Godhra Bus Station Fire: ગુજરાતના ગોધરા શહેરના ભુરાવાવ વિસ્તારમાં આવેલા અસ્થાયી બસ સ્ટેશનમાં સોમવારે મોડી રાત્રે ભીષણ આગ લાગતાં ભારે નુકસાન થયું હતું. આગની લપેટમાં બસ સ્ટેશન પરિસરની પાંચ દુકાનો, કંટ્રોલ રૂમ અને પાર્સલ ઓફિસ આવી ગયાં હતાં. ફાયર વિભાગની ટીમે ભારે જહેમત બાદ આગ પર કાબૂ મેળવ્યો હતો. સદનસીબે આ ઘટનામાં કોઈ જાનહાનિ થઈ નથી.
આગ લાગ્યા બાદ જોતજોતામાં જ્વાળાઓએ વિકરાળ સ્વરૂપ ધારણ કર્યું હતું. બસ સ્ટેશન પરિસરમાં પ્લાસ્ટિકની વસ્તુઓ અને અન્ય જ્વલનશીલ સામગ્રી હોવાથી આગ ઝડપથી ફેલાઈ હોવાનું પ્રાથમિક રીતે જાણવા મળ્યું છે.
ઘટનાની જાણ થતાં ગોધરા ફાયર વિભાગનાં ઉપલબ્ધ ફાયર ફાઇટર વાહનો તાત્કાલિક સ્થળ પર પહોંચ્યાં હતાં. ફાયર કર્મચારીઓએ આગ બુઝાવવાની કામગીરી શરૂ કરી હતી. ઘટનાની ગંભીરતાને ધ્યાનમાં રાખીને ગોધરા શહેરના A અને B ડિવિઝનના પોલીસ ઇન્સ્પેક્ટરો પણ પોલીસ કાફલા સાથે ઘટનાસ્થળે પહોંચ્યા હતા.
Godhra Bus Station Fire: પાંચ દુકાનો સહિત પાર્સલ ઓફિસને નુકસાન
આગને કારણે બસ સ્ટેશનની પાંચ દુકાનો અને કંટ્રોલ રૂમ સંપૂર્ણપણે બળીને ખાક થઈ ગયાં હતાં. આ ઉપરાંત પાર્સલ ઓફિસને પણ ભારે નુકસાન પહોંચ્યું છે. આ ઓફિસ મારફતે લોકો પોતાનો સામાન અલગ-અલગ શહેરોમાં મોકલતા હોય છે. આગને કારણે ઓફિસમાં રાખવામાં આવેલા પાર્સલ અને અન્ય સામાનને પણ નુકસાન થયું હોવાની આશંકા છે.
પ્રાથમિક તપાસમાં આગનું કારણ શોર્ટ સર્કિટ હોવાનું અનુમાન લગાવવામાં આવી રહ્યું છે. જોકે, આ અંગે સત્તાવાર પુષ્ટિ થઈ નથી. આગ લાગવાનું ચોક્કસ કારણ જાણવા ફાયર વિભાગ દ્વારા તપાસ હાથ ધરવામાં આવી રહી છે.
હાલમાં આગથી થયેલા કુલ આર્થિક નુકસાનનું મૂલ્યાંકન કરવામાં આવી રહ્યું છે. તપાસ પૂર્ણ થયા બાદ જ નુકસાનની વાસ્તવિક રકમ અને આગ લાગવાનું ચોક્કસ કારણ સ્પષ્ટ થઈ શકશે.

