કતાર : અમેરિકી રાષ્ટ્રપતિ ડોનાલ્ડ ટ્રમ્પ સાથે વ્હાઇટ હાઉસમાં ચાલી રહેલી બેઠક દરમિયાન જ ઇઝરાયેલના વડાપ્રધાન બેન્જામિન નેતન્યાહૂએ કતારના વડાપ્રધાન અને વિદેશ મંત્રી મોહમ્મદ બિન અબ્દુલરહમાન બિન જાસિમ અલ થાનીની ફોન પર માફી માંગી હોવાના અહેવાલ છે. આ માફી ૯ સપ્ટેમ્બરના રોજ કતારની રાજધાની દોહામાં ઇઝરાયેલે કરેલા હવાઈ હુમલાને લઈને માંગવામાં આવી છે, જેનો હેતુ હમાસના નેતાઓને નિશાન બનાવવાનો હતો. આ હુમલામાં કતારના એક સુરક્ષા ગાર્ડનું મૃત્યુ થયું હતું.
ગાઝા શાંતિ પ્રસ્તાવ પર ચર્ચા વચ્ચે માફી
કતાર : આ વાતચીત એવા સમયે થઈ છે જ્યારે ટ્રમ્પ અને નેતન્યાહૂ ગાઝામાં શાંતિ સ્થાપવા માટે એક મહત્ત્વપૂર્ણ બેઠક કરી રહ્યા છે. મીડિયા અહેવાલો અનુસાર, નેતન્યાહૂએ વ્હાઇટ હાઉસમાં જ અલ થાની સાથે ઘણી મિનિટો સુધી ફોન પર વાત કરી અને હુમલા બદલ ખેદ વ્યક્ત કર્યો.
આ ઘટનાક્રમ એટલા માટે પણ ખાસ છે કારણ કે કતાર ઇઝરાયેલ અને હમાસ વચ્ચેના યુદ્ધમાં મુખ્ય મધ્યસ્થીની ભૂમિકા ભજવી રહ્યું છે. આ હુમલા બાદ કતાર અને અન્ય આરબ દેશો સક્રિય થઈ ગયા હતા અને કતારે એક શિખર સંમેલન પણ બોલાવ્યું હતું. હુમલા છતાં કતારે સંઘર્ષ વિરામ માટેના તેના પ્રયાસો ચાલુ રાખવાની ખાતરી આપી હતી.
વ્હાઇટ હાઉસની બેઠક અને ૨૧-સૂત્રીય યોજના
વ્હાઇટ હાઉસની બેઠકમાં ટ્રમ્પ ગાઝા સંઘર્ષને સમાપ્ત કરવા માટે એક નવો પ્રસ્તાવ રજૂ કરે તેવી સંભાવના છે. નેતન્યાહૂએ રવિવારે ફોક્સ ન્યૂઝને કહ્યું હતું કે, “અમે આના પર કામ કરી રહ્યા છીએ. તેને હજુ અંતિમ સ્વરૂપ આપવામાં આવ્યું નથી પરંતુ અમે ખરેખર અત્યારે પણ રાષ્ટ્રપતિ ટ્રમ્પની ટીમ સાથે કામ કરી રહ્યા છીએ અને મને આશા છે કે અમે તેને આગળ વધારી શકીશું.”
આ યોજના વિશે જાણકારી ધરાવતા આરબ અધિકારીઓએ જણાવ્યું છે કે, ૨૧-સૂત્રીય પ્રસ્તાવમાં તાત્કાલિક યુદ્ધવિરામ, ૪૮ કલાકની અંદર હમાસ દ્વારા બંધક બનાવાયેલા તમામ બંધકોની મુક્તિ અને ગાઝામાંથી ઇઝરાયેલી સેનાની ક્રમિક વાપસીનો સમાવેશ થાય છે. આંતરરાષ્ટ્રીય દબાણ વધ્યું છે, કારણ કે ગાઝાના આરોગ્ય મંત્રાલયના જણાવ્યા અનુસાર, ઇઝરાયેલ-હમાસ યુદ્ધમાં મૃત્યુ પામેલા પેલેસ્ટિનિયનોની સંખ્યા ૬૬,૦૦૦થી વધુ થઈ ગઈ છે.
