Parbhani Temple Accident મહારાષ્ટ્રના પરભણી (Parbhani) જિલ્લામાંથી એક અત્યંત ચોંકાવનારી અને હૃદયદ્રાવક દુર્ઘટના સામે આવી છે. સત્તાવાર અહેવાલ અનુસાર, પરભણીમાં આવેલા એક પ્રખ્યાત હનુમાન મંદિરના સભા મંડપની છત અચાનક પત્તાના મહેલની જેમ ધરાશાયી થઈ ગઈ છે. આ ભયાનક અકસ્માત સમયે મંદિરમાં દર્શન અને ભજન-કીર્તન માટે અસંખ્ય શ્રદ્ધાળુઓ હાજર હતા, જેના કારણે અનેક લોકો કાટમાળ નીચે દબાઈ ગયા હોવાની આશંકા સેવાઈ રહી છે. ઘટનાને પગલે આખા વિસ્તારમાં ભારે નાસભાગ અને અફરાતફરીનો માહોલ સર્જાયો છે. પ્રાથમિક માહિતી અનુસાર પાંચ લોકોના મોત થયા છે.
Parbhani Temple Accident ભજન દરમિયાન અચાનક તૂટી પડી છત, સ્થાનિકોએ શરૂ કર્યું રેસ્ક્યુ [Parbhani Hanuman Temple Accident]
અહેવાલ અનુસાર, આ દુર્ઘટના પરભણીના ગ્રામ્ય વિસ્તારમાં સ્થિત મંદિરમાં બની હતી. જ્યારે શ્રદ્ધાળુઓ સભા મંડપમાં એકત્રિત થઈને પૂજા-અર્ચના કરી રહ્યા હતા, ત્યારે જ કોઈ પણ પ્રકારની ચેતવણી વિના મંડપની સ્લેબવાળી છત જોરદાર અવાજ સાથે નીચે તૂટી પડી હતી. આસપાસના ગ્રામજનો અવાજ સાંભળીને તાત્કાલિક ઘટનાસ્થળે દોડી આવ્યા હતા અને કાટમાળ નીચે ફસાયેલા લોકોને બહાર કાઢવા માટે પોતાના સ્તરે જ બચાવ કામગીરી શરૂ કરી દીધી હતી. પ્રાથમિક માહિતી મુજબ, આ અકસ્માતમાં અનેક લોકો ગંભીર રીતે ઘાયલ થયા છે, જેમને સ્થાનિક વાહનો અને એમ્બ્યુલન્સ મારફતે નજીકની હોસ્પિટલમાં ખસેડવામાં આવી રહ્યા છે.
વહીવટી તંત્ર અને પોલીસ કાફલો ઘટનાસ્થળે, હોસ્પિટલો એલર્ટ પર
અહેવાલ અનુસાર, ઘટનાની જાણ થતાં જ સ્થાનીય પોલીસ સ્ટેશનનો કાફલો અને જિલ્લા વહીવટી તંત્રના ઉચ્ચ અધિકારીઓ તાત્કાલિક ઘટનાસ્થળે પહોંચી ગયા છે. કાટમાળ ઘણો મોટો અને વજનદાર હોવાથી તેને ઝડપથી હટાવવા માટે જેસીબી (JCB) મશીનો અને ક્રેનની મદદ લેવામાં આવી રહી છે. કાટમાળ નીચે હજુ પણ કેટલાક લોકો દબાયેલા હોવાની આશંકાને પગલે રાહત અને બચાવ કામગીરી એકદમ યુદ્ધના ધોરણે ચલાવવામાં આવી રહી છે. સ્થાનિક સરકારી હોસ્પિટલના ડોક્ટરો અને મેડિકલ સ્ટાફને પણ કટોકટીની સ્થિતિને પહોંચી વળવા માટે એલર્ટ પર રાખવામાં આવ્યા છે. મંદિરની છત કયા કારણોસર તૂટી પડી તે અંગે તંત્ર દ્વારા તપાસના આદેશ આપવામાં આવ્યા છે.
આ પણ વાંચો: કચ્છનો ‘ફોસિલ પાર્ક’ બનશે આંતરરાષ્ટ્રીય સંગ્રહાલય: પ્રવાસન વિભાગનો મોટો પ્લાન!
