Gujarat Tenancy Act 2026 : ગુજરાતના મુખ્યમંત્રી ભૂપેન્દ્ર પટેલે રાજ્યના હજારો ગણોતિયાઓ અને ખેડૂતોના હિતમાં એક અત્યંત મહત્વપૂર્ણ નિર્ણય લીધો છે. હવે ખેતીની જમીન પર કાયદેસરનો માલિકી હક મેળવવા માટે ગણોતિયાઓને વધુ એક વર્ષનો સમય આપવામાં આવ્યો છે.
Gujarat Tenancy Act 2026 : નવી સમયમર્યાદા 31 ડિસેમ્બર 2026 સુધી લંબાવાઈ
ગુજરાત ગણોત વહીવટ અને ખેતીની જમીન અધિનિયમની કલમ-32 હેઠળ ગણોતિયાઓને જમીનની ખરીદ કિંમત ભરપાઈ કરવા માટેની મુદત વધારવામાં આવી છે. હવે રાજ્યના ગણોતિયાઓ 31 ડિસેમ્બર 2026 સુધીમાં નિયત કિંમત ભરીને જમીનના કાયદેસરના માલિક બની શકશે.
મુદત વધારવા પાછળનું મુખ્ય કારણ
ઘણા કિસ્સાઓમાં ગણોતિયાઓ કાયદાકીય અજ્ઞાનતા અથવા આર્થિક સંકડામણને કારણે સમયસર જમીનની ખરીદ કિંમત ભરી શક્યા ન હતા. અગાઉ આ મુદત 31 ડિસેમ્બર 2025 ના રોજ પૂર્ણ થતી હતી. ખેડૂત સંગઠનો દ્વારા સરકારમાં કરવામાં આવેલી રજૂઆતોને ધ્યાનમાં રાખીને મુખ્યમંત્રીએ આ મુદતમાં એક વર્ષનો વધારો કર્યો છે.
જમીન વેચાણ અને બિન-ખેતીની મુશ્કેલીઓનો અંત
કાયદા મુજબ જો ગણોતિયાઓ નિયત સમયમાં ખરીદ રકમ ભરવામાં નિષ્ફળ જાય, તો તેમને જમીનના કાયદેસરના માલિક ગણવામાં આવતા નથી. આ કારણે તેમને ખેતીની જમીન વેચવામાં કે બિન-ખેતી (NA) કરાવવામાં ભારે મુશ્કેલીઓ પડતી હતી. સરકારના આ નવા નિર્ણયથી આવી તમામ કાયદાકીય અડચણો દૂર થશે.
હજારો ખેડૂત પરિવારોને સીધો ફાયદો
મુખ્યમંત્રીના આ નિર્ણયથી રાજ્યના હજારો ગણોતિયાઓને સીધો ફાયદો થશે અને તેઓ જમીનના માલિકી હક મેળવી શકશે. આ પગલાથી જમીનના રેકર્ડમાં પારદર્શિતા આવશે અને ભવિષ્યમાં જમીન સંબંધી ગૂંચવણોમાં પણ ઘટાડો થશે. ખેતી સાથે સંકળાયેલા ગરીબ અને મધ્યમ વર્ગના પરિવારોને આર્થિક સુરક્ષા મળશે.
આ પણ વાંચો: ગુજરાત મહેસૂલ વિભાગનો મોટો નિર્ણય, 80 નાયબ મામલતદારોની કરાઇ બદલી!
