Petrol Diesel Price Hike : મોંઘવારીનો સામનો કરી રહેલા દેશના સામાન્ય નાગરિકો માટે એક માઠા સમાચાર સામે આવી રહ્યા છે. તાજેતરના મીડિયા રિપોર્ટ્સ અને ઓઇલ માર્કેટના નિષ્ણાતોના મતે, આગામી 15 મે પહેલા પેટ્રોલ અને ડીઝલના (Petrol Diesel Price) ભાવમાં મોટો વધારો થવાની પ્રબળ સંભાવના છે. જો આમ થશે, તો રોજિંદા પરિવહનથી લઈને જીવનજરૂરી ચીજવસ્તુઓના ભાવમાં પણ ઉછાળો જોવા મળી શકે છે.
Petrol Diesel Price Hike : ક્રૂડ ઓઇલના ભાવમાં વધઘટ અને કંપનીઓ પર દબાણ
આંતરરાષ્ટ્રીય બજારમાં કાચા તેલ (Crude Oil) ની કિંમતોમાં સતત વધઘટ જોવા મળી રહી છે. આ ઉપરાંત, ભૌગોલિક રાજકીય તણાવ અને વૈશ્વિક સપ્લાય ચેઇનમાં ઊભી થયેલી અડચણોને કારણે ઓઇલ માર્કેટિંગ કંપનીઓ (OMCs) પર ભારે નાણાકીય દબાણ સર્જાયું છે. લાંબા સમયથી દેશમાં ઈંધણના ભાવ સ્થિર હોવાથી કંપનીઓ હવે પોતાનો નફો સરભર કરવા માટે કિંમતોમાં વધારો ઝીંકી શકે છે.
મોંઘવારીનો દર વધવાની ભીતિ
પેટ્રોલ અને ડીઝલ માત્ર વાહનોમાં જ નહીં, પરંતુ દેશના આખા ટ્રાન્સપોર્ટેશન અને લોજિસ્ટિક્સ સેક્ટરની કરોડરજ્જુ છે. જો 15 મે પહેલા ડીઝલના ભાવમાં વધારો થશે, તો માલસામાનની હેરફેર મોંઘી બનશે. જેના સીધા પરિણામ સ્વરૂપે શાકભાજી, અનાજ અને અન્ય આવશ્યક ચીજવસ્તુઓના ભાવમાં પણ ભડકો થઈ શકે છે, જે સામાન્ય અને મધ્યમવર્ગીય પરિવારોનું બજેટ ખોરવી નાખશે.
ક્યારે અને કેટલો વધારો થઈ શકે?
સૂત્રો પાસેથી મળતી માહિતી મુજબ, ઓઇલ માર્કેટિંગ કંપનીઓ ભાવ વધારાને લઈને ટૂંક સમયમાં અંતિમ નિર્ણય લઈ શકે છે. 15 મે સુધીમાં પેટ્રોલ અને ડીઝલના ભાવમાં પ્રતિ લિટર 1 થી 3 રૂપિયા સુધીનો વધારો જોવા મળી શકે છે. જોકે, આ અંગે હજુ સુધી સરકાર કે કંપનીઓ તરફથી કોઈ સત્તાવાર જાહેરાત કરવામાં આવી નથી, પરંતુ બજારમાં ભાવ વધારાની અટકળોએ જોર પકડ્યું છે.
આ પણ વાંચો: દુનિયા સંસાધનોનો હથિયાર તરીકે ઉપયોગ કરી રહી છે: સુરીનામમાં વિદેશ મંત્રી એસ. જયશંકરની ગંભીર ચેતવણી
