Juhapura Murder Case : આજના સમયમાં સોશિયલ મીડિયાનો ઉપયોગ ક્યારેય જીવલેણ પણ સાબિત થઈ શકે છે. અમદાવાદના જુહાપુરા વિસ્તારમાં આવી જ એક ચોંકાવનારી ઘટના સામે આવી છે. સોશિયલ મીડિયા પ્લેટફોર્મ ઇન્સ્ટાગ્રામ પર મૂકવામાં આવેલી એક સામાન્ય સ્ટોરીના વિવાદમાં એક 19 વર્ષીય યુવકની ઘાતકી હત્યા કરવામાં આવતા સમગ્ર વિસ્તારમાં ચકચાર મચી જવા પામી છે. મોડી રાત્રે બનેલી આ ઘટનાથી સ્થાનિક લોકોમાં ફફડાટ વ્યાપી ગયો છે.
Juhapura Murder Case : રમઝાન માસના જૂના ઝઘડાનું વેર રાખ્યું
મળતી માહિતી મુજબ, મૃતક યુવકનું નામ મોહમ્મદ સાલીક ઈમ્તિયાઝ શેખ છે અને આરોપીનું નામ રેહાન અબ્બાસઅલી પઠાણ છે. પવિત્ર રમઝાન માસ દરમિયાન આ બંને યુવકો વચ્ચે કોઈ સામાન્ય બાબતે ઝઘડો થયો હતો. આ ઝઘડા બાદ મૃતક મોહમ્મદ સાલીકે પોતાના ઇન્સ્ટાગ્રામ એકાઉન્ટ પર એક સ્ટોરી મૂકી હતી. આરોપી રેહાન પઠાણને આ સ્ટોરી પોતાની પ્રતિષ્ઠાને નુકસાન પહોંચાડનારી લાગી હતી અને તેણે આ વાતની અદાવત મનમાં રાખી લીધી હતી.
આઇશા મસ્જિદ પાસે આંતરીને મોતને ઘાટ ઉતાર્યો
આ જૂની અદાવતનો બદલો લેવા માટે, ગત રાત્રે જ્યારે મોહમ્મદ સાલીક જુહાપુરામાં આવેલી આઇશા મસ્જિદ પાસેથી પસાર થઈ રહ્યો હતો, ત્યારે આરોપી રેહાને તેને રસ્તામાં આંતર્યો હતો. કોઈ કંઈ સમજે તે પહેલાં જ આરોપીએ સાલીક પર છરીના ઉપરાછાપરી ઘા ઝીંકી દીધા હતા. ગંભીર રીતે ઘાયલ થયેલો સાલીક લોહીલુહાણ હાલતમાં જમીન પર ઢળી પડ્યો હતો અને તેનું ઘટનાસ્થળે જ કરુણ મોત નીપજ્યું હતું.
વેજલપુર પોલીસે ગણતરીના કલાકોમાં ભેદ ઉકેલ્યો
હત્યાના આ બનાવની જાણ થતાં જ વેજલપુર પોલીસનો કાફલો તાત્કાલિક ઘટનાસ્થળે પહોંચી ગયો હતો. પોલીસે મૃતદેહનો કબજો લઈ પોસ્ટમોર્ટમ માટે મોકલી આપ્યો હતો. ત્યારબાદ, ટેકનિકલ સર્વેલન્સ અને હ્યુમન ઇન્ટેલિજન્સની મદદથી વેજલપુર પોલીસે ગણતરીના કલાકોમાં જ આ ગંભીર ગુનાનો ભેદ ઉકેલી કાઢ્યો હતો અને મુખ્ય આરોપી રેહાન અબ્બાસઅલી પઠાણની ધરપકડ કરી લીધી હતી. હાલ પોલીસ પૂછપરછ કરી રહી છે કે આ હત્યામાં અન્ય કોઈ વ્યક્તિ સામેલ છે કે કેમ.
