Naseeruddin Shah BJP Criticism: જાણીતા અભિનેતા નસીરુદ્દીન શાહે ફરી એકવાર ભારતીય જનતા પાર્ટી (BJP) પર તીખા પ્રહાર કર્યા છે. શનિવારે આપેલા એક નિવેદનમાં તેમણે ભાજપ પર પશ્ચિમ બંગાળની ચૂંટણીમાં ગોટાળા કરીને જીત મેળવવાનો ગંભીર આરોપ લગાવ્યો છે. તેમણે દાવો કર્યો હતો કે ભાજપ પોતાની વિચારધારા અને નીતિઓ સાથે અસંમત રહેનારા લોકો સામે બદલાની ભાવનાથી કામ કરી રહી છે. અભિનેતાના આ કથિત બદલાની નીતિના તાજેતરના ભોગ સત્યજીત રે ફિલ્મ એન્ડ ટેલિવિઝન ઇન્સ્ટિટ્યૂટ (SRFTI) ના વિદ્યાર્થીઓ અને યુવા ફિલ્મ નિર્માતાઓ બન્યા છે. નસીરુદ્દીન શાહે ભાજપને “ખોટી પાર્ટી” ગણાવતા કહ્યું હતું કે પાર્ટીના વલણ સામે બોલનારાઓ પર સતત દબાણ વધારવામાં આવી રહ્યું છે.
વિદ્યાર્થીઓ પર દબાણ લાવવાના મુદ્દે બોલતાં અભિનેતાએ જણાવ્યું હતું કે સંસ્થાના વહીવટીતંત્ર સામે સવાલો પૂછવાને બદલે વિદ્યાર્થીઓને કારણદર્શક નોટિસો આપવામાં આવી રહી છે, તેમની પર નજર રાખવામાં આવી રહી છે અને હવે તેમને છાત્રાલય ખાલી કરવા માટે કહેવામાં આવ્યું છે. તેમણે આરોપ લગાવ્યો કે ભાજપ માત્ર પોતાના પક્ષનો પ્રચાર કરવા સુધી સીમિત નથી, પરંતુ તે લોકોના બ્રેઈનવોશ કરવાનો અને ડરાવવાનો પ્રયાસ કરી રહી છે.
Naseeruddin Shah BJP Criticism: મુખ્ય ચૂંટણી કમિશનર સામેના વિરોધ પ્રદર્શનમાં હાજરી
અભિનેતા નસીરુદ્દીન શાહ હાલ ‘કોકરોચ જનતા પાર્ટી’ (CJP) ને સમર્થન આપી રહ્યા છે, જે મુખ્ય ચૂંટણી કમિશનર જ્ઞાનેશ કુમારના રાજીનામાની માંગ સાથે વિરોધ કરી રહી છે. તાજેતરમાં 2 ઓક્ટોબરના રોજ તેઓ મુંબઈના દાદર સ્થિત શિવાજી પાર્ક ખાતે CJP ના સ્થાપક અભિજીત દીપકને મળવા પહોંચ્યા હતા, જ્યાં સંગઠન દ્વારા વિરોધ પ્રદર્શન કરવામાં આવી રહ્યું હતું. આ પ્રદર્શનમાં નસીરુદ્દીન શાહની ઉપસ્થિતિએ રાજકીય વર્તુળોમાં વ્યાપક ધ્યાન ખેંચ્યું હતું.
