જવાહરલાલ નેહરુ યુનિવર્સિટી (JNU) માં દશેરા નિમિત્તે યોજાયેલા રાવણ દહન કાર્યક્રમ દરમિયાન ભારે હોબાળો થયો હતો. અખિલ ભારતીય વિદ્યાર્થી પરિષદ (ABVP) એ આરોપ લગાવ્યો છે કે લેફ્ટ સમર્થિત વિદ્યાર્થી સંગઠનોએ રાવણ દહન સમયે જૂતા ફેંક્યા અને જાણી જોઈને કાર્યક્રમમાં અવરોધ ઊભો કર્યો. ABVP નેતા પ્રવીણ કુમારે લેફ્ટ સંગઠનો પર જાણી જોઈને યુનિવર્સિટીના શાંતિપૂર્ણ માહોલમાં અશાંતિ ફેલાવવાનો આરોપ મૂક્યો છે.
આ વિવાદનું મૂળ રાવણના પૂતળામાં હતું, જેના 10 માથા પર દિલ્હી રમખાણના કથિત કાવતરાના આરોપી ઉમર ખાલિદ અને શરજીલ ઇમામ સહિત કેટલાક લોકોના ફોટા લગાવવામાં આવ્યા હતા.
બીજી તરફ, JNU વિદ્યાર્થી સંઘ (JNUSU) એ એક નિવેદન બહાર પાડીને ABVP પર ધર્મનો ઉપયોગ કરીને રાજકીય લાભ લેવાનો ગંભીર આરોપ મૂક્યો છે. JNUSU એ સવાલ ઉઠાવ્યો કે ઉમર ખાલિદ અને શરજીલ ઇમામ છેલ્લા 5 વર્ષથી જેલમાં છે અને તેમનો કેસ કોર્ટમાં પડતર છે, ત્યારે ABVP કેવી રીતે તેમને જાહેર મંચ પર દોષી ઠેરવી શકે? JNUSU એ કહ્યું કે દેશ-વિદેશના બુદ્ધિજીવીઓ પણ આ મામલાઓ પર ચિંતા વ્યક્ત કરી ચૂક્યા છે.
JNUSU એ આગળ પૂછ્યું કે જો ABVP ખરેખર રાષ્ટ્ર પ્રત્યે ચિંતિત છે, તો તેમણે રાવણના રૂપમાં નાથુરામ ગોડસેનો ચહેરો કેમ ન લગાવ્યો? JNUSU એ રામ રહીમ જેવા દુષ્કર્મ અને હત્યાના દોષિતોનો પણ ઉલ્લેખ કર્યો.
આ મામલે ABVPના વિદ્યાર્થી નેતા મયંક પંચાલ અને JNUSUના સંયુક્ત સચિવ વૈભવ મીણાએ પણ આકરા નિવેદનો આપ્યા છે. મયંક પંચાલે લેફ્ટ પર સાંસ્કૃતિક આક્રમકતાનો આરોપ લગાવ્યો અને કહ્યું કે ABVP તેને સહન નહીં કરે. જ્યારે વૈભવ મીણાએ લેફ્ટ વિદ્યાર્થીઓ પર શોભાયાત્રામાં હિંસા અને પથ્થરબાજી કરવાનો આરોપ મૂક્યો અને આ ઘટનાને યુનિવર્સિટીના સાંસ્કૃતિક સૌહાર્દ પર સીધો પ્રહાર ગણાવ્યો. JNUSU એ યુનિવર્સિટી પ્રશાસન પાસે શાંતિ પુનઃસ્થાપિત કરવા માટે કડક કાર્યવાહીની માંગ કરી છે.
