Manjalpur By-Election : માંજલપુરના દિગ્ગજ નેતા અને ધારાસભ્ય યોગેશ પટેલના નિધન બાદ ખાલી પડેલી વિધાનસભા બેઠક માટે પેટાચૂંટણી જાહેર કરવામાં આવી છે. ચૂંટણી પંચના કાર્યક્રમ મુજબ, આ બેઠક માટે તા. ૦૬ જુલાઈ ૨૦૨૬ના રોજ જાહેરનામું પ્રસિદ્ધ કરવામાં આવ્યું છે. આગામી ૩૦ જુલાઈ ૨૦૨૬ના રોજ મતદાન થશે અને ૩ ઓગસ્ટ ૨૦૨૬ના રોજ પરિણામ જાહેર કરવામાં આવશે. એક વર્ષની ટૂંકી મુદત હોવા છતાં, આ બેઠક પર ભાજપની ટિકિટ મેળવવા માટે દાવેદારોમાં ભારે ઉત્સાહ જોવા મળી રહ્યો છે.
Manjalpur By-Election : ભાજપમાં ટિકિટ માટે ખેંચતાણ: ૧૦૪ ઉમેદવારોની દાવેદારી
માંજલપુર પેટાચૂંટણીને લઈને રાજકીય ગરમાવો ટોચ પર છે. આધારભૂત સૂત્રોના જણાવ્યા અનુસાર ભારતીય જનતા પાર્ટી (BJP) દ્વારા હાથ ધરવામાં આવેલી સેન્સ પ્રક્રિયામાં ટિકિટ મેળવવા માટે કુલ ૧૦૪ ઉમેદવારોએ પોતાની દાવેદારી નોંધાવી છે. જેમાં ૮૩ પુરુષ અને ૨૧ મહિલા ઉમેદવારોનો સમાવેશ થાય છે. આટલી મોટી સંખ્યામાં દાવેદારીએ સ્થાનિક રાજકારણમાં ચર્ચા જગાવી છે. સૂત્રોના જણાવ્યા અનુસાર, આગામી સપ્તાહમાં ભાજપ હાઈકમાન્ડ દ્વારા પોતાના ઉમેદવારના નામની સત્તાવાર જાહેરાત કરવામાં આવશે.
ચૂંટણીની તૈયારીઓ અને યોગેશ પટેલનો વારસો
આ પેટાચૂંટણીને શાંતિપૂર્ણ અને ન્યાયી રીતે સંપન્ન કરાવવા માટે તંત્ર દ્વારા કમર કસવામાં આવી છે. ચૂંટણી ફરજ માટે ૧૮ જેટલા નોડલ ઓફિસરોની નિમણૂક કરવામાં આવી છે. આ બેઠકનું મહત્વ એટલે પણ વધુ છે કારણ કે સ્વ. યોગેશ પટેલ ૨૦૧૭ અને ૨૦૨૨ જેવી ચૂંટણીઓમાં અહીંથી સતત મોટી લીડ સાથે વિજયી બન્યા હતા. તેમનો મજબૂત રાજકીય વારસો જાળવી રાખવા માટે ભાજપ માટે આ ચૂંટણી પ્રતિષ્ઠાનો જંગ બની રહેશે.
તંત્ર દ્વારા ચૂંટણીના આયોજન માટે તમામ સુરક્ષા વ્યવસ્થાઓ અને વહીવટી પ્રક્રિયાઓ શરૂ કરી દેવામાં આવી છે. ઉમેદવારી ફોર્મ ભરવાની પ્રક્રિયા અને આચારસંહિતાના ચુસ્ત અમલ સાથે વડોદરાના રાજકીય વાતાવરણમાં ગરમાવો જોવા મળી રહ્યો છે.
આ પણ વાંચો: નીરવ મોદીના ભારત પ્રત્યાર્પણનો માર્ગ મોકળો: કાયદાકીય અવરોધો દૂર, હવે ગમે ત્યારે થઈ શકે છે ભારત વાપસી
