Strait of Hormuz Attack : હોર્મુઝ: દુનિયાના સૌથી વ્યસ્ત અને મહત્વપૂર્ણ દરિયાઈ માર્ગોમાંના એક ‘સ્ટ્રેટ ઓફ હોર્મુઝ’ (Strait of Hormuz) માં ફરી એકવાર હિંસા ભડકી ઉઠી છે. ઓમાનના કિનારા પાસેથી પસાર થઈ રહેલા ત્રણ તેલ ટેન્કરો પર મિસાઈલ અને ડ્રોનથી ભીષણ હુમલા કરવામાં આવ્યા છે, જેના કારણે વૈશ્વિક ઉર્જા પુરવઠા અને આંતરરાષ્ટ્રીય દરિયાઈ સુરક્ષા સામે મોટું જોખમ ઊભું થયું છે. એપ્રિલ 2026 પછી આ પ્રથમ વખત છે કે એક જ દિવસમાં આટલા મોટા પાયે જહાજોને નિશાન બનાવવામાં આવ્યા છે.
Strait of Hormuz Attack : કતરના LNG ટેન્કર ‘LNGC AL REKAYYAT’ પર મિસાઈલ હુમલો
યુનાઈટેડ કિંગડમ મેરીટાઈમ ટ્રેડ ઓપરેશન્સ (UKMTO) અનુસાર, પ્રથમ હુમલો કતરના LNG ટેન્કર ‘LNGC AL REKAYYAT’ પર થયો હતો. જ્યારે આ જહાજ સ્ટ્રેટમાંથી નીકળીને ઓમાનની ખાડી તરફ વધી રહ્યું હતું, ત્યારે તેના ડાબી બાજુના ભાગ પર મિસાઈલ દાગવામાં આવી હતી, જેનાથી ટેન્કરમાં ભીષણ આગ લાગી ગઈ હતી. ઈરાની સરકારી ટેલિવિઝને દાવો કર્યો કે ટેન્કરે ઈરાનની ચેતવણીઓને નજરઅંદાજ કરી હતી. કતરના વિદેશ મંત્રાલયના પ્રવક્તા ડૉ. માજેદ અલ-અન્સારીએ આ હુમલાને આંતરરાષ્ટ્રીય કાયદાનું ઉલ્લંઘન ગણાવી ઈરાનને જવાબદાર ઠેરવ્યું છે.
The targeting of the Qatari vessel “Al-Rekayyat” while transiting near the Strait of Hormuz constitutes an unacceptable attack on the security & safety of international maritime navigation, the security of global energy supplies, & a grave & explicit violation of international…
— د. ماجد محمد الأنصاري Dr. Majed Al Ansari (@majedalansari) July 7, 2026
ડ્રોનથી અન્ય બે જહાજો પર હુમલો
પ્રથમ ઘટનાના થોડા સમય બાદ જ અન્ય બે ટેન્કરોને પણ નિશાન બનાવવામાં આવ્યા હતા, જેમાંથી એક પર ડ્રોન હુમલો થયો હતો. સદનસીબે, આ બંને જહાજોને માત્ર આંશિક નુકસાન થયું છે અને કોઈ પણ ક્રૂ મેમ્બર ઘાયલ થયાના સમાચાર નથી. હુમલા બાદ એક જહાજ સુરક્ષિત રીતે પોતાના માર્ગે આગળ વધી ગયું હતું.
દરિયાઈ રૂટને લઈને વિવાદ અને તણાવ
આ સમગ્ર વિવાદની જડ ‘સ્ટ્રેટ ઓફ હોર્મુઝ’ના રૂટને લઈને છે. ઈરાનનો આગ્રહ છે કે જહાજોએ તેના દ્વારા મંજૂર કરાયેલા રૂટ (ઉત્તરી માર્ગ)નો ઉપયોગ કરવો જોઈએ અને ત્યાં રજીસ્ટ્રેશન કરાવવું જોઈએ. બીજી તરફ, અમેરિકન નૌકાદળની દેખરેખ હેઠળના વૈકલ્પિક રૂટ (દક્ષિણી માર્ગ)નો ઉપયોગ કરતા જહાજોને ઈરાન દ્વારા નિશાન બનાવવામાં આવી રહ્યા હોવાની આશંકા છે. અમેરિકન નૌકાદળે આ રૂટને સુરક્ષિત ગણાવ્યો હોવા છતાં, ઈરાને આપેલી ચેતવણીને કારણે આ વિસ્તારમાં તણાવ ચરમસીમા પર છે. આ હુમલાઓ વૈશ્વિક બજારમાં કાચા તેલ અને ગેસના ભાવ પર અસર કરી શકે છે.
આ પણ વાંચો: નીરવ મોદીના ભારત પ્રત્યાર્પણનો માર્ગ મોકળો: કાયદાકીય અવરોધો દૂર, હવે ગમે ત્યારે થઈ શકે છે ભારત વાપસી
