બોમ્બ ઉડાવવાની ધમકી: દિલ્હી, કર્ણાટક અને ગુજરાતમાં શાળાઓને બોમ્બ ધમકીઓ મળ્યા બાદ હવે ગુજરાતના મુખ્ય પ્રધાન કાર્યાલય (CMO), કલેક્ટર કચેરીઓ અને અન્ય મહત્વની સરકારી કચેરીઓને બોમ્બથી ઉડાવી દેવાની ધમકીભર્યા ઈ-મેઈલ મળ્યા છે. આ ઘટનાએ રાજ્યના સુરક્ષા તંત્રમાં ખળભળાટ મચાવી દીધો છે. પોલીસે આ ધમકીઓને ગંભીરતાથી લઈને યુદ્ધના ધોરણે તપાસ શરૂ કરી છે.
બોમ્બ ઉડાવવાની ધમકી: આ ધમકીભર્યા ઈ-મેઈલમાં ગુજરાતના મુખ્ય પ્રધાન કાર્યાલય, કલેક્ટર કચેરીઓ અને અન્ય મહત્વની સરકારી કચેરીઓને વિસ્ફોટકો દ્વારા ઉડાવી દેવાની ચેતવણી આપવામાં આવી છે. ખાસ વાત એ છે કે, આ ઈ-મેઈલમાં તામિલનાડુના પત્રકારો અને રાજકીય હસ્તીઓનો ઉલ્લેખ પણ કરવામાં આવ્યો છે, જે આ ઘટનાને વધુ જટિલ બનાવે છે. સૂત્રોના જણાવ્યા પ્રમાણે, ઈ-મેઈલમાં પંજાબના અમૃતસરમાં સુવર્ણ મંદિરમાં વિસ્ફોટ બાદ 97 મિનિટની અંદર ગુજરાતની આ કચેરીઓને ધડાકાથી ઉડાવી દેવાની ધમકી આપવામાં આવી છે. આવી ધમકીઓને ધ્યાનમાં રાખીને પોલીસે તાત્કાલિક કાર્યવાહી શરૂ કરી છે અને સંબંધિત કચેરીઓને ખાલી કરાવવાની સૂચના આપી છે.
