MEA statement on Hormuz : પશ્ચિમ એશિયામાં ઈરાન અને ઇઝરાયલ-અમેરિકા વચ્ચે ચાલી રહેલા ભીષણ યુદ્ધની અસર હવે વૈશ્વિક સ્તરે દેખાઈ રહી છે. તાજેતરમાં જ અમેરિકી રાષ્ટ્રપતિ ડોનાલ્ડ ટ્રમ્પે ભારત, ચીન, જાપાન અને બ્રિટન સહિતના દેશોને અપીલ કરી હતી કે તેઓ ‘સ્ટ્રેટ ઓફ હોર્મુઝ’ (Strait of Hormuz) માં પોતાના યુદ્ધપોત મોકલે, જેથી આ મહત્વપૂર્ણ જળમાર્ગને સુરક્ષિત અને ખુલ્લો રાખી શકાય. જોકે, ભારત સરકારે સોમવારે આ મામલે પોતાનું વલણ એકદમ સ્પષ્ટ કરી દીધું છે.
ભારતના વિદેશ મંત્રાલયે સ્પષ્ટતા કરતા જણાવ્યું છે કે, હોર્મુઝમાં જહાજોની સુરક્ષિત અવરજવર સુનિશ્ચિત કરવાના મુદ્દે હાલમાં અમેરિકા સાથે કોઈ જ પ્રકારની દ્વિપક્ષીય ચર્ચા કરવામાં આવી નથી. વિદેશ મંત્રાલયના પ્રવક્તા રણધીર જયસ્વાલે એક પ્રેસ બ્રીફિંગમાં જણાવ્યું હતું કે ભારત અન્ય દેશો વચ્ચે ચાલી રહેલી આ ચર્ચાઓથી વાકેફ છે, પરંતુ આ મુદ્દે ભારત વિવિધ હિતધારકો (Stakeholders) સાથે જ પોતાની વાતચીત ચાલુ રાખશે અને પરિસ્થિતિ પર નજર રાખશે.
MEA statement on Hormuz : ટ્રમ્પની અપીલ:
અમેરિકી રાષ્ટ્રપતિ ડોનાલ્ડ ટ્રમ્પે તેમના સોશિયલ મીડિયા પ્લેટફોર્મ ‘ટ્રુથ સોશિયલ’ પર પોસ્ટ કરીને કહ્યું હતું કે ઈરાન દ્વારા હોર્મુઝ જળમાર્ગ બંધ કરવાથી અનેક દેશો પ્રભાવિત થયા છે, તેથી તમામ દેશોએ પોતાના યુદ્ધપોત મોકલીને આ માર્ગ ખુલ્લો રખાવવા માટે આગળ આવવું જોઈએ.
વિદેશ મંત્રાલયનું નિવેદન: પ્રવક્તા રણધીર જયસ્વાલે સ્પષ્ટ કર્યું, “અમને જાણ છે કે આ વિશેષ મુદ્દે ઘણા દેશોમાં ચર્ચા થઈ રહી છે, પરંતુ અમે હજી સુધી દ્વિપક્ષીય સ્તરે અમેરિકા સાથે આ અંગે કોઈ ચર્ચા કરી નથી.”
ઈરાનની નાકાબંધીનું કારણ: અમેરિકા અને ઇઝરાયલના સતત હુમલાઓના જવાબમાં ઈરાને હોર્મુઝ જળમાર્ગ પર વેપારી જહાજોની અવરજવર રોકી દીધી છે, જેનાથી દુનિયાભરમાં પેટ્રોલ-ડીઝલ અને ગેસનું મોટું સંકટ ઊભું થયું છે.
આંશિક રાહત: હાલમાં મળતા અહેવાલો મુજબ, ઈરાને કેટલાક પસંદગીના દેશોના જહાજોને હોર્મુઝમાંથી સુરક્ષિત પસાર થવાની ખાતરી આપી છે, જેનાથી આ માર્ગ પર જહાજોની અવરજવર આંશિક રીતે ફરી શરૂ થઈ શકી છે.
આ પણ વાંચો: Shivalik LPG ship Mundra : LPG સંકટ ટળ્યું: 45000 ટન ગેસ સાથે ભારતીય જહાજ શિવાલિક મુન્દ્રા પહોંચ્યું
