Gujarat ATS Jaish-e-Mohammed Arrest : ગુજરાત આતંકવાદ વિરોધી ટુકડી (ATS) એ રાજ્યની સુરક્ષામાં એક મોટી સફળતા મેળવતા પ્રતિબંધિત આતંકવાદી સંગઠન ‘જૈશ-એ-મોહમ્મદ’ સાથે જોડાયેલા વધુ પાંચ શંકાસ્પદ આતંકવાદીઓની ધરપકડ કરી છે. આ ધરપકડ ગુજરાતના વિવિધ જિલ્લાઓમાં હાથ ધરવામાં આવેલા એક ઓપરેશન દરમિયાન કરવામાં આવી છે. ધરપકડ કરાયેલા શંકાસ્પદોની ઓળખ બિલાલ આબિદ શેરા, મોહમ્મદ અયુબ કડીવાલ (મોહમ્મદ ખાદિયાસન), મોહમ્મદ શફી મુખી (શફી છાપી), મોહમ્મદ હસન કે રાડિયા (હસન હૈદરપુરી) અને મોહમ્મદ અયુબ સુમસરા (મોહમ્મદ ખલી) તરીકે કરવામાં આવી છે.
Gujarat ATS Jaish-e-Mohammed Arrest ગયા મહિનાના નેટવર્ક સાથે કડીઓ
ATS ની પ્રાથમિક તપાસમાં બહાર આવ્યું છે કે આ પાંચેય શંકાસ્પદો ગયા મહિને પકડાયેલા આઠ આતંકવાદીઓના નેટવર્ક સાથે ગાઢ રીતે જોડાયેલા હતા. આ આતંકવાદી સંગઠન લાંબા સમયથી ગુજરાતમાં પોતાના સ્લીપર સેલ સક્રિય કરવાના પ્રયાસમાં હતું. ATS ના નાયબ પોલીસ અધિક્ષક હર્ષ ઉપાધ્યાયે જણાવ્યું હતું કે, આ શંકાસ્પદો અગાઉ ધરપકડ કરાયેલા આતંકવાદીઓના સતત સંપર્કમાં હતા અને ઉત્તર ગુજરાતના કેટલાક વ્યક્તિઓને આતંકવાદી પ્રવૃત્તિઓમાં સંડોવીને પોતાનું જાળું ફેલાવવાનો પ્રયાસ કરી રહ્યા હતા.
રથયાત્રા અને સુરક્ષાના પડકારો
મહત્વનું છે કે ભગવાન જગન્નાથની રથયાત્રા જેવી અત્યંત સંવેદનશીલ ઘટના પહેલા જ આ ષડયંત્રનો પર્દાફાશ થયો છે. જૈશ-એ-મોહમ્મદનું આ સ્લીપર સેલ પાકિસ્તાની હેન્ડલર્સના સીધા નિર્દેશ પર કામ કરતું હોવાનું તપાસમાં સામે આવ્યું છે. અગાઉ પણ ATS એ ગુજરાત અને મધ્યપ્રદેશમાં હુમલાનું કાવતરું ઘડનારા ૮ આતંકવાદીઓને ઝડપી પાડ્યા હતા. આતંકવાદીઓ ‘ગઝવા-એ-હિંદ’ જેવી ખતરનાક યોજનાઓ પર કામ કરી રહ્યા હોવાની આશંકા છે. હાલ ATS ની ટીમ બિલાલ દુર્રાની જેવા અન્ય શંકાસ્પદોની પૃષ્ઠભૂમિ અને તેમના મોબાઈલ તથા ઓનલાઈન સંપર્કોની ઉંડાણપૂર્વક તપાસ કરી રહી છે.
આ ધરપકડ બાદ ગુજરાતમાં સુરક્ષા વ્યવસ્થા વધુ સઘન બનાવી દેવામાં આવી છે. ATS દ્વારા ત્રણ જૈશ સભ્યોને વધુ તપાસ માટે બનાસકાંઠા લઈ જવામાં આવ્યા છે, જેથી આ આતંકવાદી સંગઠનનો ગુજરાતમાં પગપેસારો કરવાનો ઈરાદો અને તેમના કાવતરાંની તમામ કડીઓ એકસાથે મળી શકે.
આ પણ વાંચો: અમદાવાદમાં 149મી રથયાત્રાનો ભવ્ય પ્રારંભ: ‘જય રણછોડ’ના નાદથી ગુંજી ઉઠ્યું નગર
