જો તમારા EPF ખાતામાં નામ, જન્મતારીખ કે નોકરી સાથે જોડાયેલી કોઈ માહિતી ખોટી છે, તો તેને અવગણશો નહીં. આવી ભૂલના કારણે PF ઉપાડવામાં, ટ્રાન્સફર કરવામાં અથવા પેન્શન ક્લેમ મેળવવામાં મુશ્કેલી પડી શકે છે.
કર્મચારી ભવિષ્ય નિધિ સંગઠન (EPFO) દ્વારા સભ્યોને આ વિગતો સુધારવા માટે ઓનલાઈન Joint Declaration Facilityની સુવિધા આપવામાં આવી છે. પાત્ર સભ્યો EPFO મેમ્બર પોર્ટલ પર લોગ ઇન કરીને પોતાની વ્યક્તિગત અને નોકરી સંબંધિત વિગતોમાં સુધારા માટે અરજી કરી શકે છે.
EPF ખાતામાં કઈ વિગતો સુધારી શકાય?
જોઈન્ટ ડિક્લેરેશનની સુવિધા દ્વારા પાત્ર સભ્યો EPF રેકોર્ડમાં રહેલી ખોટી વિગતો સુધારવા વિનંતી કરી શકે છે. તેમાં નામ, જન્મતારીખ અને નોકરી સાથે જોડાયેલી માહિતીનો સમાવેશ થઈ શકે છે. જોકે, કયા પ્રકારના સુધારા માટે કયા દસ્તાવેજો જરૂરી છે તે ફેરફારના આધારે નક્કી થાય છે.
EPF ખાતાની વિગતો સુધારવાની 5 સ્ટેપની પ્રક્રિયા
સ્ટેપ 1: EPFO મેમ્બર પોર્ટલ પર લોગ ઇન કરો
સૌપ્રથમ EPFOના સત્તાવાર મેમ્બર પોર્ટલ પર જાઓ. ત્યારબાદ UAN અને પાસવર્ડની મદદથી તમારા ખાતામાં લોગ ઇન કરો.
સ્ટેપ 2: Joint Declaration Facility પસંદ કરો
લોગ ઇન કર્યા બાદ પોર્ટલ પર ઉપલબ્ધ ‘Joint Declaration’ અથવા સંબંધિત પ્રોફાઇલ સુધારાના વિકલ્પ પર જાઓ.
સ્ટેપ 3: સુધારવાની વિગતો પસંદ કરો
હવે જે માહિતીમાં ફેરફાર કરવો છે તે પસંદ કરો. ઉદાહરણ તરીકે નામ, જન્મતારીખ અથવા નોકરી સંબંધિત વિગતો.
સ્ટેપ 4: સાચી માહિતી ભરી દસ્તાવેજ અપલોડ કરો
સંબંધિત વિગતો યોગ્ય રીતે ભરો. જરૂરી આધાર પુરાવા અથવા દસ્તાવેજો પોર્ટલ પર અપલોડ કરો. અરજી સબમિટ કરતાં પહેલાં તમામ વિગતો ધ્યાનથી ચકાસી લો.
સ્ટેપ 5: અરજી સબમિટ કરી સ્ટેટસ તપાસો
છેલ્લે અરજી સબમિટ કરો. ત્યારબાદ પોર્ટલ પર ઉપલબ્ધ વિકલ્પ દ્વારા અરજીની સ્થિતિ તપાસતા રહો. સુધારો મંજૂર થયા બાદ EPF રેકોર્ડમાં નવી વિગતો અપડેટ થશે.
અરજી કરતા પહેલાં આ બાબતોનું ધ્યાન રાખો
-
સુધારાની અરજીમાં સાચી અને દસ્તાવેજો સાથે મેળ ખાતી માહિતી જ ભરો.
-
નામ અને જન્મતારીખમાં ફેરફાર માટે સંબંધિત પુરાવા તૈયાર રાખો.
-
અરજી સબમિટ કર્યા બાદ તેની સ્થિતિ તપાસતા રહો.
-
સુધારાની મંજૂરી માટે EPFOની ચકાસણી અથવા નોકરીદાતાની પ્રક્રિયા લાગુ પડી શકે છે.
ઓક્ટોબરમાં EPFOએ 2.36 લાખ ફરિયાદોનો નિકાલ કર્યો
શ્રમ મંત્રાલય દ્વારા આપવામાં આવેલી માહિતી મુજબ, EPFOએ ઓક્ટોબર 2026માં સ્પેશિયલ કેમ્પેન 6 દરમિયાન કુલ 2,36,021 જાહેર ફરિયાદોનો નિકાલ કર્યો હતો. આ સંખ્યા 2,05,000 ફરિયાદોના નિર્ધારિત લક્ષ્ય કરતાં આશરે 15 ટકા વધુ છે.
આમાંથી 2,02,984 ફરિયાદો EPFOના ફરિયાદ નિવારણ પોર્ટલ EPFiGMS દ્વારા ઉકેલવામાં આવી હતી. જ્યારે 33,037 ફરિયાદોનો નિકાલ CPGRAMS મારફતે કરવામાં આવ્યો હતો.
WhatsApp દ્વારા પણ PFની માહિતી મેળવી શકાશે
EPFOએ ડિજિટલ સેવાઓનો વિસ્તાર કરતાં વેરિફાઇડ WhatsApp સેવા પણ શરૂ કરી છે. તેના દ્વારા સભ્યો PF બેલેન્સ, છેલ્લાં પાંચ ટ્રાન્ઝેક્શન અને પાસબુક સંબંધિત માહિતી મેળવી શકે છે.
આથી EPF સભ્યોએ સમયાંતરે પોતાના ખાતાની વિગતો તપાસવી જોઈએ. નામ, જન્મતારીખ કે નોકરી સંબંધિત કોઈ ભૂલ જણાય તો સમયસર સુધારા માટે અરજી કરવી હિતાવહ છે.
