Tiger Shroff Firing Case: બોલિવૂડના જાણીતા એક્શન હીરો ટાઈગર શ્રોફની કાર પર મુંબઈના પોશ એવા જુહુ વિસ્તારમાં 18 ઓક્ટોબરની સાંજે થયેલા ફાયરિંગની ઘટનામાં દિલ્હી પોલીસની સ્પેશિયલ સેલે અત્યંત મહત્વપૂર્ણ કાર્યવાહી કરી છે. આ જીવલેણ હુમલામાં સદ્ભાગ્યે ટાઈગર શ્રોફનો આબાદ બચાવ થયો હતો, પરંતુ ઘટનાસ્થળે હાજર તેમના ડ્રાઈવર સહિત બે લોકો ઇજાગ્રસ્ત થયા હતા. આ હાઇપ્રોફાઇલ કેસમાં હવે દિલ્હી પોલીસની ટીમે હથિયાર સપ્લાય કરનાર બે મહિલાઓ સહિત કુલ ચાર વધુ આરોપીઓની ધરપકડ કરી લીધી છે.
Tiger Shroff Firing Case: હુમલા માટે હથિયારો કઈ રીતે પહોંચ્યા મુંબઈ?
દિલ્હી પોલીસે પકડેલા આ ચાર આરોપીઓની ઓળખ 21 વર્ષીય કુણાલ, 19 વર્ષીય સુમિત, 23 વર્ષીય રાધા અને 23 વર્ષીય બબીતા તરીકે કરવામાં આવી છે. પોલીસની પ્રાથમિક તપાસમાં ખુલાસો થયો છે કે, લોરેન્સ બિશ્નોઈ ગેંગ સાથે સંકળાયેલા મનાતા અનિલ પંડિતના સીધા નિર્દેશ પર આ સમગ્ર કાવતરું ઘડાયું હતું. આરોપી કુણાલે પંજાબના અમૃતસરથી એક પિસ્તોલ અને 20 કારતૂસની વ્યવસ્થા કરી હતી. ત્યારબાદ કોઈને શંકા ન જાય તે માટે કુણાલે આ હથિયારો રાધા અને બબીતાને સોંપ્યા હતા, જેઓ ટ્રેન મારફતે છૂપાવીને આ હથિયારો મુંબઈ સુધી લઈ ગઈ હતી.
હુમલાને અંજામ આપ્યા બાદ બંને મહિલાઓ પરત ફરી રહી હતી, ત્યારે 20 ઓક્ટોબરના રોજ નવી દિલ્હી રેલવે સ્ટેશન પરથી તેમની ધરપકડ કરવામાં આવી હતી. જ્યારે અન્ય બે આરોપીઓ કુણાલ અને સુમિતને હરિયાણાના સોનીપતથી ઝડપી લેવામાં આવ્યા છે. દિલ્હી પોલીસે ચારેયને કોર્ટમાં રજૂ કર્યા હતા, જ્યાં મુંબઈ પોલીસની માંગણીને પગલે અદાલતે તમામ આરોપીઓના ત્રણ દિવસના ટ્રાન્ઝિટ રિમાન્ડ મંજૂર કર્યા છે, જેથી તેમને વધુ પૂછપરછ માટે મુંબઈ લઈ જઈ શકાય.
અત્રે ઉલ્લેખનીય છે કે, આ હાઈપ્રોફાઈલ ફાયરિંગ કેસમાં અગાઉ રાજસ્થાનના કોટા રેલવે સ્ટેશનથી પણ ત્રણ આરોપીઓની ધરપકડ કરાઈ ચૂકી છે. હાલ મુંબઈ પોલીસ તમામ આરોપીઓની કસ્ટડી મેળવીને અનિલ પંડિત અને લોરેન્સ બિશ્નોઈ ગેંગ સાથેના તાર જોડવા તથા હુમલાનું મુખ્ય કારણ જાણવા માટે ઊંડાણપૂર્વક તપાસ ચલાવી રહી છે.
