ઇન્ડિયાની વાપસી – પર્થ ટેસ્ટના પહેલા દિવસે ભારતીય બેટ્સમેનોના ફ્લોપ શો બાદ બુમરાહ એન્ડ કંપનીના નેતૃત્વમાં બોલરોએ જે કામ કર્યું છે તેને શાનદાર વાપસી કહેવામાં આવશે. ભારતીય ટીમ 150 રનમાં ઓલઆઉટ થઈ ગઈ હતી. જે બાદ બુમરાહ એન્ડ કંપનીએ ઓસ્ટ્રેલિયાની ટીમની 7 વિકેટો પાડી હતી. હવે ઓસ્ટ્રેલિયાની ટીમ સંઘર્ષ કરી રહી છે, તેણે 67 રન બનાવ્યા છે. આ સાથે જ ભારત હજુ પણ કાંગારૂ ટીમથી 83 રનથી આગળ છે. પર્થમાં ભારતીય દાવને સસ્તામાં પાર પાડવામાં આવ્યા બાદ બુમરાહના નેતૃત્વમાં ટીમ ઈન્ડિયાના બોલરોએ શાનદાર પ્રદર્શન કર્યું હતું. જોકે ઓસ્ટ્રેલિયાના ફાસ્ટ બોલરોએ પણ શાનદાર પ્રદર્શન કર્યું હતું. પર્થ ટેસ્ટ મેચના પ્રથમ દિવસની સૌથી મોટી ખાસિયત એ હતી કે તમામ 17 વિકેટ ઝડપી બોલરોએ લીધી હતી.
ઇન્ડિયાની વાપસી –ઓસ્ટ્રેલિયાની ટીમ આ મેચમાં સંઘર્ષ કરી રહી છે. બુમરાહના નેતૃત્વમાં ભારતીય ટીમે ઓસ્ટ્રેલિયાની કમર તોડી નાખી હતી. ઓસ્ટ્રેલિયા તરફથી ઈનિંગની શરૂઆત કરવા ઉસ્માન ખ્વાજા અને નાથન મેકસ્વીની આવ્યા હતા. ઓસ્ટ્રેલિયાએ ભારત કરતાં થોડી સારી શરૂઆત કરી હતી. પરંતુ નવોદિત મેકસ્વીની (14) બુમરાહના બોલ પર એલબીડબ્લ્યુ આઉટ થયો હતો.
આ પછી કેપ્ટન જસપ્રીત બુમરાહે પણ ભારતને બીજી સફળતા અપાવી. ઉસ્માન ખ્વાજા (8) 19ના સ્કોર પર પરત ફર્યો હતો. તેને વિરાટ કોહલીએ કેચ આઉટ કરાવ્યો હતો. ત્યાર બાદ બીજા જ બોલ પર કેપ્ટન બુમરાહે સ્ટીવ સ્મિથ (0)ની વિકેટ લીધી હતી. આ રીતે ઓસ્ટ્રેલિયાની ટીમે 19 રનમાં ત્રણ વિકેટ ગુમાવી દીધી હતી. 3 વિકેટ ગુમાવ્યા બાદ ઓસ્ટ્રેલિયન ટીમ બેક ફૂટ પર દેખાવા લાગી હતી. આ પછી ટ્રેવિસ હેડ (11) હર્ષિત રાણાની પ્રથમ આંતરરાષ્ટ્રીય વિકેટ બની હતી. ટ્રેવિસ હેડ ઇનકમિંગ બોલ પર ક્લીન બોલ્ડ થયો હતો. જ્યારે હેડ આઉટ થયો ત્યારે કાંગારૂ ટીમનો સ્કોર 31/4 હતો.
મિશેલ માર્શ (6) સિરાજના બોલ પર કેએલ રાહુલના હાથે કેચ આઉટ થયો હતો. માર્નસ લાબુશેને 2 રન બનાવવા માટે 52 બોલ રમ્યા હતા, પરંતુ તે પણ સિરાજના બોલના ચક્કરમાં ફસાઈ ગયો હતો અને એલબીડબ્લ્યુ થઈ ગયો હતો. જસપ્રીત બુમરાહે ભારતીય ટીમ માટે ઓસ્ટ્રેલિયન ઇનિંગ્સમાં સૌથી વધુ 4 વિકેટ ઝડપી હતી. મોહમ્મદ સિરાજને 2 અને હર્ષિત રાણાને એક સફળતા મળી હતી
આ પણ વાંચો- IPL ચેમ્પિયન્સ ટ્રોફીની ફાઇનલ બાદ શરૂ થશે,BCCIએ એક સાથે ત્રણ સીઝનની તારીખ કરી જાહેર
