Roza Rozi : મહેમદાવાદની શાન ગણાતી ઐતિહાસિક ઇમારત રોજા-રોજી ખાતે દર વર્ષની જેમ આ વર્ષે પણ ઉર્સની ભવ્ય અને હર્ષોલ્લાસ સાથે ઉજવણી કરવામાં આવી હતી. આ ઉર્સમાં હજારોની સંખ્યામાં હિન્દુ અને મુસ્લિમ બિરાદરો રોજા-રોજીની ઝિયારતે આવે છે, જે કોમી એકતાનું એક ઉત્તમ ઉદાહરણ પૂરું પાડે છે. જોકે, આ વર્ષે આ ભવ્ય ઉજવણી વચ્ચે એક મોટો વિવાદ સામે આવ્યો છે, જેણે સમગ્ર પંથકમાં ભારે ચર્ચા જગાવી છે.
Roza Rozi: દુકાનની ફાળવણીને લઈને શરૂ થયો વિવાદ
સૂત્રોના જણાવ્યા અનુસાર , રોજા-રોજીના પટાંગણમાં ઉર્સ દરમિયાન દુકાનો અને સ્ટોલ લગાવવામાં આવે છે. આ વર્ષે યાસીનભાઈ શેખ નામના વ્યક્તિને દુકાન લગાવવા માટે જગ્યાની ફાળવણી કરવા બાબતે ઉર્સ કમિટીના સભ્યો સાથે ભારે માથાકૂટ થઈ હતી. જગ્યાની ફાળવણીને લઈને અસંતોષ ઊભો થતાં આ મામલો બિચક્યો હતો અને ત્યારબાદ યાસીન શેખ દ્વારા કમિટી પર કેટલાક ગંભીર આક્ષેપો લગાવવામાં આવ્યા હતા.
નોંધણી વગરની કમિટી પર ફંડ ઉઘરાવવાનો આક્ષેપ
રોજા-રોજીમાં દર વર્ષે ‘મહેમદાવાદ ઉર્સ કમિટી’ દ્વારા કવાલીના પ્રોગ્રામ સાથે તમામ પ્રકારનો વહીવટ કરવામાં આવે છે. આ કમિટી વર્ષોથી પરંપરાગત રીતે જ આયોજન કરે છે, પરંતુ તેની કોઈ સત્તાવાર નોંધણી (Registration) થયેલી નથી. યાસીન શેખે આક્ષેપ લગાવ્યો છે કે આ ઉર્સ કમિટી રજિસ્ટ્રેશન વગર જ દુકાનદારો પાસેથી ફાળા પેટે મસમોટી રકમ ઉઘરાવે છે. આ ગંભીર આક્ષેપો બાદ ગુજરાતમાં આ મુદ્દો ‘ટોક ઓફ ધ ટાઉન’ બની ગયો છે.
ઉઘરાવેલા ફંડનો ઉપયોગ ક્યાં થાય છે?
જોકે, બીજી તરફ એ હકીકત પણ છે કે ઉર્સ કમિટી દર વર્ષે આયોજન બાદ હિસાબ પણ રજૂ કરે છે. રોજા-રોજીના પટાંગણમાં જે લારીઓ કે સ્ટોલ લગાવવામાં આવે છે, તેમની પાસેથી ઉઘરાવેલા ફંડની રકમથી જ આ ઐતિહાસિક ઇમારતની શાનદાર લાઇટિંગ, દર્શનાર્થીઓ માટે પીવાના પાણીની વ્યવસ્થા અને કવાલીના ભવ્ય પ્રોગ્રામનો તમામ ખર્ચ કાઢવામાં આવે છે.
નોંધાયેલી કમિટીમાં સામેલ થવાની પ્રબળ માંગ
મહેમદાવાદમાં રોજા-રોજી માટે એક અલગ કમિટી નોંધાયેલી છે, પરંતુ તે ઉર્સનો વહીવટ કરતી નથી. હવે જ્યારે આ ઉઘરાણાનો વિવાદ સામે આવ્યો છે, ત્યારે સ્થાનિક લોકો અને જાગૃત નાગરિકોમાં એવી પ્રબળ માંગ ઊઠી છે કે વહીવટમાં પારદર્શિતા લાવવા માટે ઉર્સ કમિટીના સભ્યોએ પણ આ નોંધાયેલી કમિટીમાં જ સામેલ થઈ જવું જોઈએ.
કમિટીના સભ્યનો ખુલાસો: હવે પાવતીથી જ ફાળો લેવાશે
આ સમગ્ર વિવાદ અને આક્ષેપો બાદ ઉર્સ કમિટી પણ હરકતમાં આવી છે. આ અંગે ઉર્સ કમિટીના જ એક સભ્યએ નામ ન આપવાની શરતે જણાવ્યું છે કે, ભવિષ્યમાં કોઈપણ પ્રકારના વિવાદને ટાળવા માટે આવતી વખતથી તમામ નોંધાયેલી અને સત્તાવાર પાવતી બુક પ્રમાણે જ ફાળો ઉઘરાવવામાં આવશે.ઐતિહાસિક ધરોહર સમાન રોજા-રોજીના ઉર્સમાં પારદર્શિતા આવે અને વર્ષો જૂની આ પરંપરા કોઈ પણ જાતના ડાઘ વગર આગળ વધે તેવું સૌ કોઈ ઈચ્છી રહ્યા છે.
આ પણ વાંચો: PM મોદી આજે ગુજરાતની મુલાકાતે: વાવ-થરાદમાં ₹20,000 કરોડના વિકાસ કાર્યોની આપશે ભેટ
