India vs New Zealand 1st T20: ભારત અને ન્યૂઝીલેન્ડ વચ્ચે પાંચ મેચોની ટી20 સિરીઝનો ગુરુવારથી રોમાંચક પ્રારંભ થયો છે. ક્રાઇસ્ટચર્ચના મેદાન પર રમાયેલી પ્રથમ મેચમાં જ ભારતીય ટીમે ન્યૂઝીલેન્ડ સામે 226 રનનો વિશાળ લક્ષ્યાંક સફળતાપૂર્વક હાંસલ કરીને નવો ઈતિહાસ રચી દીધો છે. આ સાથે જ ભારતે ટી20 આંતરરાષ્ટ્રીય ક્રિકેટમાં પોતાનો સૌથી મોટો રન ચેઝ કરવાનો મહારેકોર્ડ પણ પોતાના નામે કરી લીધો છે. અગાઉ ભારતે ટી20 ક્રિકેટમાં ક્યારેય 220થી વધુ રનનો ટાર્ગેટ ચેઝ કર્યો ન હતો.
આ મેચમાં ભારતીય ટીમના કેપ્ટન શ્રેયસ ઐયરે ટોસ જીતીને પ્રથમ ફિલ્ડિંગ કરવાનો નિર્ણય લીધો હતો. પ્રથમ બેટિંગ કરવા ઉતરેલી ન્યૂઝીલેન્ડની ટીમે નિર્ધારિત 20 ઓવરમાં 4 વિકેટ ગુમાવીને 225 રનનો વિશાળ સ્કોર ખડક્યો હતો. કિવી ટીમ તરફથી ગ્લેન ફિલિપ્સે શાનદાર બેટિંગ કરતા અણનમ 82 રન ફટકાર્યા હતા, જ્યારે ફિન એલને પણ આક્રમક 45 રનની ઇનિંગ રમી હતી.
India vs New Zealand 1st T20: સંજુ સેમસન અને અભિષેક શર્માએ અપાવી શાનદાર શરૂઆત
કિવી પરિસ્થિતિઓમાં 226 રનનો પીછો કરવો અત્યંત મુશ્કેલ લાગતો હતો. ટીમ ઈન્ડિયાએ પહેલાં ક્યારેય આટલા રનનો પીછો કર્યો ન હતો. પરંતુ, ઓપનર સંજુ સેમસન અને અભિષેક શર્માએ ટીમને આક્રમક અને ઝડપી શરૂઆત અપાવીને જીતનો પાયો નાખ્યો હતો. સંજુ સેમસને ધમાકેદાર બેટિંગ કરતા 67 રન બનાવ્યા હતા.
ત્યારબાદ કેપ્ટન શ્રેયસ ઐયરે જવાબદારીપૂર્વક રમીને 42 રન અને નમન ધીરે પણ નિર્ણાયક 42 રનનું યોગદાન આપ્યું હતું. ભારતે મેચની છેલ્લી ઓવરના ચોથા બોલ પર 6 વિકેટ ગુમાવીને આ ઐતિહાસિક લક્ષ્યાંક પાર પાડી લીધો હતો. શાનદાર 67 રનની ઇનિંગ રમીને ભારતને ઐતિહાસિક જીત અપાવનાર સંજુ સેમસનને ‘પ્લેયર ઓફ ધ મેચ’ જાહેર કરવામાં આવ્યો હતો. આ શાનદાર જીત સાથે ભારતે પાંચ મેચની સિરીઝમાં 1-0 ની લીડ મેળવી લીધી છે.
Mahemdavad Nagarpalika Dispute: મહેમદાવાદ નગરપાલિકામાં વિવાદનો સુખદ અંત, પ્રમુખ સામેની અવિશ્વાસની દરખાસ્ત પરત ખેંચાઈ
