Adalaj Canal Tragedy ગાંધીનગરના અડાલજ-ઝુંડાલ (Adalaj-Zundal) વિસ્તારમાં આવેલી નર્મદા કેનાલ (Narmada Canal) આજે પાંચ મિત્રો માટે કાળમુખી સાબિત થઈ છે. પાર્ટી કરીને પરત ફરી રહેલા મિત્રોના ગ્રુપમાંથી ત્રણ યુવકો કેનાલના ઊંડા અને ધસમસતા પાણીમાં ગરકાવ થઈ જતાં અરેરાટી વ્યાપી ગઈ છે.
Adalaj Canal Tragedy : શું હતી ઘટના?
મળતી માહિતી મુજબ, પાંચ મિત્રોનું ગ્રુપ કેનાલ કિનારે પહોંચ્યું હતું. તરવાની સ્પર્ધા કરવાના અતિવિશ્વાસમાં એક યુવકે કેનાલમાં છલાંગ લગાવી હતી, પરંતુ તે ડૂબવા લાગતા તેને બચાવવા ગયેલા અન્ય ચાર મિત્રો પણ પાણીમાં ઉતરી પડ્યા હતા. ભારે પ્રવાહ વચ્ચે બે મિત્રો કોઈક રીતે કિનારે આવીને બચવામાં સફળ રહ્યા હતા, પરંતુ ત્રણ યુવકો પાણીમાં તણાઈ ગયા હતા.
તંત્રની કાર્યવાહી અને પોલીસ નિવેદન
ઘટનાની જાણ થતાં જ અડાલજ પોલીસ (Adalaj Police) અને ફાયર બ્રિગેડની ટીમ ઘટનાસ્થળે પહોંચી હતી. સર્ચ ઓપરેશન દરમિયાન હર્ષ પ્રજાપતિનો મૃતદેહ જમીયતપુરા (Jamiyatpura) કેનાલમાંથી અને કૌશિક ઠાકોરનો મૃતદેહ ખોરજ (Khoj) કેનાલમાંથી મળી આવ્યો છે, જ્યારે અર્પિત પટેલની શોધખોળ હજુ ચાલુ છે. અડાલજ પોલીસ સ્ટેશનના પીઆઈ એસ.જી. દેસાઈએ જણાવ્યું કે, પોલીસે અકસ્માતે મોતનો ગુનો નોંધી વધુ તપાસ હાથ ધરી છે. તંત્રએ યુવાનોને કેનાલ જેવા જોખમી વિસ્તારોમાં ન જવાની સખત અપીલ કરી છે.
નોંધનીય છે કે ગાંધીનગરના અડાલજ પાસેની નર્મદા કેનાલમાં તરવા ઉતરેલા પાંચ મિત્રોમાંથી ત્રણના મોત નિપજતા ભારે ગમગીની ફેલાઈ છે. પાર્ટી કરીને પરત ફરી રહેલા આ મિત્રોએ તરવાની સ્પર્ધા કરી હતી, જે જીવલેણ સાબિત થઈ. ફાયર બ્રિગેડ દ્વારા બે મૃતદેહો શોધી કાઢવામાં આવ્યા છે, જ્યારે એક યુવકની શોધખોળ હજુ પણ ચાલુ છે. પોલીસ દ્વારા કેનાલના ધસમસતા પ્રવાહમાં જોખમી સાહસ ન કરવા માટે કડક ચેતવણી આપવામાં આવી છે.
આ પણ વાંચો: અમદાવાદમાં મેઘરાજાનું રૌદ્ર સ્વરૂપ: મધરાત સુધી અતિભારે વરસાદની ચેતવણી
