Rajkot Dhoraji Highway Accident : રાજકોટ જિલ્લાના ધોરાજી હાઈવે પર એક અત્યંત કરુણ અને ગમખ્વાર અકસ્માત સર્જાયો છે. સગાઈના પ્રસંગમાં હાજરી આપીને આનંદ-ઉલ્લાસ સાથે પરત ફરી રહેલા મુસાફરોથી ભરેલી એક ખાનગી બસ અચાનક પલટી ખાઈ ગઈ હતી. આ ગોઝારી ઘટનામાં ખુશીનો માહોલ પળવારમાં માતમ અને અફરાતફરીમાં ફેરવાઈ ગયો હતો.
Rajkot Dhoraji Highway Accident : અકસ્માત કેવી રીતે સર્જાયો?
પ્રાથમિક માહિતી અનુસાર, આ ખાનગી ટ્રાવેલ્સની બસમાં અંદાજે 18 જેટલા મુસાફરો સવાર હતા. પ્રત્યક્ષદર્શીઓના જણાવ્યા મુજબ, બસ ચાલકે પહેલા બે ટુ-વ્હીલરને અડફેટે લીધા હતા. ત્યારબાદ ડ્રાઈવરે સ્ટીયરિંગ પરથી કાબૂ ગુમાવતા બસ હાઈવે પર જ ધડાકાભેર પલટી મારી ગઈ હતી. ઓવરસ્પીડના કારણે આ દુર્ઘટના સર્જાઈ હોવાનું પ્રાથમિક અનુમાન છે.
યુદ્ધના ધોરણે રેસ્ક્યુ ઓપરેશન
બસ પલટી જવાના કારણે અકસ્માત એટલો ભયાનક હતો કે ત્રણ જેટલા મુસાફરો બસની નીચે જ દબાઈ ગયા હતા. ઘટનાની જાણ થતાં જ સ્થાનિક લોકો અને તંત્ર તાત્કાલિક દોડી આવ્યું હતું. ક્રેન અને અન્ય સાધનોની મદદથી ભારે જહેમત બાદ બસ નીચે ફસાયેલા લોકોને બહાર કાઢવા માટે રેસ્ક્યુ ઓપરેશન હાથ ધરવામાં આવ્યું હતું.
ઈજાગ્રસ્તોને હોસ્પિટલ ખસેડાયા
આ અકસ્માતમાં ઘાયલ થયેલા તમામ લોકોને તાત્કાલિક એમ્બ્યુલન્સ મારફતે નજીકની હોસ્પિટલમાં સારવાર અર્થે ખસેડવામાં આવ્યા છે. મળતી માહિતી મુજબ, કેટલાક મુસાફરોની હાલત અત્યંત નાજુક છે. ઘટનાસ્થળે પહોંચેલી પોલીસે હાઈવે પરનો ટ્રાફિક ક્લિયર કરાવીને અકસ્માતનું ચોક્કસ કારણ જાણવા માટે વધુ તપાસ હાથ ધરી છે.
આ પણ વાંચો: સુપ્રીમ કોર્ટે ભદ્ર પાથરણાવાળા કેસમાં કાયદેસરના ફેરિયાઓને આપી મોટી રાહત!
