Mushtaq Khan Actor Passed Away બોલિવૂડ જગતમાંથી એક અત્યંત દુઃખદ સમાચાર સામે આવ્યા છે. ફિલ્મ ઈન્ડસ્ટ્રીના લોકપ્રિય અને પ્રતિભાશાળી અભિનેતા મુશ્તાક ખાનનું મુંબઈની એક હોસ્પિટલમાં સારવાર દરમિયાન નિધન થઈ ગયું છે. તેઓ લાંબા સમયથી કેન્સર જેવી ગંભીર બીમારી સામે જંગ લડી રહ્યા હતા. માત્ર 56 વર્ષની ઉંમરમાં તેમણે આ દુનિયાને અલવિદા કહી દીધું છે, જેના કારણે સમગ્ર ફિલ્મ જગતમાં અને તેમના ચાહકોમાં શોકનું મોજું ફરી વળ્યું છે.
Mushtaq Khan Actor Passed Away કેન્સર સામેની જંગ અને હોસ્પિટલમાં સારવાર
મળતી માહિતી મુજબ, મુશ્તાક ખાન છેલ્લા લગભગ 15 દિવસથી મુંબઈની નાણાવટી હોસ્પિટલમાં દાખલ હતા. તેમના બિઝનેસ પાર્ટનર શિવમે આ દુઃખદ સમાચારની પુષ્ટિ કરતા જણાવ્યું કે ગુરુવાર સાંજે 7 વાગ્યે તેમનું નિધન થયું છે. તેઓ છેલ્લા કેટલાય સમયથી ફેફસાના કેન્સર (લંગ કેન્સર) થી ઝઝૂમી રહ્યા હતા. તેમને પાંચ વર્ષ પહેલાં આ બીમારી હોવાનું નિદાન થયું હતું, પરંતુ તાજેતરમાં રોગ ફરી વકર્યો હતો, જેના પછી તેમની તબિયત સતત બગડતી ગઈ હતી. તેમની અંતિમવિધિ આવતીકાલે કરવામાં આવશે.
યાદગાર ફિલ્મો અને અનોખી અભિનય શૈલી
મુશ્તાક ખાને પોતાની લાંબી અભિનય કારકિર્દીમાં અનેક શાનદાર ફિલ્મો અને ટીવી શોમાં સહાયક ભૂમિકાઓ ભજવી હતી અને ખાસ કરીને કોમિક રોલ્સમાં તેમણે દર્શકોના દિલ જીતી લીધા હતા. ખાસ કરીને અનીસ બઝમીની સુપરહિટ કોમેડી ફિલ્મ ‘વેલકમ’ (Welcome) માં તેમનો આઈકોનિક ડાયલોગ “કંટ્રોલ ઉદય, કંટ્રોલ! મેરી એક ટાંગ નકલી હૈ, મૈં હોકી કા બહુત બડા ખિલાડી થા..” આજે પણ દર્શકોના દિલમાં જીવંત છે. તેઓ તાજેતરમાં ‘ગદર 2’, ‘બધાઈ હો’ અને ‘સ્ત્રી 2’ જેવી બ્લોકબસ્ટર ફિલ્મોમાં પણ નજરે પડ્યા હતા. આ ઉપરાંત તેમણે કાલિયા, કબ્જા, આશિકી, દિલ હૈ કિ માનતા નહીં, સડક અને વોન્ટેડ જેવી અનેક યાદગાર ફિલ્મોમાં કામ કર્યું હતું.
ચર્ચામાં રહેલો કિડનેપિંગ કેસ
વર્ષ 2024માં મુશ્તાક ખાન અચાનક ત્યારે ભારે ચર્ચામાં આવ્યા હતા જ્યારે તેમના અપહરણના સમાચાર સામે આવ્યા હતા. દિલ્હી-મેરઠ હાઈવે પરથી તેમનું અપહરણ કરવામાં આવ્યું હતું અને આરોપીઓએ તેમની પાસેથી 1 કરોડ રૂપિયાની માગણી કરી હતી. તેમને એક શોમાં પરફોર્મ કરવાના બહાને બોલાવવામાં આવ્યા હતા, જ્યાંથી તેઓ માંડ માંડ પોતાનો જીવ બચાવીને બહાર નીકળવામાં સફળ રહ્યા હતા.
