Ahmedabad: સોશિયલ મીડિયા પર ફેમસ થવા માટે યુવા પેઢી વારંવાર જોખમી સ્ટંટ કરવાની હિંમત કરે છે. ઘણીવાર આવા પ્રયાસો જીવ માટે ઘાતક સાબિત થાય છે. અમદાવાદના ફતેવાડી કેનાલ પાસે આવી જ એક દુર્ઘટના બની, જ્યાં રીલ બનાવવાના પ્રયાસમાં ભાડાની સ્કોર્પિયો કાર કેનાલમાં પડતા ત્રણ યુવાનો તણાઈ ગયા.
ફાયર બ્રિગેડ અને પોલીસનો બચાવ અભિયાન ચાલુ
આ દુર્ઘટનાની જાણ થતાં જ સ્થાનિકો દોડી આવ્યા અને તાત્કાલિક ફાયર બ્રિગેડ તથા પોલીસને જાણ કરવામાં આવી. ત્યારપછી, જમાલપુર, પ્રહલાદનગર અને અસલાલી ફાયર સ્ટેશનની ટીમો ઘટના સ્થળે પહોંચી. તાત્કાલિક બચાવ કામગીરી શરૂ કરવામાં આવી, પરંતુ કેનાલમાં ભારે પાણીપ્રવાહને કારણે ઓપરેશનમાં મુશ્કેલીઓ આવી. બચાવ ટીમે કેનાલના પાણીનો પ્રવાહ અસ્થાયી રીતે રોક્યો.
રીલ બનાવવા માટે ગાડી ભાડે લીધી હતી
પ્રાપ્ત માહિતી અનુસાર, વાસણામાં રહેતા હૃદય વયંતા, વેજલપુરના સોલંકી ધ્રુવ અને ઋતાયુ સોલંકીએ ચાર કલાક માટે ₹3500માં ભાડાની સ્કોર્પિયો કાર લીધી હતી. તેઓ વાસણા બેરેજ નજીક રીલ શૂટ કરવા ગયા હતા. યશ ભંકોડીયાએ ગાડી ચલાવવાનું શરૂ કર્યું, પછી તેણે સોલંકીને સ્ટિયરિંગ સોંપ્યું. ગાડી ટર્ન લેતી વખતે કંઈક ખોટું થયું, અને સ્કોર્પિયો સીધી કેનાલમાં પડી ગઈ.
વિરાજસિંહ રાઠોડ અને મિત્રો બચાવમાં નિષ્ફળ
ગાડી ખાબકતાં ત્યાં હાજર અન્ય મિત્રોએ દોરડું ફેંકીને તણાઈ રહેલા યુવાનોને બચાવવાનો પ્રયાસ કર્યો, પરંતુ ઘાતક પ્રવાહને કારણે ત્રણેમાંથી એક પણ છોકરો દોરડું પકડી શક્યો નહીં અને બધાના જીવ જોખમમાં મૂકાઈ ગયા.
હજી સુધી કોઈનો પત્તો નહીં
ફાયર બ્રિગેડની ટીમ અને પોલીસ દ્વારા સતત સર્ચ ઓપરેશન ચલાવવામાં આવી રહ્યું છે. ત્રણે યુવાનોના મૃતદેહ શોધવા માટે કેનાલના વિવિધ વિસ્તારોમાં તપાસ હાથ ધરવામાં આવી રહી છે. આ ઘટનાએ વધુ એકવાર સાબિત કર્યું કે શોર્ટ વીડિયો અથવા સોશિયલ મીડિયા ટ્રેન્ડને અનુસરવા માટે જોખમ ભર્યા સ્ટંટ ન કરવો જોઈએ.
