Maruti Suzuki E20 Fuel Case : ઈ-20 (E20) બ્લેન્ડેડ પેટ્રોલના ઉપયોગને લઈને ચાલી રહેલી રાષ્ટ્રીય ચર્ચાઓ વચ્ચે રાયપુરની કન્ઝ્યુમર કોર્ટે એક મહત્વપૂર્ણ અને ગ્રાહક લક્ષી ચુકાદો આપ્યો છે. અદાલતે મારુતિ સુઝુકીને આદેશ આપ્યો છે કે તે તેના એક ગ્રાહકની ક્ષતિગ્રસ્ત ‘ગ્રાન્ડ વિટારા’ કાર બદલી આપે અને તેના બદલે E20 ઈંધણના અનુકૂળ (E20 Compatible) નવું મોડેલ ઉપલબ્ધ કરાવે. આ ચુકાદો કાર ખરીદનારા ગ્રાહકો માટે એક મોટી રાહત સમાન છે અને વાહન ઉત્પાદક કંપનીઓની જવાબદારી નક્કી કરનારો સાબિત થયો છે.
Maruti Suzuki E20 Fuel Case : શું હતો સમગ્ર વિવાદ?
આ કેસની વિગતો મુજબ, એક ગ્રાહકે મારુતિ સુઝુકીની ગ્રાન્ડ વિટારા કાર ખરીદી હતી. કાર ખરીદ્યાના થોડા સમય બાદ જ્યારે તેમાં સરકારી નિર્દેશો મુજબ મળતું E20 પેટ્રોલ (20% ઈથેનોલ મિશ્રિત) પૂરવામાં આવ્યું, ત્યારે ગાડીમાં વારંવાર ટેકનિકલ ખામીઓ સર્જાવા લાગી હતી. તપાસ દરમિયાન જાણવા મળ્યું કે આ વાહન E20 બ્લેન્ડેડ ઈંધણ માટે કમ્પેટિબલ નહોતું. ગ્રાહકનો મુખ્ય આક્ષેપ એ હતો કે કાર ખરીદતી વખતે કંપની કે તેના ડીલર દ્વારા E20 પેટ્રોલના ઉપયોગ અંગે કોઈ પણ પ્રકારની સ્પષ્ટ કે પર્યાપ્ત ચેતવણી આપવામાં આવી ન હતી.
કોર્ટનો આદેશ અને દંડની જોગવાઈ
કન્ઝ્યુમર કોર્ટે ગ્રાહકની દલીલોને ગંભીરતાથી ધ્યાને લઈને કંપનીને 45 દિવસની અંદર ક્ષતિગ્રસ્ત કાર બદલી આપવાનો આદેશ આપ્યો છે. જો કંપની આ સમયગાળામાં નવું E20 કમ્પેટિબલ મોડેલ આપવામાં નિષ્ફળ જાય, તો તેણે ગ્રાહકને કારની કિંમત (રૂ. 18.29 લાખ), આરટીઓ ફી (રૂ. 1.86 લાખ) અને વીમા પ્રીમિયમ (રૂ. 34,644) મળીને કુલ રૂ. 20,50,494 વ્યાજ સાથે પરત કરવાના રહેશે. આ ઉપરાંત, ગ્રાહકના માનસિક ત્રાસ બદલ રૂ. 1 લાખ અને કેસના ખર્ચ પેટે રૂ. 10,000નો દંડ પણ ફટકારવામાં આવ્યો છે.
E20 ઈંધણ શું છે અને તે કેમ મહત્વનું છે?
E20 ઈંધણ એ 20% ઈથેનોલ અને 80% પેટ્રોલનું મિશ્રણ છે, જેનો હેતુ પ્રદૂષણ ઘટાડવાનો અને ક્રૂડ ઓઈલની આયાત પર નિર્ભરતા ઘટાડવાનો છે. પરંતુ ટેકનિકલ દ્રષ્ટિએ આ ઈંધણનો ઉપયોગ માત્ર એવી જ ગાડીઓમાં થઈ શકે છે, જેની ફ્યુઅલ લાઇન, એન્જિન અને રબર સીલ તે મુજબ ડિઝાઈન કરેલી હોય. અયોગ્ય વાહનમાં E20નો ઉપયોગ એન્જિનને ગંભીર નુકસાન પહોંચાડી શકે છે.
નિષ્ણાતો સલાહ આપે છે કે નવી કાર ખરીદતી વખતે માત્ર ફીચર્સ કે માઈલેજ જ નહીં, પરંતુ તે E20 સુસંગત છે કે નહીં તેની ખાસ તપાસ કરવી જોઈએ. મારુતિ સુઝુકીએ ભવિષ્યમાં જૂના વાહનો માટે ‘અપગ્રેડ કિટ’ લાવવાના સંકેતો આપ્યા છે, પરંતુ ત્યાં સુધી ગ્રાહકોએ ઓનર મેન્યુઅલ વાંચીને જ ઈંધણનો ઉપયોગ કરવો હિતાવહ છે.
આ પણ વાંચો: પુરી રથયાત્રામાં દુર્ઘટના: ભીડના દબાણને કારણે સર્જાયેલી નાસભાગમાં એક શ્રદ્ધાળુનું મોત, અનેક ઘાયલ
