Mahemdavad Municipality Controversy: મહેમદાવાદ નગરપાલિકામાં સત્તાધીશો અને ચૂંટાયેલા કાઉન્સિલરો વચ્ચેનો વિવાદ હવે ચરમસીમાએ પહોંચ્યો છે. તાજેતરમાં મળેલી પાલિકાની બેઠકમાં નગરપાલિકા પ્રમુખ અને ચીફ ઓફિસર (CO) ની કથિત મનમાની અને આપખુદ વલણ સામે ભારે રોષ વ્યક્ત કરતા, પાલિકાના કુલ 28 માંથી 20 જેટલા કાઉન્સિલરોએ ચાલુ બોર્ડ મીટિંગમાંથી વોકઆઉટ કરતા સ્થાનિક રાજકારણમાં ભારે ખળભળાટ મચી ગયો છે.
Mahemdavad Municipality Controversy: મનમાની કરવાનો આક્ષેપ
નોંધનીય છે કે કારોબારી અધ્યક્ષ સહિતના નારાજ કાઉન્સિલરો ખુલ્લેઆમ પ્રમુખ અને ચીફ ઓફિસર પર બોર્ડના અન્ય કાઉન્સિલરોને વિશ્વાસમાં લીધા વિના મનસ્વી નિર્ણયો લેવાનો આરોપ લગાવી રહ્યા છે. વિરોધ કરી રહેલા કાઉન્સિલરોનો આક્ષેપ છે કે તેમના સૂચનો, રજૂઆતો અને તેમના વોર્ડને લગતા પ્રશ્નોને સતત અવગણવામાં આવી રહ્યા છે. આ જ તાનાશાહી વલણના વિરોધમાં બહુમતી કાઉન્સિલરો (કુલ 28 માંથી ૨૦ કાઉન્સિલરો) એ સભાનો બહિષ્કાર કરી વોકઆઉટ કર્યો હતો.
અટકેલા વિકાસના કામો
ઉલ્લેખનીય છે કે બોર્ડની બેઠકમાં કાઉન્સિલરો અને પ્રમુખ વચ્ચે ઉગ્ર બોલાચાલી થઇ હતી. કાઉન્સિલરોએ અટકેલા અને પડતર વિકાસના કામો મુદ્દે સત્તાધીશોનું ધ્યાન દોર્યું હતું પણ પ્રમુખે આડા કાન કર્યા. સત્તાવાર દસ્તાવેજો અને ઠરાવો પર સહીઓ લેવાની પ્રક્રિયા બાબતે પણ કાઉન્સિલરોએ ભારે આક્રોશ વ્યક્ત કર્યો હતો. કાઉન્સિલરોનું કહેવું છે કે યોગ્ય પ્રોટોકોલ અને નિયમોનું પાલન નથી થઈ રહ્યું અને બહુમતી કાઉન્સિલરોની અવગણના કરીને વહીવટ ચલાવવામાં આવી રહ્યો છે.
કાઉન્સિલરોએ વહીવટીતંત્રને જ પુછ્યો સવાલ!
રોષે ભરાયેલા કાઉન્સિલરોએ વહીવટીતંત્રને સીધો સવાલ કર્યો હતો કે જો નાગરિકોના પાયાના વિકાસના કામો જ નથી થતા અને પ્રજાના ચૂંટાયેલા પ્રતિનિધિઓનું સાંભળવામાં જ નથી આવતું, તો પછી કયા મોઢે આક્રમક રીતે વેરો ઉઘરાવવામાં આવી રહ્યો છે?
વહીવટી મડાગાંઠ અને વિકાસ કાર્યો પર સંકટ
મહેમદાવાદમાં 28 કાઉન્સિલરોમાંથી 20 કાઉન્સિલરોના સામૂહિક વોકઆઉટથી મહેમદાવાદ નગરપાલિકામાં વહીવટી મડાગાંઠ સર્જાઈ છે. બહુમતી કાઉન્સિલરો પારદર્શિતાની માંગ સાથે વિરોધ પર ઉતરી આવ્યા હોવાથી પાલિકામાં આંતરિક ખેંચતાણ ખુલ્લી પડી છે. જો સત્તાધીશો દ્વારા કાઉન્સિલરોની આ નારાજગી સત્વરે દૂર કરવામાં નહીં આવે, તો નગરપાલિકાનો રોજબરોજનો વહીવટ ખોરવાઈ શકે છે અને શહેરના વિકાસ કાર્યો લાંબા સમય સુધી અટવાઈ શકે તેવી પૂરી શક્યતા છે.
શા માટે સર્જાયો આક્રોશ?
કારોબારી અધ્યક્ષ સહિતના નારાજ કાઉન્સિલરોએ સત્તાધીશો પર ગંભીર આક્ષેપો કર્યા છે:
આપખુદ વલણ: કાઉન્સિલરોનો આક્ષેપ છે કે પ્રમુખ અને ચીફ ઓફિસર અન્ય કાઉન્સિલરોને વિશ્વાસમાં લીધા વિના જ મનસ્વી રીતે નિર્ણયો લઈ રહ્યા છે.
રજૂઆતોની અવગણના: કાઉન્સિલરોએ જણાવ્યું કે તેમના વોર્ડના પ્રશ્નો અને વિકાસના કામો અંગેની રજૂઆતોને સતત અવગણવામાં આવી રહી છે.
વિકાસના કામો પર બ્રેક: બોર્ડની બેઠકમાં પડતર વિકાસના કામો મુદ્દે ઉગ્ર બોલાચાલી થઈ હતી. કાઉન્સિલરોનું કહેવું છે કે પ્રજાના કામો અટકેલા છે અને વહીવટમાં પારદર્શિતાનો અભાવ છે.
આ પણ વાંચો: મહેમદાવાદ સિદ્ધિવિનાયક મંદિરે વૈદિક હોળી પ્રગટાવાશે: જાણો ખાસ આયોજન
