો મૂળભૂત સિદ્ધાંત હોવો જોઈએ.
