મોસાદ હેડક્વાર્ટર – ઈઝરાયલના શહેર તેલ અવીવ પાસે એક ટ્રક બસ સ્ટોપ પર અથડાઈ હતી. આ દરમિયાન બસ સ્ટોપ પર ઉભેલા 35 લોકોને ટ્રકે ટક્કર મારતાં ઈજા થઈ હતી. હાલ તેમાંથી 6ની હાલત નાજુક હોવાનું કહેવાય છે. ઘટનાસ્થળે હાજર લોકોએ ટ્રક દ્વારા હુમલાની માહિતી આપી હતી. જણાવવામાં આવી રહ્યું છે કે મોસાદના હેડક્વાર્ટર પાસે ટ્રકે ઘણા લોકોને કચડી નાખ્યા છે. પોલીસનું કહેવું છે કે ટ્રક ચાલકની ધરપકડ કરવામાં આવી છે. પ્રાપ્ત માહિતી અનુસાર, ટ્રક ચાલક આરબ નાગરિક છે. આવી સ્થિતિમાં એવી આશંકા પણ વ્યક્ત કરવામાં આવી રહી છે કે આ આતંકી હુમલો હોઈ શકે છે. જો કે હજુ સુધી કોઈ સંસ્થાએ આની જવાબદારી લીધી નથી.
ટ્રક ડ્રાઈવર આરબ નાગરિક હતો
ઘટનાની માહિતી આપતા ઈઝરાયેલ પોલીસે તેને હુમલો ગણાવ્યો અને કહ્યું કે હુમલાખોર આરબ નાગરિક છે. પોલીસે જણાવ્યું કે આ અથડામણ ઈઝરાયેલની મોસાદ ગુપ્તચર સંસ્થાના હેડક્વાર્ટર પાસે થઈ હતી. એક અઠવાડિયાના વેકેશન પછી ઇઝરાયેલીઓ કામ પર પાછા ફરતા હતા ત્યારે તેલ અવીવના ઉત્તરપૂર્વમાં, રામત હાશરોન શહેરમાં એક સ્ટોપ પર ટ્રક એક બસ સાથે અથડાઈ હતી. આ ટક્કર દરમિયાન કેટલાક લોકો વાહનોની નીચે ફસાઈ ગયા હતા. મોસાદ હેડક્વાર્ટર અને લશ્કરી થાણાની નજીક હોવા ઉપરાંત, બસ સ્ટોપ સેન્ટ્રલ હાઇવે જંકશનની નજીક પણ છે.
ઘાયલોમાંથી છની હાલત ગંભીર છે
ઘટના અંગે માહિતી આપતા ઈઝરાયેલના મેગેન ડેવિડ એડોમ રેસ્ક્યુ સર્વિસે જણાવ્યું કે ઘાયલોમાંથી છની હાલત ગંભીર છે. ઇઝરાયેલ પોલીસના પ્રવક્તા એએસઆઇ અહારોનીએ પત્રકારોને જણાવ્યું હતું કે હુમલાખોરને “તટસ્થ” કરવામાં આવ્યો હતો. જો કે હુમલાખોર માર્યો ગયો કે કેમ તે જણાવવામાં આવ્યું નથી. જ્યારે હમાસ અને ઇસ્લામિક જેહાદ સાથે જોડાયેલા નાના આતંકવાદી જૂથોએ આ શંકાસ્પદ હુમલાની પ્રશંસા કરી છે, પરંતુ કોઈ સંગઠને તેની જવાબદારી લીધી નથી.
આ પણ વાંચો – ઓલ ઇન્ડિયા મુસ્લિમ પર્સનલ લૉ બોર્ડના અધ્યક્ષનું મોટું નિવેદન, જેલ ભરો આંદોલન કરીશું, જીવન અને મરણનો મામલો!
