Surat Court Acid Attack : ન્યાયની અપેક્ષાએ આવતા લોકો માટે સુરક્ષિત મનાતા કોર્ટ પરિસરમાં આજે એક અત્યંત કરુણ અને ભયાનક ઘટના બની છે. સુરત જિલ્લા સેવા સદન (Surat Jilla Seva Sadan) ખાતેના પાંચમા માળે આવેલી ફેમિલી કોર્ટમાં (Family Court) આજે ચાલુ સુનાવણી દરમિયાન એક વૃદ્ધ પતિએ પોતાની પત્ની પર એસિડ (Acid) વડે હુમલો કર્યો હતો. આટલું જ નહીં, પત્ની પર જ્વલનશીલ પ્રવાહી ફેંક્યા બાદ પતિએ પણ તરત જ ઝેરી દવા (Poison) ગટગટાવી લેતા કોર્ટ રૂમમાં નાસભાગ અને ભારે અફરાતફરી મચી ગઈ હતી.
Surat Court Acid Attack છૂટાછેડાના કેસમાં હિંસક વળાંક
પ્રાપ્ત માહિતી અનુસાર, આ વૃદ્ધ દંપતી વચ્ચે લાંબા સમયથી કોર્ટમાં છૂટાછેડા (Divorce) અને ખાધા-ખોરાકીનો (Maintenance) કેસ ચાલી રહ્યો હતો. આજે આ જ મામલે સુનાવણી હોવાથી બંને પક્ષો કોર્ટમાં હાજર હતા. ન્યાયાધીશ સમક્ષ વકીલોની દલીલો ચાલી રહી હતી ત્યારે પાછળની બેન્ચ પર બેઠેલા પતિ વિનોદ ભાનુશાળી (Vinod Bhanushali) એ અચાનક પોતાની સાથે છુપાવીને લાવેલી એસિડની બોટલ કાઢી હતી અને આગળ બેઠેલી પત્નીના ચહેરા પર ફેંકી દીધી હતી.
નજરે જોનાર વકીલની જુબાની
આ ખૌફનાક ઘટના સમયે કોર્ટ રૂમમાં હાજર મહિલા વકીલ વર્ષા પટેલે (Advocate Varsha Patel) જણાવ્યું કે, “અમે કૃષ્ણાબેન (Krishnaben) સાથે આગળની હરોળમાં બેઠા હતા. ભોગ બનનાર મહિલા અમારી પાછળ હતા અને તેમની બરાબર પાછળ તેમના પતિ બેઠા હતા. અચાનક પાછળથી ભયાનક ચીસો સંભળાઈ અને એસિડની અત્યંત તીવ્ર ગંધ આખા રૂમમાં ફેલાઈ ગઈ. અમને પણ એસિડના કેટલાક છાંટા ઉડ્યા હતા. પાછળ ફરીને જોયું તો પતિ બોટલમાંથી પત્ની પર એસિડ રેડી રહ્યો હતો. મહિલાની એક આંખ તરત જ બંધ થઈ ગઈ હતી અને તે ભયંકર પીડાથી તરફડી રહી હતી.”
સિવિલ હોસ્પિટલમાં સારવાર અને પોલીસ તપાસ
પત્ની પર એસિડ એટેક (Acid Attack) કર્યા બાદ હુમલાખોર પતિ વિનોદ ભાનુશાળીએ કોર્ટમાં જ ઝેર પીને આપઘાતનો પ્રયાસ કર્યો હતો. લોહીલુહાણ પત્ની અને ઝેરની અસર હેઠળ તરફડતા પતિને જોઈ કોર્ટના કર્મચારીઓએ તાત્કાલિક એમ્બ્યુલન્સ (Ambulance) અને પોલીસને (Surat Police) જાણ કરી હતી. હાલ બંનેને ગંભીર હાલતમાં સુરત સિવિલ હોસ્પિટલમાં (Surat Civil Hospital) સારવાર માટે ખસેડવામાં આવ્યા છે. મહિલાના ચહેરા અને આંખના ભાગે ગંભીર ઈજાઓ પહોંચી છે. સૌથી મોટો સવાલ એ ઊભો થયો છે કે કડક સુરક્ષા વ્યવસ્થા ધરાવતા કોર્ટ પરિસરમાં આ વ્યક્તિ એસિડની બોટલ અને ઝેર લઈને છેક અંદર સુધી કેવી રીતે પહોંચી ગયો? સુરત પોલીસે આ મામલે સઘન તપાસ શરૂ કરી છે.
આ પણ વાંચો: ગિરનારના અંબાજી મંદિરના ભંડારામાં દારૂ-માંસની મહેફિલનો વીડિયો વાયરલ,પૂજારી સહિત 11 સસ્પેન્ડ!
