Jamia Ibne Abbas Charitable Trust અમદાવાદ શહેરમાં કોમી એકતા અને ભાઈચારાનો અદભુત સંદેશ આપતો એક પ્રસંગ તાજેતરમાં યોજાયો. અમદાવાદના સરખેજ વિસ્તારમાં આવેલ જામિયા ઇબ્ને અબ્બાસ ચેરિટેબલ ટ્રસ્ટ દ્વારા રવિવાર, 11 ઑક્ટોબર 2026ના રોજ ચોથા ‘સર્વધર્મ સમૂહલગ્ન’ સમારોહનું ભવ્ય આયોજન કરવામાં આવ્યું હતું. જામિયા ઇબ્ને અબ્બાસ ચેરિટેબલ ટ્રસ્ટના પ્રમુખ મુફતી રિઝવાન તારાપુરી સાહેબની સીધી આગેવાની અને માર્ગદર્શન હેઠળ યોજાયેલા આ કાર્યક્રમમાં કુલ 50 જોડાંઓએ એકબીજાનો હાથ થામીને લગ્નજીવનના નવા અધ્યાયનો પ્રારંભ કર્યો હતો.
Jamia Ibne Abbas Charitable Trust આર્થિક બોજ ઘટાડવા અને કોમી એકતા વધારવાનો ઉમદા હેતુ
આજના સમયમાં લગ્નપ્રસંગોમાં થતા ભારે અને બિનજરૂરી ખર્ચાઓને કારણે સામાન્ય અને મધ્યમ વર્ગના પરિવારો આર્થિક મુશ્કેલીમાં મુકાઈ જાય છે. આ પરિસ્થિતિને ધ્યાનમાં રાખીને ટ્રસ્ટ દ્વારા આયોજિત આ સમૂહલગ્નનો મુખ્ય ઉદ્દેશ આર્થિક રીતે નબળા પરિવારોને સહાયરૂપ થવાનો હતો. આ ઉપરાંત, સમાજમાં કોમી એકતા, માનવતા અને સર્વધર્મ સમભાવની ભાવના વધુ મજબૂત બને તે હેતુથી વિવિધ ધર્મના નવદંપતીઓને આ મંચ પર એકસાથે લગ્નગ્રંથિથી જોડવામાં આવ્યા હતા.
મુફ્તી રિઝવાન તારાપુરી સાહેબ
‘ધર્મ ભલે અલગ હોય, પરંતુ માનવતા એક છે’
આ પ્રસંગે મોટી સંખ્યામાં સામાજિક આગેવાનો, દાતાશ્રીઓ અને સમાજના અગ્રણીઓ ઉપસ્થિત રહ્યા હતા અને નવદંપતીઓને સુખી તથા સમૃદ્ધ દાંપત્યજીવન માટે આશીર્વાદ પાઠવ્યા હતા. મુફ્તી રિઝવાન તારાપુરી સાહેબે સમાજને સંદેશ આપતા જણાવ્યું હતું કે, ધર્મ, જાતિ અને સંપ્રદાયના ભેદભાવથી ઉપર ઊઠીને માનવતાના કાર્યમાં જોડાવું એ જ સાચી સમાજસેવા છે.
જામિયા ઇબ્ને અબ્બાસ ચેરિટેબલ ટ્રસ્ટે પોતાનો સંકલ્પ દોહરાવતા કહ્યું હતું કે, “ધર્મ ભલે અલગ હોય, પરંતુ માનવતા એક છે. આવા સર્વધર્મ સમૂહલગ્ન દ્વારા સમાજમાં પ્રેમ, સમાનતા અને ભાઈચારાની ભાવનાને મજબૂત બનાવવાનો અમારો પ્રયાસ સતત ચાલુ રહેશે.” કાર્યક્રમના અંતે આ સેવાકાર્યને સફળ બનાવવા માટે સહયોગ આપનાર તમામ સ્વયંસેવકો, દાતાઓ અને મહેમાનોનો હૃદયપૂર્વક આભાર વ્યક્ત કરવામાં આવ્યો હતો.
