NCRB Animal Cruelty Report 2024: ભારતમાં પ્રથમવાર અબોલ જીવો પ્રત્યે દાખવવામાં આવતી નિર્દયતાના આંકડા સત્તાવાર રીતે જાહેર કરવામાં આવ્યા છે. નેશનલ ક્રાઈમ રેકોર્ડ્સ બ્યુરો [National Crime Records Bureau – NCRB] એ તેના તાજેતરના ‘ક્રાઈમ ઇન ઇન્ડિયા 2024’ રિપોર્ટમાં પ્રાણીઓ સાથેની ક્રૂરતા સાથે જોડાયેલા કેસોને વિશિષ્ટ સ્થાન આપ્યું છે. આ ડેટા ‘પ્રિવેન્શન ઓફ ક્રૂઅલ્ટી ટુ એનિમલ્સ એક્ટ, 1960’ [Prevention of Cruelty to Animals Act, 1960] હેઠળ નોંધાયેલા કેસોના આધારે તૈયાર કરવામાં આવ્યો છે.
NCRB Animal Cruelty Report 2024: પ્રાણીઓ સામેના ગુના અને પોલીસ કાર્યવાહી
NCRB ના અહેવાલ મુજબ, વર્ષ 2024 માં સમગ્ર દેશમાં પ્રાણીઓ પર ક્રૂરતાના કુલ 9,039 કેસ નોંધાયા હતા. આ ગુનાઓ સંદર્ભે પોલીસે કુલ 10,312 વ્યક્તિઓની ધરપકડ કરી હતી, જેમાં ચોંકાવનારી વિગત એ છે કે ધરપકડ કરાયેલા લોકોમાં 99.5 ટકા એટલે કે 10,257 પુખ્ત પુરુષો હતા. તપાસના સ્તરે પોલીસે સરાહનીય કામગીરી કરતા 96.7% કેસોમાં ચાર્જશીટ [Charge Sheet] દાખલ કરી છે, જોકે વર્ષના અંત સુધીમાં હજુ પણ 2,070 કેસો પેન્ડિંગ રહ્યા છે.
અદાલતી ચુકાદા અને ન્યાયમાં વિલંબ
અદાલતી કાર્યવાહીમાં સજાનો દર [Conviction Rate] ઘણો પ્રોત્સાહક રહ્યો છે. રાષ્ટ્રીય સ્તરે આ દર 80.5% છે, જ્યારે મેટ્રો શહેરોમાં તો તે 93.3% સુધી પહોંચી ગયો છે. આ આંકડા સૂચવે છે કે નોંધાયેલા કેસોમાં પૂરતા પુરાવાઓ ઉપલબ્ધ હોય છે. તેમ છતાં, ન્યાયિક પ્રક્રિયામાં વિલંબ એક મોટી ચિંતા છે, કારણ કે 82.2% કેસ હજુ પણ અદાલતોમાં લંબિત [Pending Cases] છે અને કેટલાક કિસ્સાઓ તો 10 વર્ષથી વધુ સમયથી અટવાયેલા છે.
પશુઓની ચોરી અને આર્થિક પાસું
આ રિપોર્ટમાં માત્ર ક્રૂરતા જ નહીં પરંતુ પ્રાણીઓની ચોરીના 8,660 કેસોનો પણ ઉલ્લેખ છે. ચોરી થયેલા પશુઓની અંદાજિત કિંમત 48.8 કરોડ રૂપિયા આંકવામાં આવી છે. રાહતની વાત એ છે કે પોલીસે 44.9 ટકા કિસ્સાઓમાં પશુઓને રિકવર [Recovery rate] કરી લીધા છે, જે મિલકત સંબંધિત અન્ય ગુનાઓની સરખામણીએ વધુ સારી કામગીરી દર્શાવે છે.
નિષ્ણાતોનો મત: એક ઐતિહાસિક પગલું
‘પીપલ્સ ફોર એનિમલ્સ’ [People for Animals – PFA] સંસ્થાના શ્રીમોયી ચક્રવર્તીએ આ પગલાને ઐતિહાસિક ગણાવ્યું છે. પ્રાણીઓ વિરુદ્ધના ગુનાઓને રાષ્ટ્રીય ગુનાના આંકડામાં સ્થાન મળવાથી હવે ભવિષ્યમાં વધુ મજબૂત કાયદા અને નીતિઓ [Policy Making] બનાવવામાં સરળતા રહેશે. આ ડેટા ઉપલબ્ધ થવાથી ગુનાની પેટર્નને સમજવામાં અને તેને અટકાવવા માટેના અસરકારક માર્ગો શોધવામાં મદદ મળશે.
આ પણ વાંચો: NCRB રિપોર્ટ 2024: દેશમાં ખેડૂતોની આત્મહત્યાના આંકડામાં ઘટાડો
